ကချင်ပြည်နယ် မြစ်ကြီးနားမြို့မှာ ယာဉ်တိုက်ပြေးမှုမကြာခဏ ဖြစ်နေတယ်လို့ မြစ်ကြီးနားအခြေစိုက် လူမှုကယ်ဆယ်ရေးအသင်းတွေဆီကနေ သိရပါတယ်။

ယာဉ်တိုက်ပြေးမှုတွေဟာ များသောအားဖြင့် ညနေပိုင်းအချိန်တွေနဲ့ ညမိုးချုပ် ၁၀ နာရီ နောက်ပိုင်းအဖြစ်များတယ်လို့ သိရှိရပြီးကားတိုက်ခံရလို့ ထိခိုက်ဒဏ်ရာရရှိတဲ့သူတွေထဲမှာတော့ အနီရောင်အဆင့်ထိ ပြင်းထန်ဒဏ်ရာရရှိသူတွေရှိခဲ့တယ်လို့ မျိုးဆက်သစ်လူမှုကယ်ဆယ်ရေးအသင်းရဲ့ အဖွဲ့ဝင်တစ်ဦးက KNG ခုလိုပြောပါတယ်။

“ဆိုးတာကတော့ ၅၀/၅၀ ပေါ့ တစ်ချို့လူနာတွေကတော့ တော်တော်ဆိုးဆိုးဝါးဝါးဘဲ အသက်အန္တရာယ်စိုးရိမ်ရတဲ့အထိကို ဖြစ်သွားတယ်။ တစ်ချို့ဆိုရင်တော့ ထိခိုက်ပွန်းပဲ့ရုံဘဲပေါ့”လို့ဆိုပါတယ်။

ယာဉ်တိုက်ပြေးတဲ့ ဖြစ်စဉ်အကြိမ်အရေအတွက် တိတိကျကျကို မသိရှိသေးပေမယ့်လည်း မျိုးဆက်သစ်လူမှုကယ်ဆယ်ရေးအသင်းရဲ့ ပြောကြားချက်အရတော့ တစ်ပတ်ကို ၃ ကြိမ်ဝန်းကျင်နဲ့ ကချင်ပြည်နယ် မြစ်ကြီးနားမြို့ လူမှုကယ်ဆယ်ရေးအသင်းကတော့ တစ်လကို ၃ ကြိမ်ဝန်းကျင်ထိတွေ့ရတယ်လို့ သိရပါတယ်။

ခုလိုယာဉ်တိုက်ပြေးတဲ့အမှု မကြာခနကြုံတွေ့ရပေမယ့် တိုက်ပြေးသွားတဲ့တရားခံတွေကို တစ်ခါမှ ဖမ်းဆီးရမိခြင်းမျိုးမရှိသေးဘူးလို့သိရပါတယ်။

ဒီယာဉ်တိုက်မှုကျူးလွန်သူ‌တွေဟာအရက်နဲ့တစ်ခြားမူးယစ်ဆေးဝါးသုံးစွဲပြီး ယာဉ်မောင်းနှင်တာတွေ‌ ကြောင့်ဖြစ်နိုင်တယ်လို့ မြစ်ကြီးနားပြည်သူတွေ သုံးသပ်ကြပါတယ်။

“ညပိုင်းဆို သောက်စားထားပြီး မူးမူးနဲ့မောင်းတဲ့သူက ပိုများတာ။ ဒါမျိုးကျ ကင်းလှည့်တဲ့စစ်သားနဲ့ရဲကလည်း မမြင်တာလားမသိ။ ပြည်သူတွေကို လုံခြုံရေးပေးမယ့်သူတွေက သူတို့ကိုပြန်ကြောက် နေရတယ်။ ဒီလိုအမှုတွေမဖြစ် အောင် ဖမ်းဆီးအရေးယူနိုင်တာလည်းမရှိဘူး”လို့ မြို့ခံအမျိုးသားတစ်ဦး ပြောပါတယ်။

မြစ်ကြီးနားမြို့မှာ ပြီးခဲ့တဲ့ မေလ ၁၂ ရက်နေ့ကလည်း  ည ၉ နာရီဝန်းကျင်အချိန် မြေမြင့်ရပ်ကွက် Second Family ဖုန်းဆိုင်အနီး ဆိုင်ကယ်မောင်းလာတဲ့ သားအဖနှစ်ယောက်ကို ကားအဖြူတစ်စီးက ဝင်တိုက်သွားတာကြောင့် သားဖြစ်သူက ဗိုက်ပေါက်ဒဏ်ရာအပြင် မျက်နှာနဲ့ ဦးခေါင်းဒဏ်ရာတွေကြောင့် ပွဲချင်းပြီးသေဆုံးသွားခဲ့ပြီး ဖခင်ဖြစ်သူကတော့ ဦးခေါင်းပြင်းထန်ဒဏ်ရာကြောင့် ဆယ်ရက်အကြာမှာ ပြန်လည် သေဆုံးသွားခဲ့တာ ဖြစ်ပါတယ်။

စစ်ကောင်စီတပ်က လုံခြံရေးတင်းကြပ်ထားတဲ့အပြင် ညမထွက်ရအမိန့်ထုတ်ပြန်ထားတဲ့ မြစ်ကြီးနားမြို့မှာ ရဲနဲ့ စစ်သားတွေပေါင်းပြီး လိုင်စင်မဲ့ကားတွေကို ရှောင်တခင်ဖမ်းဆီးဒဏ်ရိုက်တာတွေ လုပ်ဆောင်နေပေမယ့် ခုလို ယာဉ်တိုက်ပြေးမှုတွေကို ဖမ်းဆီးတာ ၊ ခိုးဆိုးလုယက်တာတွေကို ဖမ်းဆီးတာတွေကိုတော့ ခုချိန်ထိ လုပ်ဆောင်နိုင်ခြင်း မရှိသေးဘူးဘဲ ဖြစ်ပါတယ်။

By – Hope