သျှမ်းပြည်မြောက်ပိုင်းတွင် စစ်ရေးလှုပ်ရှားနေသည့် TNLA ၊ MNDAA နှင့် SSPP/SSA တို့ကို ‘ဝ’တပ်ဖွဲ့ UWSA က စစ်လက်နက်များ မထောက်ပံ့ရန် ဆုံးဖြတ်ခဲ့ခြင်းသည် စစ်ကော်မရှင်နှင့် ပုလင်းတူဘူးစို့သာဖြစ်ကြောင်း စစ်ရေးလေ့လာသုံးသပ်သူတစ်ဦးက ပြောဆိုလိုက်သည်။

ယမန်နေ့ (ဩဂုတ်လ ၂၀ ရက်) တွင် ‘ဝ’တပ်ဖွဲ့ UWSA အနေဖြင့် သျှမ်းပြည်မြောက်ပိုင်းတွင် စစ်ရေးလှုပ်ရှားနေသည့် TNLA ၊ MNDAA နှင့် SSPP/SSA တို့ကို စစ်လက်နက်နှင့် ငွေကြေး မထောက်ပံ့ရန် ဆုံးဖြတ်ခဲ့ခြင်းသည် တရုတ်သဘောဆန္ဒအတိုင်း မထူးဆန်းဘဲ စစ်ကော်မရှင်နှင့် ပုလင်းတူဘူးဆို့သာ ဖြစ်ကြောင်း သျှမ်းပြည် စစ်ရေးလေ့လာသုံးသပ်သူ တစ်ဦးက ပြောဆိုလိုက်သည်။

“ညီနောင်မဟာမိတ်တွေနဲ့ စကစနဲ့ တိုက်ပွဲဖြစ်တယ် မှန်တယ်။ သို့သော် ဒီ MNDAA တို့၊ TNLA တို့ ဆိုတာက ‘ဝ’ ရဲ့ လက်အောက်ခံ။ ‘ဝ’ က ဘယ်သူ့ရဲ့ လက်အောက်ခံလဲဆိုတော့ တရုတ်ပြည်မရဲ့ လက်အောက်ခံ။ စကစ မင်းအောင်လှိုင်ကရော ဘယ်သူ့လက်အောက်ခံ ပြန်ဖြစ်လဲဆိုတော့ တရုတ်ပြည်ကြီးရဲ့ လက်အောက်ခံ အတူတူပြန်ဖြစ်တယ်။ ဗမာလို အရှင်းဆုံး ပြောမယ်ဆိုရင် ပုလင်းတူဘူးဆို့ နေကြတာပဲ သူတို့က”ဟု စစ်ရေးလေ့လာသုံးသပ်သူ တစ်ဦးက သျှမ်းသံတော်ဆင့်ကို ပြောသည်။

‘ဝ’ပြည်သွေးစည်းညီညွတ်ရေးတပ်မတော် UWSA သည် မြောက်ပိုင်းမဟာမိတ်တပ်ဖွဲ့များ ဖြစ်ကြသည့် တအာင်း(ပလောင်) အမျိုးသားလွတ်မြောက်ရေးတပ်မတော် PSLF/TNLA ၊ မြန်မာအမျိုးသား ဒီမိုကရက်တစ်မဟာမိတ်တပ်မတော် ခေါ် ကိုးကန့်တပ်ဖွဲ့ MNTJP/MNDAA နှင့် ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA တို့မှ ထိပ်ပိုင်းခေါင်းဆောင်များကို ‘ဝ’ထိန်းချုပ် ပန်ဆန်းမြို့သို့ ခေါ်ယူပြီး ဆွေးနွေးပွဲတစ်ရပ် ကျင်းပခဲ့ကြောင်း WSTV ဘက်မှ ယမန်နေ့ (ဩဂုတ်လ ၂၀ ရက်)တွင် သတင်းထုတ်ပြန်သည်။

အဆိုပါ တွေ့ဆုံဆွေးနွေးပွဲတွင် ‘ဝ’တပ်ဖွဲ့ UWSA ဒုဥက္ကဋ္ဌ ဦးကျောက်ကော်အန်က တက်ရောက်လာသည့် အဖွဲ့အစည်း ကိုယ်စားလှယ်များအား စစ်လက်နက်နှင့် ငွေကြေးများကို မည်သည့်အကြောင်းပြချက်မဆို ကူညီထောက်ပံ့ပေးတော့မည် မဟုတ်ကြောင်း UWSA ၏ တရားဝင် စစ်ရေးဆုံးဖြတ်ချက်ကို ပြောဆိုခဲ့သည်ဟု ထုတ်ပြန်ချက်တွင် ဆိုထားသည်။

“ဝ ကနေပြီးတော့ SSPP တို့၊ MNDAA တို့၊ TNLA တို့ကို Supporting မပေးတော့ဘူး၊ လက်နက်ခဲယမ်း မပေးတော့ဘူးဆိုတာ မဆန်းပါဘူး။ သျှမ်းပြည်မြောက်ပိုင်းရဲ့ နယ်မြေဒေသ အခြေအနေ၊ စစ်ရေး နိုင်ငံရေးကို နားလည်တတ်ကျွမ်းတဲ့ လူတိုင်းကတော့ သိကြမှာပဲလေ။ ဘာလို့လဲဆိုတော့ ကွန်မြူနစ် ဗကပခေတ်ကတည်းက ဒီလိုမျိုးနဲ့ပဲ ဆင်းသက်လာတာပဲ”ဟု သျှမ်းမြောက်ဒေသခံ ကချင်လူငယ်တစ်ဦးက သျှမ်းသံတော်ဆင့်ကို ပြောသည်။

‘ဝ’တပ်ဖွဲ့ UWSA ၏ မြောက်ပိုင်းမဟာမိတ်များကို စစ်လက်နက် မထောက်ပံ့ရေး ဆုံးဖြတ်ချက်သည် ယခုမှသာ တရားဝင်ထုတ်ဖော်ကြေညာခြင်း ဖြစ်ပြီး ၂၀၂၄ ဩဂုတ်လအတွင်း UWSA ထိပ်ပိုင်းတာဝန်ရှိသူများကို တရုတ်အစိုးရဘက်မှ တရုတ်နိုင်ငံ ပူအာမြို့တွင် ခေါ်ယူဆွေးနွေးစဉ်ကတည်းက ထိုသို့လုပ်ဆောင်ရန် ဖိအားပေးခဲ့ကြောင်း ဆိုသည်။

အလားတူ ဩဂုတ်လဆန်းပိုင်း၌ စစ်ကော်မရှင်ခန့် သျှမ်းပြည်ဝန်ကြီးချုပ်နှင့် တြိဂံဒေသ တိုင်းစစ်ဌာနချုပ် တိုင်းမှူးတို့ ဦးဆောင်သည့်အဖွဲ့သည် ‘ဝ’ဒေသ မိုင်းပေါက်မြို့နှင့် ပန်ဆန်းမြို့သို့ သွားရောက်ကာ UWSA ထိပ်ပိုင်းခေါင်းဆောင်များနှင့် တွေ့ဆုံခဲ့ပြီး ရွေးကောက်ပွဲကိစ္စပါ ဆွေးနွေးခဲ့ကြောင်း UWSA ဘက်မှ သတင်းထုတ်ပြန်ထားသည်။

၎င်းနောက် နှစ်ပတ်အကြာတွင် သျှမ်းပြည်မြောက်ပိုင်းသို့ စစ်ကော်မရှင်တပ် မြေပြင်ထိုးစစ်ဆင်လာချိန် UWSA ၏ ညီနောင်မဟာမိတ်တပ်များကို စစ်လက်နက် မထောက်ပံ့ရေး ဆုံးဖြတ်ချက် ပေါ်ထွက်လာခြင်းမှာ တိုက်ဆိုင်နေပြီး စစ်ကော်မရှင်တပ်ဘက်မှ စစ်ရေးအသာစီး ရသွားနိုင်သည်အထိ ရိုက်ခတ်မှုရှိနေသည်။

“ဝတပ်က ဦးဆောင်လုပ်တဲ့ FPNCC လို အစည်းအဝေးမျိုးက တရားဝင်သဘော ချပြတယ်ဆိုတာ ရှားတယ်။ နောက်ထပ် စစ်လက်နက်တို့ ငွေကြေးတို့ မထောက်ပံ့တော့ဘူး ဆိုတာမျိုးက လျှို့ဝှက်ပြီးတော့ပဲ လုပ်လေ့ရှိတာ။ အခုက ဒါကို သတင်းထုတ်ပြန်တယ်ဆိုတော့ တရုတ်ဖိအားကို ဘယ်လောက်ထိ ခံနေရလဲဆိုတာကို မြင်ရတာပေါ့၊ ထူးခြားတာ တစ်ခုကတော့ တော်လှန်ရေးထဲ မပါတဲ့ SSPP ကိုပါ ခေါ်ပြောတာဆိုတော့ ရှေ့ဆက် ဘာလုပ်မှာလဲပေါ့”ဟု စစ်ရေးလေ့လာသုံးသပ်သူက သျှမ်းသံတော်ဆင့်ကို ဆက်ပြောသည်။

မြောက်ပိုင်းမဟာမိတ်ဟု လူသိများသည့် ပြည်ထောင်စုနိုင်ငံရေး ဆွေးနွေးမှုညှိနှိုင်းရေးကော်မတီ FPNCC တွင် တပ်ဖွဲ့ဝင် (၇) ခုဖြင့် ပါဝင်ဖွဲ့စည်းထားပြီး ‘ဝ’တပ်ဖွဲ့ UWSA မှ ဥက္ကဋ္ဌ တာဝန်ယူထားသည်။

သို့သော် ယခုတွေ့ဆုံမှုတွင် ‘ဝ’တပ်ဖွဲ့ UWSA ၊ တအာင်း(ပလောင်)တပ်ဖွဲ့ TNLA ၊ ကိုးကန့်တပ်ဖွဲ့ MNDAA နှင့် သျှမ်းတပ် SSPP/SSA (၄) ဖွဲ့သာ ပါဝင်ပြီး ကချင်လွတ်လပ်ရေးတပ် KIA ၊ အာရက္ခတပ်တော် AA နှင့် မိုင်းလားတပ်ဖွဲ့ NDAA တို့ ပါဝင်ခဲ့ခြင်း မရှိပေ။

ယမန်နှစ် ၂၀၂၄ ဩဂုတ်လဆန်းပိုင်းတွင် စစ်ကော်မရှင်၏ အရှေ့မြောက် တိုင်းစစ်ဌာနချုပ် အခြေစိုက်ရာ လားရှိုးမြို့ကို ကိုးကန့်တပ်ဖွဲ့ MNDAA ထိန်းချုပ်လိုက်ပြီးနောက် တရုတ်အထူးကိုယ်စားလှယ် မစ္စတာတိန့်ရှီကျွင်း သည် UWSA ခေါင်းဆောင်များကို ဩဂုတ်လနောက်ဆုံးပတ်၌ ခေါ်ယူတွေ့ဆုံခဲ့ပြီး TNLA နှင့် MNDAA ထိန်းချုပ်နယ်မြေထဲသို့ ဖြတ်(၅) ဖြတ်လုပ်ဆောင်ရန် ဖိအားပေးခဲ့ပြီး ထိုထဲတွင် စစ်လက်နက်ထောက်ပံ့ခြင်းကို ဖြတ်တောက်ရန်လည်း ပါဝင်သည်ဟု သိရသည်။

The post မြောက်ပိုင်းမဟာမိတ်များကို UWSA စစ်လက်နက်မထောက်ပံ့ရန် ဆုံးဖြတ်ခြင်းက စစ်ကော်မရှင်နှင့် ပုလင်းတူဘူးဆို့ဟုပြော appeared first on သျှမ်းသံတော်ဆင့်.