သျှမ်းပြည်တောင်ပိုင်း၊ ညောင်ရွှေမြို့နယ် အင်းလေးကန် မတိမ်ကောရန် နုန်းမြေများရှင်းလင်းရန် ဒေသအလိုက် ပူးပေါင်းဆောင်ရွက်ရန် လိုအပ်ကြောင်း အင်းလေး လူငယ်များထံမှ သိရသည်။

ယမန် ( ဩဂုတ်လ ၁၉) ရက်တွင် အင်းလေးလူငယ်များသည် အင်းလေးကန်အတွင်း ရေကျဆင်းစေရန် ကျွန်းမျှောများ ဖယ်ရှားမှု လုပ်ဆောင်ခဲ့ပြီး အင်းလေးကန်၏ သဲနုန်းများကိုမှုဖယ်ရှားနိုင်ခြင်းမရှိသေးကြောင်း ဒေသခံ လူငယ်များက သိရသည်။

အင်းလေးကန် ထိန်းသိမ်းဆောင်ရွက်မှုများ လိုအပ်နေပြီး မိုးအနည်းငယ် ရွာလျှင်ပင် ရေများ တက်လာခြင်း အင်းလေးကန်အတွင်း ငါးရှားပါးလာခြင်း စသည်တို့ကို ကြုံတွေ့နေရကြောင်း အသက် ၃၀ ဝန်းကျင်ရှိ ကိုမောင်က သျှမ်းသံတော်ဆင့်ကို ပြောသည်။

“ကျွန်းမျှော အသေးလေးတွေကို ရှင်းလင်းဖြစ်တယ်။ နှစ်တိုင်းပွားများလာတာ။ ရေထွက်တဲ့ ချောင်းတွေမှာ ပိတ်တာမျိုးရှိတယ်။ သွားရလာရ ခက်ခဲစေတယ်။ အင်းလေးကန်ထဲက သဲနုန်းတွေများလာတော့ မိုးနဲနဲရွာရင် ရေကတက်လာပြီ။ မထိန်းသိမ်းနိုင်ရင်တော့ အင်းလေးကန် တိမ်ကော ပျောက်ကွယ်မှာ စိုးရိမ်မိတယ်။”ဟု ၎င်း ဒေသခံ အမျိုးသားတစ်ဦးက ပြောသည်။

ထို့အပြင် အင်းလေးကန်အတွင်း ရွှံ့မြေများ သဲနုန်းများစီးဝင်လာပြီး မြေထုထည် ၃ ပေနီးပါး မြင့်တက်လာသောကြောင့် မိုးရွာတိုင်း ရေကြီးရေမြုပ်မှုများ ကြုံတွေ့နေရသည်။

အင်းလေးကန်အတွင်း ဆည်မြောင်းဦးစီးဌာနမှ မြေစုတ်စက် အဟောင်းဖြင့်သာ လာရောက်စုတ်ယူပေးနေသော်လည်း အင်းလေးကန် မြေထုထည် မြင့်မားလာမှုကို မလျော့ချနိုင်ပဲ ပို၍ မြေထုထည် ကြီးမားလာရပြီး နိုင်ငံတော်စီမံကိန်းအနေဖြင့် အင်းလေးဒေသကို ထိန်းသိမ်းဆောင်ရွက်ရန် လိုအပ်ကြောင်း ပြောသည်။

ယခုလက်ရှိ အင်းလေးဒေသတွင် ရေမြင့်တက်နေပြီး နေအိမ်ရှိ ပစ္စည်းများကို အပေါ်ထပ်သို့ ပြောင်းရွှေ့ထားရကြောင်းနှင့် စိုက်ခင်းသီးနှံများလည်း ရေမြုပ်ပျက်စီးသွားကြောင်း အင်းလေးဒေသခံ လူငယ်အမျိုးသားက ပြောသည်။

“ အင်းလေးမှာက အခု ရေက အတက်လိုက်ပဲ ။ကျနေတယ်ဆိုတာ မရှိဘူး။ အိမ်တွေရေအရမ်းမြုပ်နေတာ မဟုတ်ပေမဲ့ အောက်ထပ်က ပစ္စည်းတွေ အပေါ်ထပ်ရွှေ့ထားရတယ်။ အခုက တစ်ပေလောက် မြင့်လာတယ်။မနှစ်ကလောက်တော့ ဆိုးဆိုးရွားရွားတော့ မမြုပ်သေးလို့ တော်သေးတယ်။”ဟု ၎င်းအမျိုးသားက ပြောသည်။

ဆက်လက်ပြီး အင်းလေးဒေသ အနီးတွင်ရှိသည့် တောင်ကြီး ဟိုပုံး၊ ကလော အောင်ပန်း စသည့် ဒေသခံများသည်လည်း ရွှေ့ပြောင်းတောင်ယာများ လုပ်ဆောင်မှု လျော့ချပြီး သစ်တော ပြန်လည်ထိန်းသိမ်း ထားနိုင်လျှင် အင်းလေးဒေသ ပြန်လည်ကောင်းမွန်လာစေရန် တစ်စိတ်ဒေသ အနေဖြင့် ပါဝင်ကြောင်း တိုက်တွန်း ပြောဆိုသည်။

ပြီးခဲ့သည့် ၂၀၂၄ ခုနှစ် စက်တင်ဘာလတွင် အင်းလေးကန်၌ နှစ် ၅၀ အတွင်း ရေကြီးရေလျှံမှုဖြစ်ပွားခဲ့ပြီး နေအိမ်များ ပျက်စီးကာ ဒေသခံ အများပြား ရေဘေးသင့်ခဲ့ရသည်။

အင်းလေး ဒေသတွင် ငလျင်ဘေးနှင့် ရေဘေးဒဏ်သင့် နေသည့် ကြားမှ လာမည့် စက်တင်ဘာလ ၂၂ ရက်နေ့မှ အောက်တိုဘာလ ၉ ရက်နေ့အထိ အင်းလေး ဖောင်တော်ဦးဘုရားပွဲ ကျင်းပပြုလုပ်သွားမည်ဖြစ်ကြောင်း သိရသည်။

The post အင်းလေးကန် မတိမ်ကော ရန် ပူးပေါင်းဆောင်ရွက်ရန်လိုအပ် appeared first on သျှမ်းသံတော်ဆင့်.