သျှမ်းပြည်အရှေ့ပိုင်း၊ ကျိုင်းတုံမြို့နယ်တွင် ခိုးဆိုးလုယက်မှု ပိုများလာသောကြောင့် ဒေသခံများ သွားလာရန်အတွက် စိုးရိမ်ပူပန်နေကြောင်း သတင်းရရှိသည်။

ယမန်နေ့ (ဇွန်လ ၂ ရက်)တွင် ကျိုင်းတုံမြို့နယ် ပန်ဆံကျကျေးရွာ အဝင်တွင် အမျိုးသမီးတစ်ဉီးကို အမည်မသိ အမျိုးသားမှ ဓားဖြင့်ခုတ်၍ ဆိုင်ကယ်လုယက်သွားသည့်အပြင်၊ ကတ်ဖကျေးရွာအုပ်စု ယမ်းလှကျေးရွာအနီးတွင်လည်း အမျိုးသမီးတစ်ဦးကို အမျိုးသားတစ်ဉီးက လက်သီးဖြင့် ထိုးကာ ဆိုင်ကယ်လုယက်သွားခဲ့ကြောင်း ဖြစ်စဉ်သိရှိသူ ကျိုင်းတုံဒေသခံများက ပြောသည်။

ထိုကဲ့သို့ လုယက်ခံရမှု များလာခြင်းသည် မူးယစ်ဆေးသုံးစွဲသူများ၏ လက်ချက်ဖြစ်နိုင်ကြောင်း၊ နိုင်ငံရေး မတည်ငြိမ်ခြင်း၊ စီးပွားရေး ယိုယွင်းလာခြင်းတို့ကြောင့် ခိုးဆိုးလုယက်မှု ပိုများလာကြောင်းလည်း ကျိုင်းတုံဒေသခံ အမျိုးသားတစ်ဉီးက သျှမ်းသံတော်ဆင့်ကို ပြောသည်။

“ခေတ်စနစ်ကလည်း ကောင်းတာ မဟုတ်ဘူး၊ ဆေးသမားတွေကလည်း ပိုပြီးများလာတာ။ စီးပွားရေးကလည်း သိတဲ့အတိုင်း ပျက်ပြားလာနေတာ။ ဒီလို လုယက်မှု ခိုးမှုတွေက ပိုတိုးလာတယ်၊ ညနေပိုင်းဆိုရင် တစ်ယောက်တည်း အပြင်မထွက်ရဲဘူး။ ယမ်းလှဘက်တို့ ပန်ဆံကျ တို့ဘက်မှာလည်း ဆိုင်ကယ်လုခံရတယ် ကြားတယ်” ဟု ကျိုင်းတုံဒေသခံ ၎င်းအမျိုးသားက ပြောသည်။

ထို့အပြင် ကျိုင်းတုံမြို့ဒေသခံများလည်း ည ၈ နာရီနောက်ပိုင်း အိမ်ပြင်မထွက်ရဲကြသကဲ့သို့ မိမိနေထိုင်သည့် ကျေးရွာ၊ ရပ်ကွက်များထဲလည်း သူစိမ်းလူများကို ဝင်ရောက်တည်းခိုခွင့် မပြုဘဲ တားမြစ်ထားရကြောင်း ၎င်းက ဆက်ပြောသည်။

ယခုရက်ပိုင်းတွင် ကျိုင်းတုံမြို့နယ်အတွင်း စစ်ကောင်စီဘက်ကလည်း အပတ်စဉ် (၁၅) ပြည်သူ့စစ်မှုထမ်း ခေါ်ယူရန်အတွက် စည်းရုံးရေး ဆင်းနေကြောင်း ဒေသခံများထံမှ သိရသည်။

“ကျနော်တို့ဘက်တော့ စစ်မှုထမ်းခေါ်တာ တစ်ရွာနဲ့ တစ်ရွာ မတူဘူး။ ကျနော်တို့ရွာကျတော့ မဲမနိုက်ရဘူး၊ အုပ်ချုပ်ရေးမှူးနဲ့ ညှိနှိုင်းပြီး လူငှားထည့်တာ။ ခုတော့ လူစားငှားထည့်တာ ဈေးကြီးလာပြီ ကျပ်သိန်း(၈၀)ကျော်ပေးပြီး ခေါ်နေရတယ်။ တစ်ရွာမှာ အိမ်ခြေတစ်ရာဆိုရင် တစ်အိမ် ကျပ်(၈၀၀၀)ပေါ့”ဟု အုပ်ချုပ်ရေးမှူးနှင့် နီးစပ်သူတစ်ဦးက ပြောသည်။

ကျိုင်းတုံမြို့နယ်ရှိ ကျေးရွာအများစုတွင် လူငယ်များသည် ပြည်ပထွက် အလုပ်လုပ်နေသူများနှင့် ရပ်ဝေးတွင် အိမ်ထောင်ကျနေသူ များပြီး စစ်မှုထမ်းခေါ်သည့် အချိန်တွင် အိမ်ထောင်စုဇယားထဲ၌သာ နာမည်ကျန်ရှိခြင်းကြောင့် မည်ကဲ့သို့ ဖြေရှင်းရမည်ကို တွေးပူမိကြောင်း ဆက်ပြောသည်။

“အိမ်ထောင်စုထဲပဲ နာမည်ရှိတော့တာ၊ စစ်မှုထမ်းသာ ခေါ်လာရင် ဘယ်လိုလုပ်ရမလဲ မသိဘူး။ လူစားရှာထည့်ဖို့ သိန်း(၈၀)ကလည်း မတတ်နိုင်ဘူး ဈေးကြီးတယ်လေ။ ဥပဒေက တစ်မျိုး၊ လုပ်တာက တစ်မျိုးနဲ့ ဆိုတော့ ပြည်သူတွေ ပိုခက်တာပေါ့”ဟု ကျိုင်းတုံဒေသခံ အမျိုးသမီးတစ်ဦးက ပြောဆိုသည်။

ထို့အပြင် ကျိုင်းတုံမြို့နယ်တွင် လိုင်စင်မဲ့ယာဉ်များကို စစ်ကောင်စီလက်အောက်ခံ ယာဉ်ထိန်းရဲများမှ အတင်းအကြပ် ဖမ်းဆီးနေမှုကြောင့် ကုန်သွယ်ရေးလုပ်ငန်းများနှင့် စီးပွားရေးလုပ်ငန်းများ ပိုမိုခက်ခဲလာပြီး တွဲကားများလည်း ကျိုင်းတုံမြို့ဘက်သို့ ဖြတ်သန်းလာခြင်း မရှိတော့ကြောင်း သိရသည်။

The post ကျိုင်းတုံတွင် ခိုးဆိုးလုယက်မှု ပိုများလာသောကြောင့် ဒေသခံများ သွားလာရေးခက်ခဲနေ appeared first on သျှမ်းသံတော်ဆင့်.