ကချင်ပြည်နယ် မြစ်ကြီးနားမြို့မှာ ကော်သေနတ်အတုနဲ့ ဓားပြတိုက်မှု ဖြစ်ပွားခဲ့တယ်လို့ မျိုးဆက်သစ် လူမှုကယ်ဆယ်ရေးအသင်းကနေ သိရပါတယ်။

ဖြစ်စဉ်ကတော့ အောက်တိုဘာလ ၁၈ ရက် ဒီကနေ့မနက် ၈ နာရီခွဲအချိန် မြို့သစ်ကြီးကွက်သစ် နယ်မြေ (၁၅)ရှိ အလှကုန်ဆိုင်တစ်ဆိုင်မှာ လူငယ် ၃ ဦး ကော်သေနတ်အသုံးပြု ဓားပြတိုက်ခဲ့ပြီး ဆိုင်တွင်းရှိငွေသားတစ်ချို့ကိုလည်း ယူသွားခဲ့တယ်လို့ ဆိုပါတယ်။

ဒါ့အပြင် ကော်သေနတ်အသုံးပြုပြီး ရိုက်နှက်ခဲ့တာကြောင့် ဆိုင်စောင့်နေတဲ့ အသက် ၃၅ နှစ်ဝန်းကျင်အရွယ်ရှိ အမျိုးသမီးတစ်ဦး ဦးခေါင်းနောက်‌စေ့ ဒဏ်ရာရရှိခဲ့တယ်လို့ မျိုးဆက်သစ်လူမှုကယ်ဆယ်ရေး အသင်းရဲ့ အဖွဲ့ဝင်တစ်ဦးက ခုလိုပြောပါတယ်။

“နောက်စေ့ကို ထုသွားတာ ဒဏ်ရာကတော့ ၁လက်မလောက်ပြဲသွားတယ်။ ဒဏ်ရာက အနက်ကြီးတော့ မဟုတ်ဘူး။ စိုးတော့ မစိုးရိမ်ရဘူးဗျ”လို့ဆိုပါတယ်။

ဒဏ်ရာရရှိခဲ့တဲ့ အမျိုးသမီးကိုတော့ မျိုးဆက်သစ်လူမှုကယ်ဆယ်ရေးအသင်းကနေပြီးတော့ လိုအပ်တဲ့ အရေးပေါ်ကုသမှုတွေ ဆောင်ရွက်ပေးပြီး ဆေးရုံကြီးကို ပို့ဆောင်ခဲ့တယ်လို့ သိရပါတယ်။

မြစ်ကြီးနားမြို့မှာ ပြီးခဲ့တဲ့ ဩဂုတ်လမှာလည်း အောင်နန်း ရပ်ကွက် ရွှေဆန်းလီစိန်ရွှေရတနာဆိုင်က စိန်ရွှေရတနာတွေကို ဆိုင်ကယ်ဦးထုပ်စောင်းထားတဲ့ အမျိုးသား ၃ ဦးကနေပြီးတော့ သေနတ်ထောက်ပြီး လုယက်သွားခဲ့တာ ဖြစ်ပါတယ်။

ဒါ့အပြင် ၂၀၂၄ ဇွန်လ ၃ ရက်နေ့မှာလည်း ရမ်ပူရပ်ကွက် လမ်းသွယ်၂၁၊ ၂၃ မှာရှိတဲ့ ရွှေမင်းသမီးအမည်ရှိတဲ့ ရွှေဆိုင်ကို သေနတ်ကိုင်ထားတဲ့ လူငယ် ၃ ဦးက ဓားပြတိုက်သွားခဲ့ပေမယ့် လက်ရှိချိန်ထိ မဖမ်းဆီးနိုင်သေးဘူး ဖြစ်ပါတယ်။

KNG စုစည်းထားတဲ့စာရင်းအရ မြစ်ကြီးနာမြို့မှာ ၂၀၂၅ ခုနှစ် ဇန်နဝါရီလမှာ ခိုးဆိုးလုယက်မှု ၈ ကြိမ်၊ဖေဖော်ဝါရီလ ၁၄ ကြိမ်၊ မတ်လ ၁၀ ကြိမ်နဲ့ ဧပြီလ ၁၂ ကြိမ်၊မေလ ၆ ၊ ဇွန် ၅ ကြိမ်၊ ဇူလှိုင်လ ၄ကြိမ်နဲ့ ဩဂုတ်လမှာတော့ ၅ကြိမ်ဖြစ်ပွားခဲ့ပြီး သေဆုံးသူ၁ဦးရှိခဲ့တာ ဖြစ်ပါတယ်။

ဒီအချက်အလက်တွေဟာ ဒေသအခြေစိုက်လူမှုကယ်ဆယ်ရေးအသင်းတွေနဲ့ ဒေသခံတွေဆီကနေ ဆက်သွယ်မှုအခက်အခဲကြားက လက်လှမ်းမှီသလောက် ကောက်ယူရရှိထားတာ ဖြစ်တဲ့အတွက် မြေပြင်အခြေအနေမှာတော့ကွဲလွဲမှုရှိနိုင်ပါတယ်။

Data For Myanmar ရဲ့ ပြုစုထားချက်အရ အာဏာသိမ်းပြီး ၃ နှစ်အတွင်း မြန်မာနိုင်ငံတဝန်း ဘဏ်တွေဝင်ရောက် လုယက်ခဲ့တဲ့ဖြစ်စဉ် ၂၅ ခုနဲ့ ရွှေဆိုင်လုယက်မှုဖြစ်စဉ် ၅၇ ခုရှိခဲ့တယ်လို့ သိရပါတယ်။

By – Hope