ရှမ်းပြည်နယ်မြောက်ပိုင်းက မိုင်းငေါ့၊ နမ့်ဆန်၊ မန်တုံ၊ မိုးကုတ် စတဲ့မြို့နယ်တွေကို စစ်ကောင်စီတပ်က အောက်တိုဘာလ ၁၉ ရက်နေ့ တစ်နေ့တည်းမှာပဲ လေကြောင်းကနေဗုံးကြဲတိုက်ခိုက်ခဲ့တယ်လို့ တအာင်းတပ်မတော် TNLA ကသတင်းထုတ်ပြန်ထားပါတယ်။

အဆိုပါလေကြောင်းတိုက်ခိုက်ခံရမှုတွေမှာ ဘာသာရေးအဆောက်အဦး၊ မီးသတ်ရုံး၊ လက်ဖက်စက်ရုံ၊ အရပ်သားနေအိမ်၊ ကြက်ခြံ စတဲ့အရပ်သားတွေနေထိုင်ရာအဆောက်အဦးတွေပျက်ဆီးခဲ့ရပြီး အရပ်သား ၂ ဦးအပါလည်းထိခိုက်ဒဏ်ရာရရှိခဲ့တယ်လို့ သိရပါတယ်။

“အခုရှမ်းမြောက်မှာအသက်သေဆုံးဒဏ်ရာရတဲ့သူတွေအားလုံးက အရပ်သားတွေဘဲ။ ကျမတို့တအာင်းတွေဘဲမဟုတ်ဘူး။ သူတို့က လူမျိုးတစ်ခုတည်းကိုဦးတည်ပြီးတိုက်ခိုက်တာလည်းဖြစ်ကောင်းဖြစ်နိုင်သလို ဒါပေမဲ့ သူတို့ရဲ့ပစ်မှတ်တော်တော် များများက လူနေထူထပ်တဲ့ပစ်မှတ်တွေဘဲ။အဲ့လိုမျိုးတွေပေါ့”လို့ တအာင်းအမျိုးသမီးအဖွဲ့အစည်း TWO က ရှမ်းပြည်နယ်မြောက်ပိုင်းမှာလေကြောင်းတိုက်ခိုက်ခံရတဲ့နေရာတွေအကြောင်း သူကရှင်းပြပါတယ်။

စစ်ကောင်စီတပ်ရဲ့လေကြောင်းတိုက်ခိုက်မှုကြောင့် နမ့်ဆန်မြို့ နမ္မဝေါရပ်ကွက်က ဒေသခံနှစ်ဦးထိခိုက်ဒဏ်ရာရရှိခဲ့ပြီး နေအိမ် ၂ လုံး၊ လက်ဖက်စက်ရုံတစ်ရုံ၊ မီးသတ်ကား ၅ စီးနဲ့ ကား ၄ စီးပျက်ဆီးခဲ့ရတာပါ။

မန်တုံမြို့နယ် အောင်ချမ်းသာရပ်ကွက်လေကြောင်းတိုက်ခိုက်မှုမှာတော့နေအိမ် ၆ လုံးပျက်ဆီးခဲ့ပြီး မိုင်းငေါ့မြို့နယ် လွယ်ပိန်း ရွာလေကြောင်းတိုက်ခိုက်ခံရမှုမှာ ဘုန်းကြီးကျောင်း၊ ဇရပ်တို့ထိမှန်ပျက်ဆီးခဲ့ရပါသေးတယ်။

ဒါ့အပြင် မိုးကုတ်မြို့နယ် ကျောက်ဖားရွာအုပ်စု ရေအေးကျေးရွာလေကြောင်းတိုက်ခိုက်ခံရမှုမှာတော့ ကြက်ခြံပေါ်ကျရောက် ပေါက်ကွဲခဲ့ပြီး အဆောက်အဦးတချို့ထိခိုက်ပျက်ဆီးခဲ့ရတာဖြစ်ပါတယ်။

အခုလို စစ်ကောင်စီတပ်က အရပ်သားတွေနေထိုင်ရာပတ်ဝန်းကျင်တွေကိုလေကြောင်းတိုက်ခိုက်မှုတွေဆက်တိုက်လုပ်လာတာနဲ့ အမျှ ဒေသခံတွေဟာတိမ်းရှောင်ဖို့နေရာရှားပါးလာတယ်လို့ တအာင်းအမျိုးသမီးအဖွဲ့အစည်းကပြောပါတယ်။

“သူတို့က သူတို့နေတဲ့နယ်မြေကလွဲရင် ဗုံးကြဲတာကို။ ရှမ်းမြောက်မှာက တစ်ရက်တည်းကို နေရာ လေးငါးခုက ဗုံးကြဲတိုက်ခိုက် ခံရနေရတော့ ဒေသခံတွေကပြေးဖို့နေရာဘောင်ကျဥ်းလာတယ်။ အဲ့တော့ လေယာဥ်အန္တရာယ်အတွက် ခိုးကိုးရာနေရာက စစ်ကော်မရှင်နယ်မြေဖြစ်လာတယ်။ စကမနယ်မြေပြေးလိုက်တာနဲ့ သူတို့ရဲ့ခွင်ထဲရောက်သွားပြီ။ မဲလက်မှတ်ထုတ်ပေးခံရပြီ ရွေးကောက်ပွဲအတွက်အသုံးချခံဖြစ်သွားပြီ”လို့ လက်ရှိရှမ်းပြည်နယ်မြောက်ပိုင်းကဒေသခံတွေကြုံနေရတဲ့အခြေနေကို TWO က တာဝန်ရှိသူတစ်ဦးကဆက်ပြောပါတယ်။

စစ်ကောင်စီတပ်ဟာ အောက်တိုဘာလ ၁ ရက်နေ့ကနေ ၁၈ ရက်နေ့အတွင်း ကျောက်မဲ၊ မန်တုံ၊ သီပေါ၊ မိုင်းငေါ့၊ မိုင်းလုံ၊ နမ့်ဆန်၊ နမ္မတူ၊ မိုးမိတ် နဲ့ မိုးကုတ် စတဲ့ တအာင်းတပ်မတော် TNLA ထိန်းချုပ်ထားတဲ့ဒေသတွေကို ဆက်တိုက်ဗုံးကြဲတိုက်ခိုက်မှုတွေလုပ်ခဲ့ တယ်လို့ TNLA ကထုတ်ပြန်ထားပါတယ်။

ဒီလေကြာင်းတိုက်ခိုက်မှုတွေမှာ သံဃာတော် ၂ ပါး၊ ကလေးငယ် ၈ ဦး၊ အမျိုးသား ၁၂ ဦး နဲ့အမျိုးသမီး ၁၉ ဦးတို့သေဆုံး ခဲ့ရပြီး ထိခိုက်ဒဏ်ရာရရှိသူက ၄၀ ဦးထက်မနည်းရှိခဲ့ပါတယ်။

ဒါ့ကြောင့် ဒေသခံတွေအရပ်သားတွေအနေနဲ့ စစ်ကောင်စီရဲ့ဗုံးကြဲတိုက်ခိုက်မှုတွေကို ရှောင်ရှားနိုင်ဖို့ စစ်ရေးသတိအမြဲရှိကြဖို့ လေကြောင်းရန်ကာကွယ်ရေးဆိုင်ရာနည်းလမ်းတွေကို လိုက်နာဆောင်ရွက်ကြဖို့ တအာင်းတပ်မတော် TNLA ကထုတ်ပြန်ထားပါတယ်။

မိုင်းငေါ့မြို့ကို ၂၀၂၄ ခုနှစ် ဒီဇင်ဘာလ ၃၁ ရက်နေ့၊ မိုးကုတ်မြို့ကို ၂၀၂၄ ခုနှစ် ဇူလိုင်လ ၂၄ ရက်နေ့၊ မန်တုံမြို့နဲ့ နမ့်ဆန်မြို့တွေကို တော့ ၂၀၂၃ ဒီဇင်ဘာလ နောက်ဆုံးအပတ်တွေမှာ စစ်ကောင်စီလက်ထဲကနေ တအာင်းတပ်မတော် TNLA အပါအဝင်မြောက်ပိုင်း ညီနောင်မဟာမိတ်တွေကသိမ်းပိုက်ထားတာဖြစ်ပါတယ်။

By – အမိုး