ကချင်ပြည်နယ် မိုးညှင်းမြို့နယ်တွေမှာ SNA တပ်ရဲ့တပ်သားသစ် ဖမ်းဆီးမှုတွေကြောင့် ဒေသခံပြည်သူများ လယ်လုပ်ဖို့ ပိုခက်ခဲလာတယ်လို့ သိရပါတယ်။

စစ်တပ်လက်အောက်ခံတပ်ဖြစ်တဲ့ ရှမ်းနီအမျိုးသားများတပ်မတော် SNA တပ်ဟာ မိုးညှင်းမြို့အဝင်ထွက်နဲ့ မြို့တွင်းလက်ဖက်ရည်ဆိုင်၊ wifi၊ ဘိလိယက်ခုံမှာရှိနေတဲ့ လူငယ်တွေကို တပ်သားသစ်အဖြစ်ဖမ်းဆီးတာအပြင် ခုနောက်ပိုင်း လယ်တောအပြန်တောလမ်းတွေမှာလည်း အလစ်အငိုက်စောင့်ပြီး ဖမ်းဆီးတာ‌တွေလုပ်လာတယ်လို့ မိုးညှင်းဒေသခံအမျိုးသားတစ်ဦး KNG ကို ပြောပါတယ်။

“အခုက မိန်းကလေးတွေလည်းမနေရ အကုန်တွေ့ရာဆွဲနေတာ။ပြီးရင် ခုက မြို့ထဲတင်ဖမ်းတာမကဘူးနော်။ လူငယ်တွေကို လယ်တောကအပြန် အလစ်အငိုက်စောင့်ဖမ်းခေါ်တာလုပ်နေတာ။မိုးညှင်းဗောဓိကုန်းက လူငယ်လေးကို လယ်လုပ်ပြီးအိမ်အပြန်လမ်းကနေခေါ်သွားတာ မိဘတွေက စုံစမ်းပြီးလိုက်တယ် မပေးဘူး။ ခုပိုကြမ်းလာတယ် လယ်သွားဖို့လာဖို့ အရမ်းခက်လာတယ်ဗျ”လို့ ပြောပါတယ်။

ဒါ့အပြင် ပြီးခဲ့တဲ့ ဇူလိုင်လမှာဆိုရင် မိုးညှင်းမြို့နယ်ရှိ ပင်းဟဲကျေးရွာ၊ အင်ကြင်းကုန်းကျေးရွာအနီးပတ်ဝန်းကျင်ရှိ လယ်ယာတဲမှာ လယ်လုပ်နေတဲ့ လူငယ်တစ်ချို့လည်း ဖမ်းခံရတယ်လို့ သူကဆိုပါတယ်။

အလားတူ နန်းခွင်ရွာက အသက်မပြည့်သေးတဲ့ ကလေးငယ် ၂ ဦးလည်း SNA တပ်က ဖမ်းဆီးသွားတယ်လို့ သိရပါတယ်။

“နန်းခွင်က ကလေးနှစ်ယောက် ဟိုအရင်နေ့က ဗွန်တုံးလုံးရွာမှာ SNA အဖွဲ့က ဆွဲခေါ်သွားတာ။ အသက်မပြည့် သေးဘူးလို့ သွားပြောလည်း မလွတ်ပေးတော့ဘူး။ သင်တန်းပို့လိုက်ပီလို့ပြောပီးပြန်လွှတ်လိုက်တာ်သူ့အမေတွေကို”လို့ နန်းခွင် ဒေသခံအမျိုးသမီးတစ်ဦးပြောပါတယ်။

ခုလို လူငယ်၊လူလတ်ပိုင်း‌တွေကို လယ်ယာအခင်းမကျန် ဖမ်းဆီး‌လာတာကြောင့် လယ်ယာလုပ်ကိုင်တဲ့ ဒေသခံတောင်သူတွေဟာ သက်ကြီးရွယ်အိုတွေသာ လုပ်နေရတယ်လို့ ဆိုပါတယ်။

မိုးညှင်းမြို့နယ်ရှိ အင်းတော်ကြီးဒေသမှာ SNA နဲ့ KPDF တို့အကြား ပြီးခဲ့တဲ့ ၂၀၂၄ ခုနှစ် နိုဝင်ဘာလဝန်းကျင်ကစပြီး နှစ်ဖက်တိုက်ပွဲများ မကြာခဏဖြစ်လာပြီးနောက် စစ်တပ်လက်အောက်ခံ SNA တပ်က တပ်သားလိုအပ်ချက် အကြောင်းပြုပြီး မိုးညှင်းမြို့အပြင်ကျေးလက်မကျန် အတင်းအဓမ္မလူသစ်စုဆောင်းပေါ်တာဆွဲတာ လုပ်ဆောင်နေတာဖြစ်ပါတယ်။

ဖမ်းဆီးရမိတဲ့လူငယ်တွေကို မိုးကောင်းမြို့နယ်၊ ပင်းဘောကျေးရွာရှိကညင်မြိုင် စစ်လေ့ကျင့်ရေးကျောင်းနှင့် မြစ်ကြီးနားမြို့နယ်ရှိ နမ္မတီးစစ်လေ့ကျင့်ရေးသင်တန်းကျောင်းသို့ အသုတ်လိုက်ခွဲပို့ကာ စစ်သင်တန်းပို့ချပေးနေတာဖြစ်ပါတယ်။

ဩဂုတ် ၁၈ ရက် မနက်ပိုင်း စစ်သားစုဆောင်းခံရတဲ့ လူငယ် တွေတင်ဆောင်လာတဲ့ယာဉ်တန်း ညှင်းမြို့ကနေထွက်ခွာလာချိန် နန်းမားအဝင်မှာKPDF မှ ကြားဖြတ်တိုက်ခိုက်ခဲ့ရာ ယာဉ်ပေါ်မှာ တာဝန်နှင့်လိုက်ပါလာတဲ့ အမှတ် ၁၅ တပ်ရင်းတပ်ကြပ်ကြီး၂ ဦးပွဲချင်းပီးသေဆုံးခဲ့ပြီး စုဆောင်းရေးဆွဲခံလာရတဲ့လူငယ်တွေကိုတော့ KPDF ကထိန်းသိမ်းဖို့ခေါ်သွားတယ်လို့သိရပါတယ်။

မိုးညှင်း၊ မိုးကောင်းနယ် ဒေသခံပြည်သူတွေဟာ လယ်ယာလုပ်ငန်းကို အဓိကလုပ်ကိုင်ပြီး အသက်မွေးဝမ်းကျောင်းပြုကြတာဖြစ်ပါတယ်။

သို့သော် တစ်နေ့ထက်တစ်နေ့ တပ်သားစုဆောင်းတာအပြင် စစ်ရေးနဲ့အဖက်ဖက်ကခက်ခဲမှုတွေကြောင့် ဒေသခံပြည်သူတွေဟာ လယ်ယာလုပ်ငန်း‌‌ကို ယခင်ကဲ့သို့ လုပ်ကိုင်နိုင်ဖို့ အင်မတန်ခက်ခဲလာတယ်လို့ ဆိုကြပါတယ်။

By – Zami