ဖားကန့် မှော်ဆီစာကျေးရွာမှာ အရပ်သားပြည်သူ ၂ ဦး ပစ်သတ်ခံရတဲ့ ဖြစ်စဉ် ဖြစ်ပွားခဲ့တယ်လို့ ဖားကန့် ဒေသခံ တွေဆီကနေ သိရပါတယ်။

 ဒီကနေ့ ဩဂုတ်လ ၂၂ ရက်နေ့ မနက်ပိုင်း ၁၀ နာရီဝန်းကျင်မှာ မှော်ဆီစာကျေးရွာ လမ်းမကြီးပေါ် အထကကျောင်းအနီးရှိ စိန်ချိုကွမ်းယာဆိုင် ရှေ့မှာ အမျိုးသား နှစ်ဦး ပစ်သတ်ခံလိုက်ရတယ်လို့ ဖားကန့်ဒေသခံ အမျိုးသားတစ်ဦး KNG ကိုပြောပါတယ်။

“ဖြစ်စဉ်က ဘယ်အဖွဲ့အစည်းက လုပ်တယ်ဆိုတာကို အသေးစိတ်တော့ ဘယ်သူမှမသိရပါဘူး။ စိန်ချိုကွမ်းယာဆိုင် မျက်စောင်းထိုးတောင့်မှာ ပစ်သတ်ခံလိုက်ရတာပေါ့လေ။ ပစ်သတ်ခံရသူက ကိုချစ်နိုင်လို့ဆိုတဲ့သူဖြစ်ပါတယ်”လို့ပြောပါတယ်။

ပစ်သတ်ခံလိုက်ရတဲ့ ကိုချစ်နိုင်ဆိုသူဟာ အသက် ၄၅ နှစ်အရွယ်ရှိသူဖြစ်ပြီးတော့ မွတ်ဆလင်လူမျိုးဖြစ်တယ်လို့သိရပါတယ်။

သေဆုံးသွားတဲ့ ဦးချစ်နိုင်ကို ဘယ်အဖွဲ့အစည်းက ပစ်သတ်သွားတာကို အသေးစိတ်မသိရသလို ပစ်သတ်ခံရတာနဲ့ ပတ်သက်ပြီးတော့လည်း မသိရတာဖြစ်ပါတယ်။

ဦးချစ်နိုင်ဆိုသူရဲ့ မိသားစုဝင်တွေဟာ လယ်ပြင်ကျေးရွာမှာ အိမ်ငှာအဖြစ် နေထိုင်ကြသူဖြစ်ကြောင်းနဲ့ အစ်ကိုယ်ဖြစ်သူက လာရောက်အတည်ပြုသွားတယ်လို့လည်း ဖားကန့် လူမူကူညီရေးအဖွဲ့တွေပြောပါတယ်။

အခုလို ဦးချစ်နိုင်ဆိုသူ ပစ်သတ်ခံရပြီး နောက်ထပ် ၁၀ မိနစ်ခြားမှာပဲ မှော်ဆီစာကျေးရွာရဲ့ ရွာလယ်မိန်းလမ်းမကြီးပေါ်မှာ  နောက်ထပ်အမျိုးသားတစ်ဦးလည်း ထပ်မံပစ်သတ်ခံလိုက်ရတယ်လို့ သိရပါတယ်။

“အဲ့တစ်ယောက်က မနက်ကတည်းကနေ ပစ်သတ်ခံလိုက်ရတဲ့ နေရာမှာပဲ ထိုင်နေတာတွေ့တယ်လို့ ပြောပါတယ်။ အဲဒါကို ပစ်သတ်သွားတဲ့ သဘောမျိုးပေါ့လေ။ သူ့ကိုတော့ အနီးကပ်ပစ်သတ်သွားတာ။ သူ့ရဲ့ ကိုယ်ပေါ်မှာ ကျဉ်ထိရာ ၂ ချက်တွေ့ပါတယ်”လို့ပြောပါတယ်။

ထပ်မံပစ်သတ်ခံရသူဟာ ဘယ်သူမှန် ဘယ်ဝါမှန်းမသိဘဲ ပိုင်ရှင်မဲ့အလောင်းအဖြစ် ကျန်ရှိနေတာလို့ သိရပါတယ်။

ဖားကန့်ဒေသမှာ ပြီးခဲ့တဲ့ ဧပြီလအတွင်းကနေ စစ်တပ် စစ်ကြောင်း ဝင်ရောက်သွားကတည်းကနေ စစ်တပ်နေရာယူထားတဲ့ ကျေးရွာမှော်ဒေသတွေမှာ အရပ်သားပြည်သူတွေ မကြာခဏပစ်သတ်ခံရတဲ့ ဖြစ်စဉ်တွေ ဆက်တိုက်ဖြစ်ပွားနေပါတယ်။

အရပ်သားတွေ အကြောင်းမဲ့ ပစ်သတ်ခံရတဲ့ ဖြစ်စဉ်တွေ နဲ့ တစ်ဖက်မှာ တိုက်ပွဲကြောင့် လက်နက်ကြီးထိမှန်ပြီး အရပ်သားသေဆုံးတဲ့ ဖြစ်စဉ်တွေက ဩဂုတ်လအတွင်းမှာ  ပိုပြီးမြင့်လာပါတယ်။

ဩဂုတ်လ ၁၄ ရက်နေ့မှာ ဖားကန့် ဗျူဟာကုန်းကနေ ပစ်လိုက်တဲ့ လက်နက်ကြီးကြောင့် ရှရော်ခကျေးရွာက ကလေးငယ်တစ်ဦးအပါ အသက် ၅၀ ကျော်အရွယ် အမျိုးသား ၄ ဦး ထိခိုက်ဒဏ်ရာရရှိခဲ့ပါတယ်။

ဒါ့အပြင် ဩဂုတ်လဆန်းပိုင်း တစ်ပတ်အတွင်းမှာပဲ စစ်တပ်ရဲ့လက်ချက်ကြောင့် အရပ်သား ၇ ဦးသေဆုံးပြီး ၂၀ ကျော်ထိခိုက်ဒဏ်ရာရရှိခဲ့ပါတယ်။

By – နော်ထွယ့်(ဟူးကောင့်)