သျှမ်းပြည် တောင်ပိုင်းရှိ ဒေသခံများကို စစ်ကော်မရှင် လက်အောက်ခံများက တအာင်းတပ် TNLA နှင့် ကိုးကန့်တပ် MNDAA တို့ကို ဆန့်ကျင်ကြောင်း ဆန္ဒပြခိုင်းခြင်းသည် အိမ်ကြက်အချင်းချင်း အထင်မှားပြီး ခွပ်အောင် အိုးမဲသုတ်ပေးသကဲ့သို့ တိုင်းရင်းသား အချင်းချင်းအထင်မှားပြီး ရန်ပွားအောင် သွေးခွဲရန်တိုက်ပေးနေခြင်း ဖြစ်သည်။

ညီနောင်မဟာမိတ်တပ်ဖွဲ့များ ဖြစ်သည့် တအာင်းတပ် TNLA နှင့် ကိုးကန့်တပ် MNDAA တို့ကို ဆန့်ကျင် ဆန္ဒပြရန် သျှမ်းပြည် တောင်းပိုင်းရှိ ဒေသခံများကို စစ်ကော်မရှင် လက်အောက်ခံများက အတင်းအကြပ် ခေါ်ယူပြီး ဆန္ဒပြခိုင်းခဲ့ခြင်း ဖြစ်ကြောင်း မြို့ခံများက ပြောသည်။

အဆိုပါ ဆန္ဒပြပွဲကို သြဂုတ် ၁၉ ရက်တွင် သျှမ်းပြည် မြို့တော် တောင်ကြီးမြို့နှင့် နမ့်စန်မြို့တွင် လည်းကောင်း၊ သြဂုတ် ၁၈ ရက်တွင် သျှမ်းပြည်တောင်ပိုင်း မိုးနဲမြို့၊ မိုင်းပန်မြို့နှင့် ကွန်ဟိန်းမြို့တွင် လည်းကောင်း ပြုလုပ်ခဲ့ခြင်း ဖြစ်သည်။

ထိုအကြောင်းအရာကို စစ်ကောင်စီဝါဒဖြန့် တယ်လီဂရမ် ချန်နယ်များက ကျယ်ကျယ်ပြန့်ပြန့် ဝါဒဖြန့်ချိထားပြီး “ရှမ်းပြည်သူလူထု အေးချမ်းစွာ နေထိုင်ရေး TNLA၊ MNDAA ရှမ်းဒေသမှ အမြန်ဆုံး ထွက်ခွာပေး”၊ “MNDAA နှင့် ပူးပေါင်းအဖွဲ့များ၏ အကြမ်းဖက်မှု ချက်ချင်းရပ်”၊ “TNLA အကြမ်းဖက်သမားများ ထွက်ခွာပေး ပြည်သူလူထုငြိမ်းရေး” စသည့် ဆိုင်းဘုတ်များ ကိုင်ဆောင်ကာ မြို့ပေါ် စီတန်းလှည့်လည်ခဲ့ကြောင်း ရေးသားဖော်ပြထားသည်။

ထိုဆန္ဒပြပွဲတွင် စစ်ကော်ရှင်လက်အောက်ခံ ဝန်ထမ်းများ၊ ပြည်ထောင်စုကြံ့ခိုင်းရေးနှင့် ဖွံ့ဖြိုးရေး (USDP) ပါတီဝင်များလည်း စီတန်းလှည့်လည် ဆန္ဒထုတ်ဖော်ရာတွင် ပါဝင်ခဲ့ပြီး ရဲတပ်ဖွဲ့များ လုံခြုံရေး ရယူပေးခဲ့ကြောင်း မြို့ခံများက ပြောသည်။

သို့သော် ပြည်သူများသည် မိမိဆန္ဒအလျှောက် ဆန္ဒပြထုတ်ဖော်ခြင်း မဟုတ်ဘဲ အများစုမှာ စစ်တပ်ထောက်ခံသူများ၊ မဘသများကို နေ့စားခနှင့် ထမင်းထုပ်များပေးကာ ပြည်နယ်ဘောလုံးကွင်းမှတဆင့် စူဠာမုဏိစေတီအထိ လူအင်အား (၃၀၀) ကျော်ဖြင့် နာရီဝက်ခန့် လမ်းလျှောက်ဆန္ဒပြခိုင်းခဲ့ခြင်း ဖြစ်ကြောင်း တောင်ကြီးမြို့ဒေသခံတစ်ဦးက သျှမ်းသံတော်ဆင့်ကို ပြောသည်။

“မဘသနဲ့ စစ်တပ်ထောက်ခံသူတွေ လုပ်ကြတာ၊ အေးသာယာနဲ့ စိန်ပန်း ရွှေတောင်ဘက်က လူတွေပါ။ ခေါ်သလောက် လူမလာလို့ သူတို့ရုံးဝန်ထမ်းတွေကို အလံပေးပြီး လမ်းလျှောက်ခိုင်းတာ။ MNDAAနဲ့ TNLAကို ပြတာတဲ့၊ သျှမ်းနဲ့ ရန်တိုက်တာပေါ့။ ပိုက်ဆံ ၆,၈၀၀ ကျပ်ပေးခေါ်တယ်လို့ ကြားတယ်။ သျှမ်းဝတ်စုံ ဝတ်ပြီး တက်ခိုင်းတယ်၊ သူတို့လုပ်နေကြတွေပါ” ဟု တောင်ကြီးမြို့ ဒေသခံတစ်ဦးက ပြောသည်။

စစ်ကော်မရှင်က တောင်ကြီးမြို့ပေါ် ဆန္ဒပြပွဲတွင် လူအင်အား နည်းပါးခြင်းကြောင့် ၎င်းလက်အောက်ခံ ဆည်မြောင်း၊ လွှတ်တော်ရုံးနှင့် စုပေါင်းရုံးတို့မှ ဌာနဆိုင်ရာများကို အလံနှင့် ဆိုင်းဘုတ်ပေးကာ ပါဝင်အားဖြည့်ခိုင်းပြီး လမ်းလျှောက်ဆန္ဒပြခိုင်းခဲ့ကြောင်း ဆိုသည်။

“ဆန္ဒပြတဲ့အထဲမှာ သျှမ်းပြည်ကနေ တအာင်းတပ်နဲ့ ကိုးကန့်တပ်တွေ ထွက်သွားဆိုတာပါတယ်။ အဓိကတော့ တအာင်းတပ်နဲ့ ကိုးကန့်တပ်က သျှမ်းပြည်ကို စစ်မက်ဖြစ်အောင် ဖန်တီးနေတာကို သျှမ်းပြည်တွေက လက်မခံလို့ ဆန္ဒပြထုတ်ဖော်နေတာလို့ သတင်းစကားပါးချင်တဲ့ ရည်ရွယ်ချက်နဲ့ လုပ်တာပါပဲ” ဟု တောင်ကြီးမြို့ဒေသခံတစ်ဦးက ဆက်ပြောသည်။

လူမျိုးရေး သွေးထိုးလှုံ့ဆော်မှု

စစ်ကော်မရှင်လက်အောက်ခံများက ဒေသခံများကို အတင်းအကြပ် ခေါ်ယူကာ ညီနောင်မဟာမိတ် တပ်များကို ဆန့်ကျင်ကြောင်း ဆန္ဒပြခိုင်းခြင်းသည် တိုင်းရင်းသား အချင်းချင်း အမြင်မှားအောင်၊ ပဋိက္ခဖြစ်အောင် ဖန်တီးနေခြင်းဟု သျှမ်းပြည်ပြန်လည် ထူထောင်ရေးကောင်စီ/ သျှမ်းပြည်တပ်မတော် (RCSS/SSA) အတွင်းရေးမှူး(၂) ဖြစ်သူ ဗိုလ်မှူးစိုင်းခမ်းစံက ပြောသည်။

“အဓိကတော့ သူတို့ဆန္ဒပြတာ သျှမ်းဝတ်စုံ ဝတ်ခိုင်းတယ်။ နောက် သျှမ်းအလံတွေ ထောင်ခိုင်းတယ်ဆိုတာ အဲ့ဒါပြောမယ်ဆိုရင် တိုင်းရင်းသားအချင်းချင်း အမြင်မှားအောင်၊ ပဋိပက္ခဖြစ်အောင် ဖန်တီးတယ်လို့ ကျနော်တို့ ယူဆတယ်လေ။ နောက်တစ်ခုက နိုင်ငံရေး အမြတ်ထုတ်တာပေါ့၊ ပြောမယ်ဆိုရင် ဒီတောင်ပိုင်းဒေသမှာ ဆန္ဒပြဖို့လည်း ဘာမှ မလိုဘူးလေ”ဟု RCSS ပြောရေးဆိုခွင့်လည်းဖြစ်သူ ဗိုလ်မှူးစိုင်းခမ်းစံက သျှမ်းသံတော်ဆင့်ကို ပြောသည်။

စစ်ကော်မရှင် လက်အောက်ခံများက RCSS/SSA ထိန်းချုပ်လှုပ်ရှားနေသည့် မြို့နယ်များမှ ကျေးရွာဒေသခံများကို အစည်းအဝေးဟုဆိုကာ ဖိအားပေးခေါ်ယူခဲ့ပြီး မြို့ထဲရောက်မှ ညီနောင်မဟာမိတ်တပ်များကို ဆန့်ကျင်ကြောင်း ဆိုင်းဘုတ်ဝေကာ ဆန္ဒပြခိုင်းခဲ့ခြင်း ဖြစ်ကြောင်း ဗိုလ်မှူးစိုင်းခမ်းစံက ပြောသည်။

မကြာသေးခင် နှစ်များအတွင်းက RCSS တပ်ဖွဲ့ကို မြောက်ပိုင်းမဟာမိတ်များဖြစ်သည့် SSPP တပ်ဖွဲ့နှင့် TNLA တပ်ဖွဲ့များ ပူးပေါင်းကာ ထိုးစစ်ဆင် တိုက်ခိုက်ခဲ့ချိန်တွင် အမျိုးသားစည်းလုံးညီညွတ်ရေးကို ရှေ့ရှု၍ သျှမ်းပြည်တွင်း အတူနေတိုင်းရင်းသားများကို အမုန်းတရား သွေးထိုးလှုံ့ဆော်ခြင်း မပြုလုပ်ခဲ့ကြောင်း သျှမ်းဘာသာဖြင့် RCSS ထုတ်ပြန်ချက်ထဲတွင် ရေးသားထားသည်။

ထိုကြောင့် သျှမ်းပြည်သူများအနေဖြင့်လည်း နိုင်ငံရေး အသိတရားရှိပြီး သတိထားရန်၊ အခိုင်းခံဘဝ မရောက်ရှိရန် နိုင်ငံရေးနိုးကြားဖို့လိုကြောင်း ဗိုလ်မှူးစိုင်းခမ်းစံက တိုက်တွန်းထားသည်။

စစ်ကော်မရှင်၏ လုပ်ရပ်များသည် ယခင်စစ်အာဏာရှင် အဆက်ဆက် ကျင့်သုံးခဲ့သည့် သွေးခွဲဖိနှိပ် အုပ်ချုပ်ရေးစနစ်များသာ ဖြစ်ကြောင်း သျှမ်းလူငယ်ကွန်ဂရက်က သြဂုတ် ၁၈ ရက်နေ့တွင် ထုတ်ပြန်သည်။

စစ်ကော်မရှင်၏ ဆန္ဒပြပွဲများသည် သျှမ်းပြည်ဌာနေလူမျိုးစု အချင်းချင်းကြား ပဋိပက္ခ ဖြစ်ပွါးစေရန် ရည်ရွယ်လုပ်ဆောင်နေသည်မှာ ထင်ရှားသည်ဟု သျှမ်းလူငယ်ကွန်ဂရက်၏ ထုတ်ပြန်ချက်တွင် ရေးသားဖော်ပြထားသည်။

စစ်ကော်မရှင်တွင် အားတက်သရော ပါဝင်နေကြသော သျှမ်းလူမျိုးအချို့သည်လည်း သျှမ်းပြည်သူတစ်ရပ်လုံး၏ သဘောဆန္ဒများကို လုံးဝ ကိုယ်စားမပြုဘဲ စစ်ကော်မရှင်၏ ဆိတ်ခေါင်းချိတ်၍ ခွေးသားရောင်းသကဲ့သို့ ကျင်းပသည့် ဆန္ဒပြပွဲများမှာ နိုင်ငံရေးအသုံးချခံများသာဖြစ်ပြီး ပြင်းပြင်းထန်ထန် ကန့်ကွက်ကြောင်း သျှမ်းလူငယ်ကွန်ဂရက်က ဆိုထားသည်။

ရွေးကောက်ပွဲနှင့် ဝါဒဖြန့်ချိရေး

နိုင်ငံ့အနှံ့ ဝိုင်းဝန်းတိုက်ခိုက်ခံရမည့်အရေးကို စိုးရိမ်နေရသည့် စစ်ကော်မရှင်သည် လာမည့် ဒီဇင်ဘာလ ၂၈ ရက်တွင် ရွေးကောက်ပွဲ အပိုင်း (၁) ကို စတင်ကျင်းပ ပြုလုပ်သွားမည် ဖြစ်ကြောင်း သြဂုတ် ၁၈ ရက်နေ့တွင် သတင်းထုတ်ပြန်ထားသည်။

စစ်ကော်မရှင်ဥက္ကဋ္ဌ မင်းအောင်လှိုင်သည် လာမည့် ဒီဇင်ဘာလနှင့် ၂၀၂၆ ဇန်နဝါရီလအတွင်း အပိုင်းလိုက် ခွဲပြီးကျင်းပရန် ပြင်ဆင်နေသော ရွေးကောက်ပွဲအတွက် တော်လှန်ရေးအင်အားစုများ သိမ်းပိုက်ထားသည့် မြို့များရနိုင်သမျှ ပြန်လည်ရရှိရေး ထိုးစစ်အရှိန်မြင့်တင်ရန် သြဂုတ် ၁၂ ရက်နေ့က အစည်အဝေးတွင် ညွှန်ကြားထားသည်။

ရွေးကောက်ပွဲမတိုင်မီ တိုင်းရင်းသားတော်လှန်ရေး လက်နက်ကိုင်အဖွဲ့များ (ERO)နှင့် အမျိုးသားညီညွတ်ရေး အစိုးရ (NUG) လက်အောက်ခံ ပြည်သူ့ကာကွယ်ရေးတပ်ဖွဲ့များ ထိန်းချုပ်စိုးမိုးထားသော မြို့နယ်များကို မြို့ပေါ်နေရာ အနည်းငယ်ကို သိမ်းပိုက်ရရှိသည်ဖြစ်စေ ရွေးကောက်ပွဲကျင်းပနိုင်မည့် မြို့နယ်အရေအတွက် ကိန်းဂဏန်း တိုးမြှင့်နိုင်သမျှ တိုးမြှင့်နိုင်ရေး ကြိုးပမ်းကြရန် ညွှန်ကြားခဲ့ခြင်း ဖြစ်သည်။

ရွေးကောက်ပွဲ ဥပဒေတွင် ဆန္ဒမဲပေးသူ မည်သည့် ရာခိုင်နှုန်းရှိမှ ရွေးကောက်ပွဲအောင်မည်ဟု သတ်မှတ်ပြဋ္ဌာန်းထားခြင်း မရှိကြောင်း၊ ၅၀ ရာခိုင်နှုန်းနှင့်အထက် ဆန္ဒမဲပေးနိုင်မည်ဆိုပါက လူထုအများစု၏ ဆန္ဒပါဝင်သည်ဟု သတ်မှတ်နိုင်မည်ဖြစ်ကြောင်း စစ်ကော်မရှင်ဥက္ကဋ္ဌ မင်းအောင်လှိုင်က ပြောကြားခဲ့သည်။

ထို့ပြင် နိုင်ငံ့ဝန်ထမ်းများနှင့် ပြည်သူလူထုတို့အား ဒလန်ဟုစွပ်စွဲ၍ သတ်ဖြတ်နေမှုများ ရွေးကောက်ပွဲ ကာလတွင် ပိုမိုဖြစ်ပေါ်လာနိုင်ကြောင်းလည်း ၎င်းက ပြောသည်။

စစ်ကော်မရှင်ဥက္ကဋ္ဌ မင်းအောင်လှိုင်သည် ရွေးကောက်ပွဲ မဲဆွယ်ကာလနှင့် ရွေးကောက်ပွဲများ အပိုင်းလိုက် ကျင်းပမည့်ကာလအတွင်း ရွေးကောက်ပွဲ ကျင်းပရန် သတ်မှတ်ထားသော မြို့နယ်များတွင် တော်လှန်ရေး အင်အားစုများ မနှောက်ယှက်နိုင်ရန် တန်ပြန် ထိုးစစ်ဆင်များ၊ လေကြောင်း တိုက်ခိုက်မှုများလည်း ပြုလုပ်လာနေသည်။

အထူးသဖြင့် တအာင်းတပ် TNLA ထိန်းချုပ်ထားသော သျှမ်းပြည်မြောက်ပိုင်း ကျောက်မဲ၊ သီပေါ၊ မိုးကုတ် စသည့် မြို့နယ်များကို တန်ပြန် ထိုးစစ်အပြင် လေကြောင်းဖြင့် မကြာခဏ ဆိုသလို ဗုံးကြဲတိုက်ခိုက် နေလျက်ရှိသည်။

ရွေးကောက်ပွဲ ကျင်းပရန် အချိန်နီးကပ်လာသည်နှင့်အမျှ စစ်ကော်မရှင်ဥက္ကဋ္ဌ မင်းအောင်လှိုင် ရွေးကောက်ပွဲ မအောင်မြင်မည်ကို စိုးရိမ်နေသည်။

ပြီးခဲ့သည့် သြဂုတ် ၁၂ ရက် အစည်းအဝေးတွင် “ရွေးကောက်ပွဲဖြစ်မြောက်မှု မရှိစေရေး ပြည်တွင်းပြည်ပမှ အဖျက်အမှောက် လုပ်ရပ်များ လုပ်ဆောင်လာမည့်သူများ၊ အဖွဲ့အစည်းများလည်း ရှိနိုင်မည် ဖြစ်ကြောင်း၊ ၎င်းတို့အနေဖြင့် ရွေးကောက်ပွဲ အောင်မြင်မှု မရှိစေရေး နည်းလမ်းပေါင်းစုံဖြင့် လုပ်ဆောင်လာနိုင်ကြောင်း” စစ်ကော်မရှင်ဥက္ကဋ္ဌ မင်းအောင်လှိုင်က ၎င်း၏ ကော်မရှင်အဖွဲ့ဝင်များကို အသိပေး ညွှန်ကြားခဲ့သည်။

နိုင်ငံတဝှမ်း မြို့နယ် ၃၃၀ အနက် ၂၆၇ မြို့နယ်တွင် ရွေးကောက်ပွဲ လုပ်မည်ဟု စစ်ကော်မရှင် လက်အောက်ခံ ရွေးကောက်ပွဲကော်မရှင်က အစောပိုင်းက ပြောကြားခဲ့သော်လည်း မြို့နယ်စာရင်းကို တရားဝင် ထုတ်ပြန်ထားခြင်း မရှိသေးပေ။

သို့သော် ရွေးကောက်ပွဲ ကျင်းပရန် ၆ လအလို ဇူလိုင် ၃၁ ရက်တွင် မြို့နယ် ၆၃ ခုမှာ စစ်အုပ်ချုပ်ရေး ကြေညာထားသည်။

အများစုမှာ ကချင်၊ ကရင်နီ၊ ကရင်၊ ချင်း၊ ရခိုင်၊ သျှမ်းမြောက်၊ စစ်ကိုင်း၊ မကွေးနှင့် မန္တလေးတိုင်း အပါအဝင် တိုင်းရင်းသားလက်နက်ကိုင် အဖွဲ့အစည်းများနှင့် တော်လှန်ရေး အင်အားစုများ ထိန်းချုပ်ထားသည့် ဒေသများ ဖြစ်သည်။

သို့သော် စစ်အုပ်ချုပ်ရေး ကြေညာထားသည့် မြို့နယ်များတွင် ရွေးကောက်ပွဲ မကျင်းပနိုင်သည့်သဘော သက်ရောက်နေသလို ရွေးကောက်ပွဲမတိုင်မီ စစ်ကော်မရှင်နှင့် တော်လှန်ရေး အင်အားစုများအကြား ပြင်းထန်လာသည့် တိုက်ပွဲများ ဖြစ်လာနိုင်သည်ဟု နိုင်ငံရေးပါတီများကလည်း သုံးသပ်ထားကြသည်။

လူမှုကွန်ရက် ပလက်ဖောင်းကို လက်နက်သဖွယ်အသုံးချပြီး ဝါဒဖြန့်ချိနေသော အာဏာသိမ်း စစ်တပ်သည် ရွေးကောက်ပွဲ အောင်မြင်နိုင်ရန်အတွက် လူမှုကွန်ရက် အွန်လိုင်းပေါ်တွင် လည်းကောင်း၊ မြေပြင်တွင် လည်းကောင်း ၎င်း၏ ပုံရိပ် မြင့်တင်ရန် ဝါဒဖြန့်ချိနေခြင်း ဖြစ်ပြီး၊ ဆန့်ကျင်သော အဖွဲ့အစည်းများကို လူမျိုးရေး အမုန်းတရား လှုံ့ဆော်မှုဖြင့် ဝါဒဖြန့်ချိနေခြင်း ဖြစ်သည်။

အာဏာသိမ်းဗိုလ်ချုပ်များက မြန်မာနိုင်ငံတွင် လူသုံးအများဆုံးသော အွန်လိုင်းလူမှုကွန်ရက် မီဒီယာဖြစ်သည့် Facebook တွင် အကောင့်အတုများဖွင့်ကာ အုပ်စုလိုက် မှတ်ချက်များ၊ ကွန်မန့်များ ရေးသားစေပြီး ၎င်းတို့၏ ဝါဒဖြန့် စစ်ဆင်ရေးကို စနစ်တကျ ဆောင်ရွက်နေသည်ဟု Myanmar Now ၏ ဆောင်းပါးတစ်ပုဒ်တွင် ရေးသားဖော်ပြထားသည်။

ထိုကြောင့် ပြည်သူများအနေဖြင့် လူမှုကွန်ရက် စာမျက်နှာပေါ်၌ ပျံ့နှံနေသော အကြောင်းအရာများ (ဓာတ်ပုံ၊ ဗီဒီယို အပါအဝင်) ချက်ချင်း မယုံကြည်ဘဲ လွတ်လပ်သည့် သတင်းဌာနများ၊ သတင်းအချက်အလက် စစ်ဆေးသည့် အဖွဲ့အစည်းများတွင်လည်း သွားရောက်ဖတ်ရှုရန် တိုက်တွန်းပါသည်။

The post အိမ်ကြက်အချင်းချင်း အထင်မှားပြီး ခွပ်အောင် အိုးမဲသုတ်နေသည့် စစ်တပ် appeared first on သျှမ်းသံတော်ဆင့်.