ကချင်ပြည်နယ် ဖားကန့်မြို့ကိုဦးတည်စစ်ကြောင်းထိုးလာတဲ့ စစ်ကောင်စီစစ်ကြောင်းနဲ့ KIA ပူးပေါင်းတပ်တို့ တိုက်ပွဲပြင်းထန်နေပြီး စစ်တပ်က လေကြောင်းပစ်ကူပေးရတဲ့အထိ တိုက်ပွဲပြင်းထန်တယ်လို့ KIO ပြန်ကြား‌ရေးတာဝန်ရှိသူက ပြောပါတယ်။

“ဖားကန့်ဘက်က တိုက်ပွဲပြင်းထန်နေတယ်။ လေယာဉ်နဲ့ဗုံးလာကြဲပြီး ကူပေးနေရတဲ့အထိ တိုက်ပွဲအရမ်းပြင်းထန်နေပါတယ်”လို့ KIO ဗဟိုပြန်ကြားရေးတာဝန်ခံ ဗိုလ်မှူးကြီးအင်ဖန်နော်ဘူက KNG ကို ပြောပါတယ်။

ဖားကန့်မြို့နယ်ကို ပြီးခဲ့တဲ့ ဧပြီလတတိယအပတ်လောက်ကစပြီးတော့ စစ်ကောင်စီတပ်ကအင်အား ၁၀၀၀နီးပါးနဲ့ ကာမိုင်း၊ အင်းတော်ကြီး၊ ဆယ်ဇင်း စတဲ့ဖားကန့်မြို့ကိုဝင်ရောက်နိုင်တဲ့ လမ်းကြောင်း ၃ ခုကနေ စစ်ကြောင်းထိုးလာနေတာ ဖြစ်ပါတယ်။

အဲ့ဒီထဲမှာမှ ကာမိုင်း–ဖားကန့်လမ်းကြောကနေ တက်လာတဲ့စစ်ကောင်စီတပ်တွေဟာ ဖားကန့်မြို့တံတားညီနောင်ရွာအကျော် ပျားအုံကျေးရွာကိုရောက်ရှိလာပြီး ဒီမနက်ပိုင်းအထိပစ်ခတ်မှုတွေဖြစ်နေတယ်လို့သိရပါတယ်။

စစ်ကောင်စီတပ်တွေရောက်ရှိနေတဲ့ ပျားအုံကျေးရွာဟာ ဖားကန့်မြို့အဝင်က လယ်ပြင်ရွာနဲ့ ၅မိုင်ဝန်းကျင်သာဝေးတဲ့ နေရာမှာ တည်ရှိတာဖြစ်ပြီး ဖားကန့်မြို့နဲ့အနီးဆုံးကိုရောက်လာပြီဖြစ်ပါတယ်။ဒီကနေ့နောက်ဆုံးသိရတဲ့ ဖားကန့်အခြေနေအကြောင်း ဒေသခံတစ်ဦးပြောတာကတော့“မနေ့ကညနေပိုင်းကနေတော့ ဖားကန့်ဘက်ကို တက်လာတဲ့ စစ်ကောင်စီပူးပေါင်းတပ်တွေက ဂတ်နွယ် ပျားအုံဘက်ကို ရောက်လာခဲ့ပြီ။ စစ်တပ်က လေယာဉ်နဲ့ ဗုံးကြဲတယ်။ ဖားကန့် တပ်မကနေ ‌လောင်ခန် မဇွမ်ယန် ထောင်နဲ့ လယ်ပြင် ကနေလည်း လက်နက်ကြီးနဲ့ ပစ်၊ လေယာဉ်ဗုံးတွေကြဲပေးပြီး ထိုးစစ်ဆင်လာတာပေါ့။ ဒါကြောင့် မနေ့က ပျားအုံရွာ ဘက်ကို သူတို့ ရောက်လာနိုင်ခဲ့တာဟုတ်တယ်။ ဒီ‌မနက် ၁၁နာရီလောက်မှာလည်း စစ်ကောင်စီလေယာဉ်တွေက လေယာဉ်ဗုံးကြဲတာတွေရှိနေတယ်”

တစ်ဖက်မှာ ဖားကန့်–ကာမိုင်းလမ်းအတိုင်းတက်လာတဲ့ စစ်ကောင်စီပူးပေါင်းစစ်ကြောင်းတွေနဲ့ KIA ပူးပေါင်းတပ်တွေအကြား တိုက်ပွဲတွေဆက်တိုက်ဖြစ်နေပြီး စစ်ကောင်စီဘက်ကရာနဲ့ချီသေဆုံးမှုတွေရှိနေတယ်လို့ ဒေသခံတွေ ကပြောကြပေမဲ့ KNG က သီးခြားအတည်ပြုနိုင်တာတော့မရှိသေးပါဘူး။

ဖားကန့်မြို့နယ်ကို လမ်းကြောင်း ၃ ခုကနေဝင်ရောက်လာနေတဲ့ စစ်ကြောင်းတွေထဲ စစ်ကောင်စီတပ်သားတွေအပါအဝင် ကာမိုင်းပြည်သူ့စစ်၊ ဝါရာဇွပ်ပြည်သူ့စစ် နဲ့ ဝိုင်းမော်ပြည်သူ့စစ် အဖွဲ့တွေပါဝင်တယ်လို့သိရပါတယ်။

ဒီပူးပေါင်းစစ်ကြောင်းတွေ တက်လာတဲ့လမ်းကြောင်း ၃ ခုပေါ်မှာရှိနေတဲ့ကျေးရွာပေါင်း ၁၃ ရွာထက်မနည်းက ဘေးလွှတ်ရာ တောတောင်တွေနဲ့ ဖားကန့်မြို့ပေါ်ရပ်ကွက်တွေမှာတိမ်းရှောင်နေကြတယ်လို့ ပြောပါတယ်။

ကချင်လွတ်လပ်ရေးတပ်မတော် KIA နဲ့ကာကွယ်ရေးပူးပေါင်းတပ်တွေဟာ ဖားကန့်မြို့ရဲ့အဝင်လမ်းကြောင်းတွေနဲ့ မြို့ရဲ့နေရာ တော်တော်များများကိုထိန်းချုပ်ထားတာ ပြီးခဲ့တဲ့နှစ်ကတည်းကဖြစ်ပါတယ်။

ကချင်ပြည်နယ်ရဲ့ဒုတိယမြို့တော်ဗန်းမော်မြို့ကို အပြီးသတ်ဖို့ KIA နဲ့ပူးပေါင်းတပ်တွေအပြင်းအထန်ထိုးစစ်ဆင်နေချိန်မှာပဲ စစ်ကောင်စီတပ်ကတော့သူတို့လက်လွှတ်ထားရပြီး စစ်ရေးအရရော၊ စီးပွားရေးအရပါအရေးပါတဲ့ ဖားကန့်ကိုပြန်ရဖို့ကြိုးစား လာနေတာဖြစ်ပါတယ်။

“ဖားကန့်ဆိုတဲ့နေရာမှာ သူတို့လက်လွှတ်ခဲ့ရတဲ့ ဝှေခါဆိုရင် အင်မတန်မှကျောက်ကောင်းတွေထွက်တဲ့နေရာတွေလေ။ ဒါတွေကို ပြန်ထိန်းချုပ်ဖို့အတွက်အားစိုက်တယ်လို့ကျနော်ကမြင်မိတယ်။ ပထမအချက်က သူတို့ရဲ့တန်ပြန်တိုက်စစ် ဖော်ဆောင်တဲ့ နေရာမှာ အကုန်လုံးသူတို့မလုပ်နိုင်ဘူး ဒါ့ကြောင့် အရေးကြီးတဲ့ နှစ်နေရာပေါ့ Strategic location လို့ခေါ်တာပေါ့ ဆိုတော့ အဲ့လိုတည်နေရာတွေပြန်သတ်မှတ်တဲ့နေရာမှာ တစ်တစ်ချက်က Finacial source များတဲ့ နေရာရယ် နောက်တစ်ခုက သူတို့ရဲ့စစ်ရေးအရအရေးကြီးတဲ့နေရာပေါ့နော် ဖားကန့်က အဲ့ဒီနှစ်နေရာထဲက တစ်နေရာ ပေါ့နော် အဓိကက ဒီFinacial source ရှိတဲ့နေရာ အဲ့တာကိုပြန်ထိန်းချုပ်ဖို့အတွက် အားစိုက်တယ်လို့ ကျနော်ကမြင်မိ တယ်”

ပြီးခဲ့တဲ့ ၂၀၂၄ ခုနှစ် မတ်လဆန်းပိုင်းကနေ အရှိန်အဟုန်နဲ့စတင်လိုက်တဲ့ KIA ပူးပေါင်းတပ်တွေရဲ့ ထိုးစစ်ဟာ ဒီနေ့အထိ အရှိန်မြင့်နေဆဲဖြစ်ပြီး ကချင်ပြည်နယ်ထဲက မြို့ပေါင်း ၁၄ မြို့အပါအဝင် ရှမ်းပြည်နယ်မြောက်ပိုင်းက နမ့်ဖတ်ကာမြို့နဲ့ မဘိန်းမြို့တို့ကိုသိမ်းပိုက်ထားပြီဖြစ်ပါတယ်။

ဒါ့အပြင် စစ်ကိုင်းနဲ့ကချင်အစပ်မှာရှိတဲ့ မြို့သိမ်းတိုက်ပွဲတွေမှာလည်း KIA က အမျိုးသားညီညွှတ်ရေးအစိုးရ NUG လက်အောက်ခံကာကွယ်ရေးတပ်၊ ကျောင်းသားတပ်မတော် ABSDF အပါအဝင်တော်လှန်ရေးအင်အားစုတစ်ချို့နဲ့ ပူးပေါင်းပြီး ထိုးစစ်တွေပြုလုပ်နေပါတယ်။

By – အမိုး