သျှမ်းပြည် မိုင်းပန်မြို့နယ်တွင် Happy Water စိတ်ကြွဆေးရည်ကြောင့် သေဆုံးသွားသည့် အသက် ၁၆ နှစ်အရွယ် မိန်းကလေးတစ်ဦး၏ အမှုကို ငွေကြေးဖြင့် ကြေအေးလိုက်ကြောင်း ဒေသခံများက ပြောသည်။ 

ဇွန်လ ၂၁ ရက်နေ့တွင် မိုင်းပန်မြို့နယ် နမ့်တိန်းကျေးရွာအုပ်စု မိုက်ညရွာ၌ ဖွင့်လှစ်ထားသော X3 KTV ဆိုင်တွင် အသက် ၁၆ နှစ်အရွယ် နန်းဟျိုးငင်းသည် Happy Water စိတ်ကြွဆေးရည်ကို အလွန်အကျွံသောက်ရာမှ သေဆုံးသွားခြင်း ဖြစ်သည်။ 

ဖြစ်စဉ်မှာ နန်းဟျိုးငင်းနှင့် ၎င်း၏သူငယ်ချင်း နှစ်ဦးတို့ကို မိုင်းပန်မြို့၌ သစ်လာထုတ်နေသော တရုတ်လူမျိုးလောပန်း တစ်ဦးမှ မျှားခေါ်သွားခြင်းဖြစ်ပြီး Happy Water စိတ်ကြွဆေးရည် တစ်ခွက်သောက်နိုင်လျှင် ငွေကျပ် တစ်သိန်းပေးမည်ဟု ပြောဆိုခဲ့ကြောင်း သိရသည်။

ထို့နောက် နန်းဟျိုးငင်းသည် Happy Water စိတ်ကြွဆေးရည်ကို ငါးခွက်သောက်လိုက်ပြီးနောက် သေဆုံးသွားခဲ့ခြင်း ဖြစ်ကြောင်း ဖြစ်စဉ်ကိုသိရှိသူတစ်ဦးက သျှမ်းသံတော်ဆင့်ကို ပြောပြသည်။

“တရုတ်လောပန်က Happy Water တစ်ခွက်သောက်နိုင်ရင် တစ်သိန်းပေးမယ်ဆိုပြီး ပြောတာ။ သူ့ သူငယ်ချင်းတစ်ယောက်က လေးခွက်သောက်ပြီး မသေဘဲ ဆေးရုံကို ပို့လိုက်ရတာ၊ နောက်တစ်ယောက်ကတော့ ဘာမှမသောက်ဘဲ နေတယ်။ နန်းဟျိုးငင်းက Happy Water ကို ငါးခွက်သောက်လိုက်ပြီး ည ၇ နာရီလောက်မှာပဲ ခံနိုင်ရည်မရှိတော့၊ KTV အခန်းထဲမှာပဲဆုံးသွားတာ” ဟု ဖြစ်စဉ်ကိုသိရှိသူတစ်ဦးက ပြောပြသည်။ 

နန်းဟျိုးငင်းသည် မိုင်းပန်မြို့၌ ကျောင်းတက်နေသည့် G-12 ကျောင်းသူတစ်ဦး ဖြစ်သည်။

ကနဦးတွင် နန်းဟျိုးငင်းကို မိုင်းပန်မြို့ စစ်ဆေးရုံသို့ ပို့ဆောင်ခဲ့သော်လည်း ဆေးရုံမှလက်မခံသဖြင့် ကျေးရွာသို့ ပြန်ခေါ်လာရပြီး ဇွန်လ ၂၂ ရက်နေ့၌ ၎င်းရုပ်အလောင်းကို မီးသင်္ဂြိုလ်ပေးခဲ့ရသည်။ 

ယင်းနောက် အသုဘနေ့တွင် နန်းဟျိုးငင်းတို့ကို မျှားခေါ်သွားသည့် တရုတ်လောပန်းတစ်ဦးမှ ငွေကျပ်သိန်း ၅၀ ဖြင့် ကူညီပေးပြီး နမ့်စန်မြို့သို့ ထွက်ပြေးတိမ်းရှောင်သွားခဲ့ကြောင်း၊ ကျေးရွာအုပ်ချုပ်ရေးမှူးမှ ထိုတရုတ်လောပန်းတစ်ဦးကို အမိအရ ပြန်ခေါ်လာခဲ့ပြီး ဆွမ်းသွပ်ရန်အတွက် ဇွန်လ ၂၈ ရက်၌ ငွေကျပ်သိန်း ၂၀၀ ဖြင့် ထပ်မံကူညီပေးခဲ့ကြောင်း မိုင်းပန်မြို့ဒေသခံတစ်ဦး၏ ပြောပြချက်အရ သိရသည်။

ဇူလိုင် ၁ ရက်နေ့တွင် ထိုတရုတ်လောပန်းတစ်ဦးသည် ငွေကျပ်သိန်း ၂,၀၀၀ ဖြင့် နန်းဟျိုးငင်း၏ မိဘများအား လာရောက်တောင်းပန်ခဲ့ပြီး မိဘများနှင့် ရပ်ကွက်သူကြီးများက ကြေအေးလက်မှတ်ထိုးပေးလိုက်ကြောင်း မိုင်းပန်မြို့ဒေသခံတစ်ဦးက ပြောသည်။

“ပြီးခဲ့တဲ့ ရက်တုန်းက တရုတ်လောပန်းက ငွေကျပ်သိန်း ၂,၀၀၀ နဲ့ လာရောက်တောင်းပန်တယ်၊ နန်းဟျိုးငင်းရဲ့ အမေနဲ့ ရပ်ကွက်လူကြီးတွေက ကျေနပ်ပြီး ကြေးအေးလိုက်မှတ်ထိုးပေးလိုက်ပြီလို့ ကြားတယ်” ဟု မိုင်းပန်မြို့ ဒေသခံတစ်ဦးက ပြောသည်။ 

သို့သော် ငွေကျပ်သိန်း ၂,၀၀၀ ဖြင့် ကြေအေးလိုက်ပြီဆိုသည့် ပြောဆိုချက်နှင့် ပတ်သက်၍ သျှမ်းသံတော်ဆင့်မှ သီခြားအတည်ပြုနိုင်ခြင်း မရှိသေးပေ။

နန်းဟျိုးငင်း သေဆုံးမှုနှင့် ပတ်သက်ပြီး ငွေကြေးဖြင့်သာ ကြေအေးလိုက်ခြင်းမဟုတ်ဘဲ တရားဥပဒေအရ အရေးယူသင့်ကြောင်း ဒေသခံအများစုက ပြောကြသည်။

“ပြည်သူအများစုကတော့ တရားမျှတမှုရချင်တယ်၊ တရားဥပဒေအတိုင်း လုပ်ချင်တယ်” ဟု အသက် ၃၀ ကျော် အမျိုးသားတစ်ဦးက ပြောသည်။ 

မိုင်းပန်မြို့သည် သျှမ်းပြည်လည်ထူထောင်ရေးကောင်စီ (RCSS) ၏ ထိန်းချုပ်နယ်မြေဒေသဖြစ်သကဲ့သို့ ယခုသေဆုံးမှုနှင့် ပတ်သက်၍ သျှမ်းပြည်လည်ထူထောင်ရေးကောင်စီ (RCSS) ဘက်မှ ဆက်လက်စုံစမ်းအရေးယူမှု ပြုလုပ်သွားမည်ဖြစ်ကြောင်းလည်း ဒေသခံများက ပြောသည်။

စစ်တပ်အာဏာသိမ်းပြီးနောက်ပိုင်း မိုင်းပန်မြို့နယ်တွင် KTV ဆိုင်များ ပေါများလာခြင်းကြောင့် လူငယ်များအကြား ရေပန်းစားလာသော မူးယစ်ဆေးပေါင်းစုံ ရောစပ်ထားသည့် စိတ်ကြွဆေးရည် ကော့တေးလ်နှင့် ပတ်သက်ပြီး ဒေသခံများက စိုးရိမ်နေရသည်။

Happy Water သည်  MDMA (အက်တစီ)၊ မက်သာဖက်တမင်း၊ ဒိုင်ယာဇီပင်နှင့် ကက်တမင်းတို့ အပါအဝင် ဓာတုဆေးဝါးများဖြင့် အမှုန့်ကြိတ် အရည်ဖျော်စပ်ထားသည့် စိတ်ကြွဆေးရည်ဖြစ်သည်။

ထိုစိတ်ကြွဆေးရည်ကို ကော့တေးလ်ခွက်ဖြင့် ရေ၊ အချိုရည်၊ အရက် စသည့်ဖြင့်ရောကာ သောက်သုံးပြီးလျှင် လူကိုမပင်ပန်းစေဘဲ ပျော်ရွှင်မြူးတူး ကခုန်စေနိုင်သည့်အပြင် လူကို တက်ကြွစေသည့် အရည်တမျိုးဖြစ်သည်။

လက်ရှိ မိုင်းပန်မြို့ရှိ KTV ဆိုင်များတွင် Happy Water စိတ်ကြွဆေးရည်များ ထည့်သွင်း ရောင်းချနေလျက်ရှိပြီး တစ်ထုပ်လျှင် ငွေကျပ် သုံးသိန်း တန်ဖိုးရှိကြောင်း သိရသည်။

The post Happy Water ကြောင့် သေဆုံးသွားသည့် အသက် ၁၆ နှစ်အရွယ်မိန်းကလေးတစ်ဦးအမှု ငွေကြေးဖြင့် ကြေအေး appeared first on သျှမ်းသံတော်ဆင့်.