ကချင်ပြည်နယ် ဖားကန့်မြို့နယ် မဆွတ်ဘွမ့် (ခေါ်) အမှိုက်ပုံကျေးရွာက ဘုန်းကြီးကျောင်းဆွမ်းစားဆောင်ပေါ် မနေ့က ညနေပိုင်း ၅ နာရီဝန်းကျင်လောက်က ဒရုန်းဗုံးသီး ကျရောက်ပေါက်ကွဲလို့ အမျိုးသမီးတစ်ဦး၊ အမျိုးသားတစ်ဦးသေဆုံးခဲ့ရတယ်လို့ ဒေသခံ တွေကပြောပါတယ်။

နောက်ထပ် အရပ်သား ၁၂ ဦးကထိခိုက်ဒဏ်ရာရရှိခဲ့ပြီး နှစ်ဖက်တပ်တွေတိုက်ပွဲဖြစ်ပွားရာက တော်လှန်ရေးအင်အားစုတွေရဲ့ ဒရုန်းဗုံးသီး အရပ်သားတွေနေတဲ့နေရာကို ကျရောက်ပေါက်ကွဲတာဖြစ်တယ်လို့ ဒေသခံတွေကယူဆကြပါတယ်။

လက်ရှိဗုံးသီးကျရောက်ပေါက်ကွဲခဲ့တဲ့ မဆွတ်ဘွမ် (ခေါ်) အမှိုက်ပုံကျေးရွာမှာ စစ်ကောင်စီတပ်တွေစစ်ရေးလှုပ်ရှားနေပြီး နေရာယူ ထားတယ်လို့ဒေသခံတစ်ဦးကပြောပါတယ်။

“အမှိုက်ပုံရွာမှာစစ်ကောင်စီကစစ်ရေးလှုပ်ရှားနေတော့ ဒေသခံတစ်ချို့ကလည်းသူတို့အိမ်တွေနှမြောတဲ့အခါ စကစကလည်း လူမရှိရင်အကုန်ယူသွားမှာ မီးရှို့လိုက်မှာကြောက်တော့ စစ်မရှောင်ဘဲလူစောင့်တွေကရှိတယ်။ အဲ့တာတွေကရွာထဲ မနေရဲရင် တောင်ဘုန်းကြီးကျောင်းမှာနေကြတာတွေရှိတယ်။ အဲ့မှာ အမှိုက်ပုံကို ကားနှစ်စီးနဲ့ စစ်ကောင်စီကအင်အားရောက်လာတဲ့အခါ အဲ့မှာ တော်လှန်ရေးအင်အားစုတွေက ဒရုန်းနဲ့သူတို့ရှိတဲ့နေရာ ကိုမှန်းပြီး ဒရုန်းချတယ်။ အဲ့မှာဒရုန်းက တော်လှန်ရေး အင်အားစု တွေဘက်ကပစ်လိုက်တဲ့ဒရုန်းပေါ့ နေရာမှားကြဲလိုက်တယ်လို့ဒေသခံတွေကယူဆကြတယ်”လို့ဒေသခံတစ်ဦးကပြောပါတယ်။

ဒီဖြစ်စဥ်နဲ့ပတ်သက်လို့ ဖားကန့်မှာ တော်လှန်ရေးအင်အားစုတွေဘက်က စစ်ကောင်စီရဲ့စစ်ရေးလှုပ်ရှားမှုတွေအပေါ်မူတည်ပြီး ဒရုန်းအသုံးပြုတိုက်ခိုက်တာရှိပြီး အမှိုက်ပုံကျေးရွာမှာအရပ်သားတွေမရှိတော့ဘဲ စစ်ကောင်စီကတပ်စွဲထားတယ်လို့ ဆိုပါတယ်။

စစ်ကောင်စီဘက်ကအရပ်ဝတ်တွေနဲ့ စစ်ရေးလှုပ်ရှားတာကြောင့် အခုလိုဒရုန်းနဲ့ကြဲချတာဖြစ်နိုင်တယ်လို့ ကာကွယ်ရေးတပ်ဖွဲ့ဝင် တစ်ဦးကအခုလိုပြောပါတယ်။

“ဖားကန့်မှာနေရာတော်တော်များများမှာ ထိတွေ့တိုက်ပွဲရှိနေပါတယ်။ ထိတွေ့တိုက်ပွဲမရှိရင်လည်း ဒရုန်းနဲ့ချတာတို့ ဘာတို့ တော့ရှိပါတယ်။ အဲ့တာတွေကတော့ စစ်ကောင်စီလှုပ်ရှားတဲ့ပေါ်မူတည်ပြီး တော်လှန်ရေးတပ်ဖွဲ့တွေအလုပ်လုပ်နေတာ ဟုတ်ပါတယ်။ တော်လှန်ရေးတပ်ဖွဲ့တွေက မသေချာဘဲနဲ့တော့မလုပ်ကြပါဘူး။ အဓိကတော့ သူတို့အရပ်ဝတ်နဲ့ရွာထဲ ဝင်နေထား တော့ သူတို့အလုပ်လုပ်တာဖြစ်ပါလိမ့်မယ်”လို့ပြောပါတယ်။

ဖားကန့်မြို့မှာတော်လှန်ရေးအင်အားစုတွေအနေနဲ့ စစ်ကောင်စီရဲ့လှုပ်ရှားမှုရှိတဲ့နေရာတိုင်းမှာ ထိတွေ့တိုက်ပွဲတွေဆက်ဖြစ်လာနိုင် တာကြောင့် ပြည်သူတွေအနေနဲ့လည်း အန္တရာယ်ကင်းတဲ့နေရာတွေကိုရွှေ့ပြောင်းပေးကြဖို့နဲ့ စစ်ရေးသတိရှိကြဖို့ အထက်ပါ ကာကွယ်ရေးတပ်ဖွဲ့ဝင်ကဆက်ပြောပါတယ်။

စစ်ကောင်စီတပ်တွေဟာ အမှိုက်ပုံကျေးရွာအပါအဝင် အနီးတစ်ဝှိုက်မှာရှိတဲ့ ဆွတ်ငမ်ယန်ရွာ၊ မှော်ဝမ်းလေး၊ မှော်ဝမ်းကြီး စတဲ့ ကျေးရွာတွေမှာလည်း နေရာယူထားကြပြီး နောက်ထပ်ရွာစဥ်တစ်လျှောက်ကိုနေရာယူဖို့ကြိုးစားလာနေတယ်လို့ ဒေသခံတွေက သုံးသပ်ပါတယ်။

By – အမိုး