ကားမိုင်း – နန့်ယား ဖားကန့်လမ်းတစ်လျှောက်ကို စစ်ကောင်စီတပ် ၁၀ ရက်ကျော်အတွင်းမှာပဲ စစ်ကြောင်း ၂ ကြောင်းထိုးတက်လာပြီး ဖားကန့်မြို့အဝင် ယမ်းချက်စက်ရုံနဲ့ လုံးခင်းကျေးရွာအထိ လမ်းကြောင်းအားလုံးကို စစ်တပ်ကနေရာယူထားတယ်လို့ သိရပါတယ်။

ဩဂုတ်လ ဆန်းပိုင်းမှာ စစ်အင်အား ၃၀၀ နဲ့ ၅၀၀ ကြားရှိတဲ့ တစ်ကြောင်း၊ ဩဂုတ်လ ၁၅ ရက်နေ့ နောက်ပိုင်း စစ်အင်အား ၃၀၀ ဝန်းကျင်လောက်ရှိတဲ့ တစ်ကြောင်း ၊ ရာနဲ့ချီ ရှိတဲ့ စစ်ကြောင်း နှစ်ခုရဲ့ စစ်အင်အားတွေ ကားမိုင်းကနေ ဖားကန့်မြို့အဝင် လမ်းပိုင်း အားလုံးကို စစ်အင်အားချထားတယ်လို့ ဖားကန့်ဒေသခံတွေပြောပါတယ်။

“ဒီဖားကန့်လမ်း တစ်ကြောမှာ KIA ရဲ့ ဂိတ်နေရာ တစ်ခုမှမရှိတော့ဘူး။ တစ်ရက်ကပဲ ဖားကန့်ကို တက်လာတာ လမ်းတစ်လျှောက်ရှိနေကြတယ်။ နန့်ယားမှာလည်း အများကြီးရှိနေတယ်။ ပြောရမယ်ဆိုရင် လဝါးကနေ လုံးခင်းကျေးရွာအထိ အင်အားချထားတယ်လို့ ပြောလို့ရတယ်။ အခုလည်း နောက်တစ်ကြောင်း တက်လာသေးတယ်။ အခု တက်လာတဲ့ စစ်ကြောင်းတွေ အဖွဲ့လိုက်ရှိတဲ့ နေရာတွေက မအူပင် ရေကာတာနားမှာ၊ ပြီးရင် နန့်ယားကျေးရွာမှာ ရှိနေကြတယ်။ ကျန်တဲ့ နေရာတွေမှာက တစ်စု ပြီးတစ်စု တစ်လမ်းလုံးရှိနေကြတယ်”လို့ ဖားကန့် ကို တက်သွားတဲ့ ဒေသခံအမျိုးသားတစ်ဦးက ပြောပြပါတယ်။

စစ်ကြောင်းထိုးနေတဲ့ စစ်ကောင်စီတပ်တွေက ကားမိုင်းကနေ နန့်ယား၊ ဆိုင်ဖရာ၊ ခွန်စိုင်ဇွပ်၊ တံတားညီနောင်၊ ပျားအုံး၊ ကပ်မှော်၊ နန့်တိန့် နဲ့ ဖားကန့်မြို့အဝင် ယမ်းချက်စက်ရုံ၊ လယ်ပြင်၊ လုံးခင်းကျေးရွာအထိ စစ်ကြောင်းတပ်ဖြန့်ချထားတယ်လို့ ပြောပါတယ်။

ဩဂုတ်လဆန်းပိုင်းမှာ စစ်အင်အား ၃၀၀ နဲ့ ၅၀၀ တက်လာတဲ့ စစ်ကြောင်းတွေက ဖားကန့်ဒေသထဲကို တိတယအကြိမ်တက်လာတဲ့ စစ်ကြောင်းတွေဖြစ်ပြီးတော့ အဲဒီစစ်ကြောင်းတွေက လက်ရှိ နန့်ယားကျေးရွာမှာ နေရာယူထားကြသလို စစ်ကြောင်းချို့က ဖားကန့် ဘက်ကို တက်သွားကြတာဖြစ်ပါတယ်။

နောက်ထပ် ဩဂုတ်လ ၁၅ ရက်နေ့နောက်ပိုင်းတက်လာတဲ့ စစ်ကြောင်းတွေက ဖားကန့်ဒေသထဲကို လေးကြိမ်မြောက် တက်လာတဲ့ စစ်ကြောင်းတွေဖြစ်ပြီးတော့ အဲဒီကြောင်းတွေက နန့်ယားကျေးရွာမှာ ထပ်မံ အင်အားဖြည့်တင်းတာတွေရှိသလို ဖားကန့်သွားလမ်းပေါ်မှာရှိတဲ့ ကျေးရွာတွေမှာ ဝင်ရောက်တပ်စွဲနေရာယူထားတယ်လို့လည်း သိရပါတယ်။

ဖားကန့်လမ်းကို စစ်ကြောင်းတက်လာကြတဲ့ စစ်ကောင်စီတပ် စစ်ကြောင်းတွေက စစ်အင်အားတစ်ချို့ နဲ့ လက်နက်ပစ္စည်း၊ စစ်ရိက္ခာတွေကို ၁၂ ဘီကားမှာ တင်ဆောင်ပြီးတော့ ဖားကန့် လမ်းအတိုင်း တက်လာကြပြီးတော့ အင်းအားအများပိုင်းက ခြေလျင်နဲ့ တက်လာကြတာလို့ သတင်းအရင်းအမြစ်တွေပြောပါတယ်။

တတိယအကြိမ် စစ်ကြောင်းတက်လာချိန် ကားမိုင်းအနီး မအူပင်ကျေးရွာအထက်ပိုင်းနဲ့ နန့်ယားကျေးရွာအထိ ကချင်လွတ်လပ်ရေးတပ်မတော် KIA နဲ့ တော်လှန်ရေးတပ်ဖွဲ့တွေ လမ်းပိုင်း ခုခံတိုက်ခိုက်တာတွေရှိခဲ့လို ထိတွေ့တိုက်ပွဲအနည်းငယ်ဖြစ်ပွားခဲ့ပါတယ်။

အဲ့ဒီ တတိယအကြိမ်တက်လာတဲ့ စစ်ကြောင်းတွေက ဖားကန့်လမ်းကို ထိန်းချုပ်လိုက်တဲ့အတွက် နောက်ထပ် လေးကြိမ်းမြောက် တက်လာတဲ့ စစ်ကြောင်းတွေက တိုက်ပွဲဖြစ်ပွားခြင်းမရှိဘဲ နန့်ယား၊ ဆိုင်းဖရာ စတဲ့ ကျေးရွာတွေကို ရောက်ရှိသွားနိုင်ခဲ့တာဖြစ်ပါတယ်။

အခုလို ဖားကန့်ဒေသထဲကို ဩဂုတ်လ ၁၀ ရက်ကျော်အတွင်း စစ်အင်အား ၇၀၀ နဲ့ ၈၀၀ ကြားရှိတဲ့ စစ်ကြောင်း တပြိုင်နက် ထိုးတက်လာတဲ့အပေါ်မှာ စစ်တပ်က ဖားကန့်မှာ ရွေးကောက်ပွဲကျင်းပနိုင်ဖို့ အခုကတည်းကနေ စစ်အင်အားတိုးချဲ့ပြီး နေရာရယူလာတဲ့ သဘောမှာမြင်တွေ့ရတယ်လို့ နောက် ဖားကန့်ဒေသခံ အမျိုးသားတစ်ဦးက အခုလိုသုံးသပ်ထားပါတယ်။

“စစ်တပ်လုပ်မယ့် ရွေးကောက်ပွဲလုပ်မယ် ဒီအတွက်နဲ့ ပြီးရင် စစ်အင်အားထပ်ဖြည့်နေတယ်လို့ပဲမြင်ပါတယ်။ သူတို့ ရွေးကောက်ပွဲလုပ်မယ့် ကော်မရှင်အဖွဲ့ဝင်တွေ၊ ကော်မတီအဖွဲ့ဝင်တွေနဲ့ သက်ဆိုင်ရာ ဌာနဆိုင်ရာတွေကို လုံခြုံရေးယူပေးဖို့ ကာကွယ်ပေးနိုင်ရေးအတွက် အင်အားအများအပြားလိုအပ်နေလို့ တိုးချဲ့နေတယ်လို့ပြောချင်ပါတယ်။ အဓိကတော့ ဖားကန့်မြို့ပေါ် မှာ လုံခြုံရေးယူပြီးတော့ ရွေးကောက်ပွဲကို ရအောင်လုပ်မယ်ပေါ့။ ပြည်သူလူထုအနေနဲ့တော့ မဲထည့်မယ် မထည့်ဘူးဆိုတာ တစ်ပိုင်းဖြစ်သွားပြီ။ စစ်တပ်အနေနဲ့တော့ ထည့်ရင်ရပြီဆိုတဲ့သဘောရှိနေတယ်”လို့ပြောပါတယ်။

ဖားကန့်မြို့နယ်မှာ ရွေးကောက်ပွဲ ကျင်းပနိုင်ဖို့ရန်အတွက် လူဝင်မှုကြီးကြပ်ရေးဌာန (လဝက) ၊ စီမံကိန်းဌာန၊ ပြန်ဆက်ဌာန ၊ ထွေအုပ်နဲ့ ကျောင်းအုပ်အဖွဲ့တွေကို မြစ်ကြီးနားမြို့မှာ ရွေးကောက်ပွဲဆိုင်ရာ သင်တန်းပို့ချရေးတွေလည်း စစ်ကောင်စီက ဖော်ဆောင်ပေးနေပြီလို့လည်း စုံစမ်းသိရှိရပါတယ်။

ဒါကြောင့် စစ်ကောင်စီတပ်ဟာ လုံခြုံရေးအတွက် လိုအပ်နေတဲ့ စစ်အင်အားတွေကို တစ်ကြောင်းပြီး တစ်ကြောင်း တပြိုင်နက် စစ်ကြောင်းထိုးတက်နေတာဖြစ်တယ်လို့ ဖားကန့်ဒေသခံတွေပြောပါတယ်။

ပြီးခဲ့တဲ့ ဧပြီလ နဲ့ ဇူလိုင်လအတွင်းမှာ စစ်ကြောင်းထိုးလာတဲ့ စစ်ကြောင်းတွေက ဖားကန့် ဒေသထဲက မှော်ဆီစာ၊ ဆွတ်ဘွမ့်(အမှိုက်ပုံ) မော်မောလယန်၊ မှော်ဝမ်းကလေး၊ မှော်ဝမ်းကြီး စတဲ့ ကျေးရွာတွေမှာ တပ်စွဲနေရာယူထားကြတာဖြစ်ပါတယ်။

ယခုပြန်ပြီး တက်လာကြတဲ့ စစ်ကြောင်းတွေက အဓိကအားဖြင့် ဖားကန့် လမ်းပိုင်းကို ထိန်းချုပ်ဖို့ ဖြစ်တယ်လို့လည်း စစ်ရေးသတင်းအရင်းအမြစ်တွေပြောပြပါတယ်။

ကားမိုင်း – နန့်ယားဖားကန့်လမ်းပိုင်းမှာ စစ်ကောင်စီတပ်ဖွဲ့တွေ လမ်းကြောင်းတစ်လျှောက် နေရာယူထားတာကြောင့် ခရီးသွားလာတဲ့ ပြည်သူတွေကိုလည်း စစ်ရေးဆေးတင်းကြပ်ထားပြီး မအူပင်အထက် ကျောက်ထု၊ နန့်ယား၊ နန့်တိန့်၊ ယမ်းချက်စက်ရုံ၊ လယ်ပြင်ဂိတ် စတဲ့ နေရာတွေမှာ အမည်၊ ကားနံပါတ်၊ မှတ်ပုံတင်ကပ်ပြား အဆင့်ဆင့် စစ်ဆေးရေးတင်းကြပ်ထားတယ်လို့လည်း သိရပါတယ်။

By – နော်ထွယ့်(ဟူးကောင့်)