မြန်မာ – တရုတ်နယ်စပ် မူဆယ်မြို့နယ်ရှိ ညီနောင်မဟာမိတ်သုံးဖွဲ့ ထိန်းချုပ်ထားသည့် ကျင်စန်းကျော့ ကုန်သွယ်ရေးဂိတ်တွင် မိုးသည်းထန်စွာ ရွာသွန်းမှုကြောင့် ရေကြီးရေလျှံမှု ကြုံတွေ့နေရပြီး နေအိမ်တစ်လုံး ရေထဲမျှောပါသွားကြောင်း သတင်းရရှိသည်။

ယနေ့ (ဇူလိုင် ၃ ရက်) နံနက်အချိန်ထိ မိုးသည်းထန်စွာ ရွာသွန်းပြီး နမ့်ယန်းချောင်း ရေတက်မှုကြောင့် မူဆယ်မြို့နယ် ကျင်စန်းကျော့ ကုန်သွယ်ရေးဂိတ် အနီးရှိ လွယ်အင်ကျေးရွာ၊ မန့်ခုံကန်ရွာနှင့် မန့်ခုံလုံရွာရှိ လယ်ကွင်းများအပြင် ပြည်ထောင်စုလမ်းမကြီးပေါ်အထိ ရေကြီးရေလျှံမှုများ ကြုံတွေ့နေရကြောင်း မူဆယ်မြို့နယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ညကနေ မနက်ထိ မိုးအရမ်းကြီးလို့ ရေကြီးတာ။ အရင်နှစ်တွေလည်း ရေကြီးပါတယ် ဒီလောက်ထိ မဖြစ်ဘူး၊ အရင်နှစ်ဆိုရင် လယ်ကွင်းထိပဲ ရေတက်တာ။ ဒီနှစ်က လွယ်အင်ရွာမှာပါ ရေကြီးပြီး နေအိမ်တစ်လုံးလည်း ရေထဲမျှောပါသွားတယ်၊ လမ်းတွေလည်း ပိတ်ထားရတယ်” ဟု ကျင်စန်းကျော့ဂိတ်အနီးတွင် နေထိုင်သည့် အမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိ နမ့်ယန်းချောင်း ရေတက်ကာ ကျင်စန်းကျော့နှင့် လွယ်အင်ကျေးရွာ ရေကြီးရသည့် အကြောင်းအရင်းသည် “၁၀၂၇ စစ်ဆင်ရေး” ဖြစ်ပြီးနောက်ပိုင်း လက်နက်ကိုင်တပ်ဖွဲ့မှ သစ်တောများခုတ်ခြင်း၊ ရွှေအလွန်အကျွံ တူးဖော်ခြင်းတို့ကို ခွင့်ပြုခြင်းကြောင့် ဖြစ်သည်ဟု ဒေသခံများက သုံးသပ်သည်။

“ဘာလို့ ရေကြီးမှု ဖြစ်ရလဲဆိုတော့ “၁၀၂၇ စစ်ဆင်ရေး”နောက်ပိုင်းမှာ လက်နက်ကိုင်တွေ သစ်အရမ်းခုတ်တာ၊ ရွှေတူးတာကြောင့်လည်း ပါတယ်။ ပြီးတော့ ဒေသခံအများစုလည်း ကြံတွေ စိုက်တာ များလာတာဆိုတော့ ရေတွေကို စုပ်ယူတဲ့ အပင်တွေ သိပ်မစိုက်ကြလို့လည်း ပါတယ်။ တရုတ်ဘက်က ရေကာတာဖွင့်ချတာလည်း တစ်စိတ်တစ်ပိုင်း ပါဝင်နိုင်ပါတယ်”ဟု ရေကြီးမှုကို ကြုံတွေ့နေရသည့် အမျိုးသားတစ်ဉီးက သုံးသပ်ပြောသည်။

ထိုသို့ ချောင်းရေတက်၍ ရေကြီးမှုများကြောင့် ကျင်စန်းကျော့ ကုန်သွယ်ရေးဂိတ်တွင်လည်း သွားလာရေး ခက်ခဲပြီး လမ်းများ ပိတ်ထားရကြောင်း ကုန်သည်များထံမှ သိရသည်။

The post ညီနောင်မဟာမိတ်ထိန်းချုပ် မူဆယ်မြို့နယ် ကျင်စန်းကျော့ ကုန်သွယ်ရေးဂိတ် ရေကြီး၊ နေအိမ်တစ်လုံးမျှောပါ appeared first on သျှမ်းသံတော်ဆင့်.