ဖားကန့်ဒေသကို ဒုတိယအကြိမ် ထပ်မံစစ်ကြောင်းထိုးလာတဲ့ စစ်ကောင်စီတပ်တွေ ကားမိုင်း – ဖားကန့်လမ်းတစ်လျှောက်ရှိ ကျေးရွာတွေမှာ တပ်စွဲနေရာယူထားပြီး လုံခြုံရေးရယူကာ ဖားကန့်ဗျူဟာမှူးအသစ်ပြောင်းလိုက်တယ်လို့သိရပါတယ်။

ဖားကန့် တပ်မ ၃၃ ၊ တပ်မမှူးအသစ်ခန့်အပ်နိုင်ဖို့ စစ်ကောင်စီတပ်တွေဟာ ဇွန်လ ၂၀ ရက်နေ့ စတင်ပြီး ကားမိုင်းဘက်ကနေ စစ်ကောင်စီတပ်အပါ ပြည်သူ့စစ်အင်အားအများအပြားနဲ့ စစ်အင်အား ၁၅၀ ခန့်က ထပ်မံစစ်ကြောင်းထိုးတက်လာခဲ့တာဖြစ်ပါတယ်။

ဒုတိယအကြိမ် ပြန်တက်လာတဲ့ စစ်ကြောင်းတွေက နန့်ယား၊ ဆိုင်းဖရာ၊ ခွန်စိုင်ဇွပ်၊ ကပ်မှော်၊ တံတားညီနောင်၊ ပျားအုံ၊ နန့်တိန့် စတဲ့ ကျေးရွာတစ်လျှောက် စစ်အင်အားအများအပြားချထားပြီးတော့ ဖားကန့်ဗျူဟာမှူးအသစ်ပြောင်းလိုက်တယ်လို့ နန့်ယားဒေသခံ အမျိုးသားတစ်ဦးက KNG ကိုပြောပါတယ်။

“အခုအသစ်ပြောင်းလိုက်တဲ့ ဗျူဟာမှူးအသစ်က ကားလမ်းကနေအတိုင်းပဲ တက်လာတာ။ မနေ့ကတောင် ဖားကန့်ဘက်ကို ရောက်သွားပြီလို့ သတင်းရပါတယ်။ အခုဒီမှာ စစ်ကြောင်းပြန်ထိုးတာတဲ့ စစ်ကြောင်းတွေက လုံခြုံရေးယူပေးကြတာဟုတ်တယ်။ အင်အားကတော့ များလို့လေ ခန့်မှန်းရတော့ခက်တယ်။ ကျေးရွာတစ်လျှောက်မှာရှိကြတယ်ဆိုတော့လေ”လို့ပြောပါတယ်။

ဖားကန့် ဗျူဟာမှူးအသစ်ကို လေကြောင်းနဲ့ ပို့ဆောင်ပေးဖို့ အန္တရာယ်များတဲ့အတွက် အခုလို ကားမိုင်း – ဖားကန့် လမ်းကိုပဲ လုံခြုံရေးတင်းကြပ်ထားကာ ပို့ဆောင်လိုက်တာဖြစ်နိုင်တယ်လို့ ပြောပါတယ်။

လက်ရှိ ဖားကန့် ဗျူဟာမှူးအသစ်ခန့်အပ် ခံရတဲ့သူက မိုးကောင်း စကခ(၃) ၊ စကခမှူး ဗိုလ်မှူးကြီး ဇော်ဝင်းဆိုသူဖြစ်တယ်လို့ စစ်ရေးသတင်းအရင်းအမြစ်တွေဆီကနေ သိရပါပေမယ့် KNG က အတည်ပြုနိုင်ခြင်းမရှိသေးပါဘူး။

တပ်မမှူးအပြောင်းအလဲဖြစ်တာနဲ့ ပတ်သက်ပြီး ဒီကနေ့ မနက်ပိုင်း ၇ နာရီဝန်းကျင်မှာ  အသစ်ရောက်လာတဲ့ တပ်မမှူးက ဖားကန့် ယမ်းချက်စက်ရုံကနေ ၆ ဘီးကား ၂ စီးအပါ အိမ်စီးကား ၂ စီးနဲ့ ၁၀ နာရီဝန်းကျင်လောက်မှာ ဖားကန့် တပ်မကုန်းဆီ ဝင်ရောက်သွားပြီလို့ ဖားကန့် ဒေသခံတွေ ဆီကနေ သိရပါတယ်။

ဖားကန့် ဗျူဟာမှူးအဟောင်းဖြစ်တဲ့ တပ်မမှူး ဗိုလ်မှူးချုပ်ခ ပြီးခဲ့တဲ့ ဇွန်လအတွင်းမှာပဲ စစ်တပ်က စစ်ရဟတ်ယာဉ်နဲ့ လာရောက် တင်ဆောင်သွားတယ်လို့ ဖားကန့်ဒေသခံတွေဆီကနေ စုံစမ်းသိရှိရပါတယ်။

မေလ ကုန်ပိုင်းမှာ ပထမအကြိမ် စစ်ကြောင်းထိုးလာတဲ့ စစ်ကောင်စီတပ်တွေက ဖားကန့်လမ်းတစ်လျှောက်ရှိကျေးရွာတွေမှာ တပ်စွဲနေထိုင်သွားတာမျိုးမရှိဘဲ ဒုတိယအကြိမ်တက်လာတဲ့ စစ်ကြောင်းတွေက လက်ရှိ ကျေးရွာအားလုံးနီးပါးမှာ တပ်စွဲထားတဲ့ အခြေအနေဖြစ်တယ်လို့ နန့်ယားဒေသခံ အမျိုးသားက ဆက်ပြောပါတယ်။

“ဘာပဲဖြစ်ဖြစ် အခုဖားကန့် လမ်းကတော့ စစ်ကောင်စီဘက်က ပြန်ထိန်းချုပ်လာနိုင်တဲ့ အခြေနေမှာ မြင်တွေ့လာရတယ်။ အဲ့ကြောင့် သူတို့ တက်လာချင်တဲ့ အချိန်တက်လာလို့ရနေတာ။ အဲ့ဒီအတွက်ကြောင့်လည်း အင်အားဘယ်လောက်အထိ ဘယ်လို နေရာယူထားကြပြီဆိုတာလဲပြောဖို့ခက်နေတယ်။ KIA နဲ့ ထိတွေ့တိုက်ပွဲ တစ်ချို့ဖြစ်တာမျိုးလည်းရှိပါတယ်”လို့ပြောပါတယ်။

ဒုတိယအကြိမ် ပြန်လည်တက်လာတဲ့ စစ်ကြောင်းတွေကို KIA နဲ့ တော်လှန်ရေးတပ်ဖွဲ့တွေက နန့်ယားကျေးရွာတဝိုက်မှာ ခုခံတိုက်ခိုက်တာတွေရှိခဲ့တဲ့အတွက် အပြန်အလှန် ပစ်ခတ်မှုတွေလည်းရှိခဲ့ပါတယ်။

ကားမိုင်း – ဖားကန့် လမ်းတစ်လျှောက် စစ်ကောင်စီတပ် စစ်အင်အား အလုံးအရင်းနဲ့ ထပ်မံ စစ်ကြောင်းထိုးထားတဲ့အတွက် နန့်ယား၊ ဆိုင်းဖရာ၊ ခွန်စိုင်ဇွပ်၊ ကပ်မှော်၊ တံတားညီနောင်၊ ပျားအုံ၊ နန့်တိန့် စတဲ့ ကျေးရွာနေ ပြည်သူတွေက စစ်ရှောင်ကာလ ၃ လခန့်ကြာမြင့် လာတဲ့အထိ နေရပ်ပြန်နိုင်ခြင်းမရှိဘဲ တောတွင်းနေရာတွေမှာပဲ ဆက်လက်တိမ်းရှောင်နေကြတယ်လို့ သိရပါတယ်။

စစ်ရှောင်တွေဟာ တောတွင်းနေရာတွေမှာ တိမ်းရှောင်လာရတဲ့ အချိန်ကာလကြာမြင့်လာတဲ့အတွက် အစားအသောက်အခက်အခဲ၊ ကလေးငယ်တစ်ချို့ကျောင်းတက်နိုင်ဖို့ အခက်အခဲဖြစ်နေကြသလို သက်ကြီးရွယ်အိုနဲ့ ကိုယ်ဝန်ဆောင်မိခင်တွေလည်း နာမကျန်းဖြစ်တဲ့အတွက် ဆေးဝါးအကူအညီတွေလည်း လိုအပ်နေတယ်လို့ တောင်းဆိုနေကြပါတယ်။

ဖားကန့်ဒေသမှာ စစ်ကောင်စီတပ်တွေဟာ ပြီးခဲ့တဲ့ ဧပြီလ ၂၅ ရက်နေ့ နောက်ပိုင်း ဖားကန့်တပ်မမှူးအပြောင်းအလဲလုပ်ဖို့ ခေါင်းစဉ်နဲ့ စစ်ကြောင်းထိုး ဝင်ရောက်လာခဲ့တာဖြစ်ပြီး လက်ရှိ ဖားကန့်မြို့ထဲ စစ်ကြောင်းထိုး ဝင်ရောက်နေပြီဖြစ်တဲ့ စစ်ကြောင်းတွေက KIA ထိန်းချုပ်ထားတဲ့ နေရာတွေကို ပြန်လည်ရယူဖို့ တန်ပြန်ကြိုးပမ်းနေပြီဖြစ်ပါတယ်။

၂၀၂၄ ခုနှစ်မှာ ဖားကန့်ဒေသရဲ့ ၇၀ ရာခိုင်နှုန်းကို ကချင်လွတ်လပ်ရေးတပ်မတော် KIA နဲ့ တော်လှန်ရေးတပ်ဖွဲ့တွေ ထိန်းချုပ်ထားနိုင်ခဲ့ပြီး ထိန်းချုပ်ထားတဲ့ နေရာတွေမှာ အုပ်ချုပ်ရေးယန္တရားလည်ပတ်နေတာ တစ်နှစ်ပြည့်အကြာ စစ်ကောင်စီတပ်ရဲ့ ထိုးစစ်ပြန်လည် ဆင်းနွှဲလာခဲ့တာလည်းဖြစ်ပါတယ်။

By – နော်ထွယ့်(ဟူးကောင့်)