သျှမ်းပြည် ကျောက်မဲမြို့နယ်ထဲ စစ်ဘေးရှောင်ရှိရာ ဘုန်းကြီးကျောင်းပေါ် စစ်ကော်မရှင်တပ်မှ လေကြောင်းတိုက်ခိုက်မှုကြောင့် စစ်ရှောင်ပြည်သူများ သေဆုံးထိခိုက်ခဲ့ရခြင်းကို သျှမ်းကျောင်းသားသမဂ္ဂ (TSU) မှ ပြင်းထန်စွာ ကန့်ကွက်ရှုတ်ချကြောင်း ယနေ့ (သြဂုတ် ၂၁ ရက်) တွင် ထုတ်ပြန်လိုက်သည်။

ယမန်နေ့ (သြဂုတ်လ ၂၀ ရက်)တွင် ကျောက်မဲမြို့နယ် နောင်ပိန်တိုက်နယ်ရှိ စစ်ရှောင်ပြည်သူများ တိမ်းရှောင်လျက်ရှိသည့် ပင်တီးရွာ မဇ္ဈိမာရာမ အလယ်ကျောင်းပေါ်သို့ စစ်ကော်မရှင်တပ်မှ လေကြောင်းဖြင့် ပေါင် ၅၀၀ ဗုံးတစ်လုံး ကြဲချတိုက်ခိုက်ခဲ့ရာ ကလေးငယ်နှင့် အမျိုးသမီးများ အပါအဝင် အရပ်သား ၁၀ ဦး သေဆုံးခဲ့ပြီး ၁၂ ဦး ဒဏ်ရာရရှိခဲ့ကြောင်း SSPP Info မှ သတင်းထုတ်ပြန်သည်။

ယခုကဲ့သို့ အရပ်သားပြည်သူများ တည်းခိုနေသည့် စစ်ရှောင်စခန်းကို စစ်ကော်မရှင်တပ်မှ လေကြောင်းဗုံးကြဲချ တိုက်ခိုက်ပြီး စစ်ရာဇဝတ်မှု ကျူးလွန်ခြင်းကို ပြင်းထန်စွာ ကန့်ကွက်ရှုတ်ချပြီး ပြည်သူများအတွက် တရားမျှတမှု ပြန်လည်ရရှိစေရန် အစွမ်းကုန် ကြိုးစားလုပ်ဆောင်သွားမည် ဖြစ်ကြောင်း သျှမ်းကျောင်းသားသမဂ္ဂ ထုတ်ပြန်ချက်တွင် ရေးသားထားသည်။

“တိုက်ပွဲတွေဖြစ်ရင် အရပ်သားတွေက ဘုန်ကြီးကျောင်းတွေကို တိမ်းရှောင်ကြတာ များတယ်။ အဲ့တာကို သိသိရက်နဲ့ အရပ်သားတွေ ရှိတဲ့နေရာကို ဒီလိုမျိုး လေကြောင်းဗုံးကြဲ တိုက်ခိုက်မှုလုပ်တာက စစ်ရာဇဝတ်မှုကို ကျူးလွန်တာ ဖြစ်တဲ့အတွက်ကြောင့် ပြင်းထန်စွာ ကန့်ကွက်ရှုတ်ချတယ်။ သူတို့ရဲ့ ဒီလို လုပ်ရက်တွေကို နောင်တစ်ချိန်မှာ အရေးယူနိုင်‌အောင် မှတ်တမ်းတင်ထားမှာ ဖြစ်လို့ အရေးယူလို့ရအောင်လည်း ကြိုးစာသွားမှာ ဖြစ်တယ်”ဟု သျှမ်းကျောင်းသားသမဂ္ဂ (TSU)၏ အလုပ်အမှုဆောင် တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

ကျောက်မဲမြို့နယ် အနီးတဝိုက်ရှိ ကျေးရွာများတွင် လှုပ်ရှားသွားလာနေကြသော လက်နက်ကိုင်အဖွဲ့အစည်းများ အနေဖြင့် အရပ်သားပြည်သူလူထုကို ငဲ့ညှာသောအားဖြင့် ပြည်သူများအကြားတွင် ဝင်ရောက်နေထိုင်ခြင်း မပြုကြပါရန်နှင့် ထွက်ပြေးနေသည့်ပြည်သူများကို ဘေးလွတ်ကင်းအောင် တက်စွမ်းသမျှ ကူညီပေးကြရန် တောင်းဆိုကြောင်း
သျှမ်းကျောင်းသားသမဂ္ဂ (TSU)၏ အလုပ်အမှုဆောင် တာဝန်ရှိသူတစ်ဦးက ဆက်ပြောသည်။

“အရပ်သားတွေ ရှိတဲ့နေရာတွေကို လက်နက်ကိုင်တွေအနေနဲ့ အတတ်နိုင်ဆုံး မသွားလာကြဖို့၊ တကယ်လို့ စစ်ရေးဖော်ဆောင်မယ် ဆိုရင်လည်း အရပ်သားတွေကို အရင်ဆုံး ဘေးလွတ်ရာ ကင်းလွတ်ရာကို ကယ်ထုတ်ပြီးမှ တိုက်ပွဲတွေကို ဆက်ဖော်ဆောင်ဖို့ မေတ္တာရပ်ခံပါတယ်”၎င်းက ဆက်ပြောသည်။

အလားတူ TNLA တပ်ဖွဲ့အနေဖြင့်လည်း ထွက်ပြေးတိမ်းရှောင်မည့် ဒေသခံပြည်သူများကို ဟန့်တားပိတ်ဆို့မှု ပြုလုပ်ခဲ့ခြင်းအပေါ် ပြင်းထန်စွာ ကန့်ကွက်ရှုတ်ချပြီး လေကြောင်းအန္တရာယ် ကျရောက်နိုင်သော၊ ထင်သာမြင်သာ ရှိနေသော လုံခြုံရေး စစ်ဆေးရေး ဂိတ်များကို ချက်ခြင်း ဖျက်သိမ်းကာ အရပ်သားပြည်သူများနှင့် ဝေးရာနေရာများသို့ အမြန် ပြောင်းရွေ့ပေးသွားရန်လည်း ရန်ကုန်သျှမ်းလူငယ်များအသင်း TYY က ယမန်နေ့တွင် တောင်းဆိုထားသည်။

လက်ရှိ ကျောက်မဲမြို့နယ် နောင်ပိန်တိုက်နယ်အတွင်း TNLA ပူးပေါင်းတပ်နှင့် စစ်ကော်မရှင်တပ်ကြား တိုက်ပွဲများ ပြင်းထန်လာမှုကြောင့် ဒေသခံပြည်သူ ထောင်ချီသည် နီးစပ်ရာသို့ ထွက်ပြေးတိမ်းရှောင် နေကြသည့်အတွက် အကူအညီ မြောက်များစွာ လိုအပ်နေပြီး ဝိုင်းဝန်းကူညီပေးကြပါရန် မေတ္တာရပ်ခံအပ်ကြောင်း သျှမ်းကျောင်းသားသမဂ္ဂမှ တိုက်တွန်းထားသည်။

The post ကျောက်မဲမြို့နယ် စစ်ဘေးရှောင်ရှိရာဘုန်းကြီးကျောင်း လေကြောင်းတိုက်ခိုက်ခံရမှု TSU ပြင်းထန်စွာ ကန့်ကွတ် appeared first on သျှမ်းသံတော်ဆင့်.