သျှမ်းပြည်တောင်ပိုင်း ကွန်ဟိန်းမြို့နယ် ကာလိမြို့သို့ ရောက်ရှိနေသည့် စစ်ဘေးရှောင်များအတွက် ပြန်လည်ထူထောင်ရေး လုပ်ဆောင်ပေးနိုင်ရန် ရေနှင့် လျှပ်စစ်မီး အထောက်အပံ့များ လိုအပ်နေကြောင်း စုံစမ်းသိရသည်။

မေလ နောက်ဆုံးပတ်မှ စတင်ပြီး ကာလိမြို့ ရပ်ကွက်(၅) အနီး ပြည်သူများ လှူဒါန်းထားသည့် မြေနေရာ (၃) ဧကပေါ်တွင် သျှမ်းပြည်မြောက်ပိုင်း စစ်ဘေးရှောင်များကို နေရာချထားလျက်ရှိရာ ပြန်လည်ထူထောင်ရေးအတွက် ရေနှင့် လျှပ်စစ်မီး အထောက်အပံ့များ လိုအပ်လျက်ရှိကြောင်း စစ်ဘေးရှောင်ကူညီသူများက ပြောသည်။

“စစ်ရှောင်တွေကို နေရာချထားတဲ့ဘက်တော့ လျှပ်စစ်မီး မရသေးဘူး၊ လမ်းကြားတွေလည်း မီးတိုင်မရှိသေးဘူး။ ရေအတွက်လည်း အဝီစိတွင်းတူးဖို့ အလှူရှင်ရှာနေတယ်၊ ရေကန်ကတော့ ရှိထားပြီးသား။ ရေနဲ့ လျှပ်စစ်မီးကတော့ လတ်တလော အခက်အခဲ ပြောလို့ရတယ်။ ပြန်လည်ထူထောင်ရေးလုပ်ဖို့လည်း လျှစ်စစ်မီးရှိမှ ဖြစ်မှာ”ဟု စစ်ဘေးရှောင်ကူညီသူ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

ကာလိမြို့တွင် “၁၀၂၇ စစ်ဆင်ရေး” ပထမပိုင်းနှင့် ဒုတိယပိုင်း တိုက်ပွဲကြား သိန္နီ၊ လားရှိုး၊ ကျောက်မဲဘက်မှ ထွက်ပြေးတိမ်းရှောင်လာသည့် စစ်ဘေးရှောင် မိသားစု (၂၀) ခန့်၊ လူဦးရေ (၁၀၀) နီးပါး ကျန်ရှိနေပြီး ဒေသခံများမှ မြေကွက်လှူဒါန်းကာ နေရာချထားပေးခြင်း ဖြစ်ကြောင်း သိရသည်။

လက်ရှိတွင် ၎င်းစစ်ဘေးရှောင်များမှာ သုံးရေအတွက် လျှိုမြောင်ထဲရှိ သဘာဝရေတွင်းမှ သွားရောက်ခပ်ယူရခြင်းကြောင့် အဝီစိတွင်း တူးဖော်၍ သောက်ရေသုံးရေ ရရှိရန် စီစဉ်နေပြီး အကူအညီများ လိုအပ်လျက်ရှိကြောင်း စစ်ဘေးရှောင်ကူညီသူများက ပြောသည်။

“သုံးရေကတော့ လျှိုထဲမှာ သဘာဝရေတွင်းတော့ ရှိတယ်။ အဝေးကြီးတော့ မဟုတ်ဘူး၊ တောင်အောက်ဆင်းပြီး ရေသွားခပ်ရတော့ အပေါ်မှာ ရေကန်ထပ်ဆောက်ထားတယ်။ ရေမော်တာနဲ့ တင်ကြည့်ဖို့ လုပ်နေတယ်။ ရေတွင်းက နွေရာသီဆို ရေခမ်းမှာလည်း စိုးရိမ်လို့၊ ရေရှိရင် သီးပင်စားပင်လည်း စိုက်လို့ရတော့ အိမ်သုံးစရိတ် နည်းနည်းကာနိုင်တယ်”ဟု ကာလိဒေသခံ စစ်ရှောင်ကူညီသူ ၎င်းအမျိုးသမီးက ဆက်ပြောသည်။

ကာလိမြို့တွင် ရောက်ရှိနေသည့် သျှမ်းပြည်မြောက်ပိုင်းမှ စစ်ဘေးရှောင်များသည် ယခင်က တင်းလီဈေးတွင် တစ်နှစ်ခွဲကျော် ခိုလှုံခဲ့ရာမှ ပြည်သူများ လှူဒါန်းထားသည့် မြေနေရာ (၃) ဧကပေါ်တွင် မိသားစုလိုက် ပေ ၅၀ x ၆၀ အကွက်ချ၍ နေအိမ်များ ဆောက်လုပ်ပြီးနောက် ပြောင်းရွှေ့လာခဲ့ခြင်းဖြစ်ကြောင်း ဒေသခံများထံမှ သိရသည်။

“ဒေသခံရဲ့ ခြံတွေလည်း စိုက်ပျိုးခွင့်ပြုထားတော့ ပဲပုပ်တို့၊ ပြောင်းဖူးတို့ စိုက်ကြတယ်။ ပွဲရုံတွေကလည်း ပြောင်းမျိုးတွေ စိုက်ထုတ်ပေးတာ ရှိတယ်။ အဝီစိရေတွင်း တူးဖို့က သိန်း ၇၀ လောက် လိုတယ်၊ လမ်းမီးကတော့ ၂ ခုပဲ ရသေးတယ်။ စစ်ပွဲကြားထဲ ထွက်ပြေးရတဲ့လူက မှောင်နေရင် သူတို့လည်း အားငယ်မှာ ကြောက်တယ်၊ စိတ်ပိုင်းဆိုင်ရာ ထိခိုက်မှာ စိုးရိမ်တာ”ဟု စစ်ရှောင်ကော်မတီဝင်တစ်ဦးက သျှမ်းသံတော်ဆင့်ကို ပြောဆိုသည်။

ကွန်ဟိန်းမြို့နယ်ရှိ ကာလိမြို့သို့ “၁၀၂၇ စစ်ဆင်ရေး” ပထမပိုင်း စတင်သည့် ၂၀၂၃ ခုနှစ်ကတည်းက သိန္နီ၊ လားရှိုး၊ ကျောက်မဲမြို့များမှ စစ်ဘေးရှောင်မိသားစု (၃၀၀) ကျော်၊ လူဦးရေ (၁၀၀၀) ခန့် ထွက်ပြေးတိမ်းရှောင်ခဲ့ပြီး အချို့မှာ နေရပ်ပြန်သွားကာ အချို့လည်း ထိုင်းနိုင်ငံသို့ အလုပ်လုပ်ရန် ထွက်ခွာသွားကြကြောင်း စစ်ရှောင်ကူညီသူများထံမှ သိရသည်။

The post ကွန်ဟိန်းမြို့နယ် ကာလိမြို့ရောက် သျှမ်းမြောက်စစ်ဘေးရှောင် ပြန်လည်ထူထောင်ရေးအတွက် အထောက်အပံ့လိုအပ် appeared first on သျှမ်းသံတော်ဆင့်.