မြစ်ကြီးနား–မန္တလေးခရီးစဥ် လမ်းပိုင်းဆိုးရွားမှုတွေကြောင့် ဧရာဝတီမြစ်ကိုဇာတ်ကူးပြီးဖြတ်သန်းနေရတာတစ်လကြာရှိလာပြီလို့ကားသမားတွေကပြောပါတယ်။

ပြီးခဲ့တဲ့ ဇူလိုင်လ ၂၃ ရက်နေ့ကစလို့ မြစ်ကြီးနား–မန္တလေးလမ်းပိုင်းက မိုင် ၄၀ ကျော်ရှိတဲ့ ပေကြီးကွင်းလမ်းဟာ မိုးရွာသွန်းမှုတွေကြောင့်အသုံးပြုဖို့ခက်ခဲလာတာကြောင့် ကားသမားတွေဟာ ကသာမြို့နယ်ဘက်ကနေပတ်ပြီးခရီးနှင်နေကြရတာလို့သိရပါတယ်။

လက်ရှိ မြစ်ကြီးနား–မန္တလေးခရီးစဥ်ဟာ ၅ ရက်ဝန်းကျင်သွားနေရတဲ့အကြောင်းကားသမားတစ်ဦးကအခုလိုပြောပါတယ်။

“ကျနော်တို့ကဇာတ်ကူးပြီးသွားနေရတာပေါ့။ ကွင်းလမ်းတွေကသွားလို့မရဘူး။ တစ်လလောက်ရှိတော့မယ်။ ကားကြီးတွေကတော့သွားတော့သွားနေတယ်။ ထောက်ပြီးသွားနေရတာပေါ့ ခရီးစဥ်ကအရမ်းကြာတယ်။ ကျနော်တို့ကကားလေးတွေဆိုတော့ အမြန်သွားကြတာပေါ့ ဒါ့ကြောင့် ဇာတ်ကူးပြီးသွားတာ”လို့ပြောပါတယ်။

အခုလို ခရီးစဥ်ကကြာမြင့်လာတာနဲ့အတူ ခရီးစရိတ်ကပုံမှန်ထက် ကျပ် ၁၀ သိန်းပိုကုန်ကျနေရပေမဲ့ ကားသမားတွေဘက်ကတော့ခရီးသွားစရိတ်ကိုတိုးမြင့်ဖို့အတွက်အဆင်မပြေတဲ့အခြေနေလို့ သူကဆက်ပြောပါတယ်။

ကုန်ကားကြီးတွေနဲ့ခရီးသွားကားကြီးတွေကတော့ အဆိုပါဇာတ်ကူးရတဲ့လမ်းပိုင်းကိုအသုံးပြုလို့မရဘဲ ပေကြီးကွင်းလမ်းရဲ့အခြေနေကိုကြည့်ပြီးဖြတ်သန်းနေရသလို အခက်အခဲအမျိုးမျိုးကြားကနေ ခရီးစဥ်ကြာမြှင့်ချိန်ကလည်းခန့်မှန်းလို့မရဘူးလို့ကားသမားတွေကပြောပါတယ်။

“လမ်းကအဆင်မပြေတော့ ပိုခက်ခဲတာပေါ့။ ကုန်ကျမှုကလည်းပိုများတယ်။ ကားတွေလည်းအဆင်မပြေဘူးပေါ့။ ကုန်ဈေးနှုန်းကကားသမားတွေသွားနေတော့အပြောင်းအလဲတော့မရှိဘူး ဒါပေမဲ့ ကားသမားတွေကတော့ပိုခက်သွားတာပေါ့။ ဈေးကလည်းဒီထက်ပိုတက်လို့အဆင်မပြေတော့ဘူးလေ။ ခရီးသည်တင်စရိတ်ကလည်း အများကြီးတက်လို့မရဘူးလေ”လို့ပြောပါတယ်။

လက်ရှိ မြစ်ကြီးနား–မန္တလေးခရီးစဥ်ကို ကုန်ပြေးဆွဲနေတဲ့ယာဥ်ငယ်နဲ့လိုက်ပါမယ်ဆိုရင် တစ်ယောက်ကို ကျပ် ၂ သိန်းရှိပြီးကုန်တင်တဲ့တန်ဆာခ တစ်ပိဿာကို ကျပ် ၃၀၀၀ ဝန်းကျင်ဈေးနှုန်းရှိတယ်လို့သိရပါတယ်။

မြစ်ကြီးနား–မန္တလေးခရီးစဥ်ပြေးဆွဲတဲ့ကားတွေဟာ စစ်ကောင်စီတပ်နဲ့ကာကွယ်ရေးတပ်တွေရဲ့နှစ်ဖက်တိုက်ပွဲတွေအကြားပေကြီးကွင်းလမ်းကိုအသုံးပြုနေခဲ့ကြတာ ပြီးခဲ့တဲ့ ၂၀၂၄ ခုနှစ်ဩဂုတ်လအင်းတော်မြို့သိမ်းတိုက်ပွဲစတင်ချိန်ကတည်းကဖြစ်ပါတယ်။

မန္တလေး–မြစ်ကြီးနားလမ်းပိုင်းမှာရှိတဲ့ အင်းတော်မြို့ကိုကာကွယ်ရေးပူးပေါင်းတပ်တွေကမြို့သိမ်းတိုက်ပွဲဆင်နွှဲနေချိန်အတွင်း ၉ လကျော်အထိကွင်းလမ်းအသုံးပြုသွားလာခဲ့ကြရပါတယ်။

ဧပြီလ ၇ ရက်နေ့မှာတော့ အင်းတော်မြို့ကို ကာကွယ်ရေးပူးပေါင်းတပ်တွေအပြီးသတ်သိမ်းပိုက်နိုင်ခဲ့တာကြောင့် ပြည်ထောင်စုလမ်းမကြီးကို ပုံမှန်အသုံးပြုလို့ရနိုင်မယ်လို့ဒေသခံတွေမျှော်လင့်ခဲ့ကြပေမဲ့ 

မိုင် ၄၀ ကျော်ရှိတဲ့ကွင်းလမ်းကိုသာဆက်လက်အသုံးပြုနေကြရတာဖြစ်ပါတယ်။

By – အမိုး