သျှမ်းပြည် ကျောက်မဲမြို့နယ် နောင်ပိန်ကျေးရွာထဲ စစ်ကော်မရှင်တပ်မှ Y-12 လေယာဉ်ဖြင့် ဆက်တိုက် ဗုံးကြဲခံရခြင်းကြောင့် နေအိမ်အများစု မီးလောင်နေကြောင်း စုံစမ်းသိရသည်။

ယမန်နေ့ (ဩဂုတ်လ ၂၀ ရက်) နံနက်ပိုင်းမှ စတင်ပြီး TNLA ပူးပေါင်းတပ်နှင့် စစ်ကော်မရှင်တပ်တို့ မြေပြင်ထိတွေ့တိုက်ပွဲ ပြင်းထန်နေသည့် ကျောက်မဲမြို့နယ် နောင်ပိန်တိုက်နယ်အတွင်း Y-12 လေယာဉ်ဖြင့် ဆက်တိုက် ဗုံးကြဲခံရခြင်းကြောင့် ဈေးအနီး ရပ်ကွက်(၁) ဗလီအနောက်ဘက်ရှိ နေအိမ်အများစု၊ ရပ်ကွက်(၅) နှင့် လုပ်ပါကျေးရွာဘက်တွင် မီးလောင်နေကြောင်း ဒေသခံများက ပြောသည်။

“မနေ့ညတော့ ဗလီ အနောက်ဘက်က အိမ်တွေ မီးလောင်ကုန်ပြီ၊ Y12 နဲ့ လာချတာ အပေါ်ကနေ စက်သေနတ်နဲ့လည်း ပစ်တယ်။ မနေ့ညက တစ်ခါ၊ ဒီနေ့ ထပ်တစ်ခါ လေယာဉ်လာကြဲသွားတယ် မနက်ထိ မီးလောင်နေတုန်းပဲ။ လွတ်မယ်ထင်ပြီး ပြေးတာ လုပ်ပါရွာက ပိုဆိုးနေတာ၊ အကုန် စုတ်ပြတ်နေပြီ”ဟု နောင်ပိန်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ယမန်နေ့တွင် နောင်ပိန်တိုက်နယ် ပင်တီးကျေးရွာ မဇ္ဈိမာရာမ အလယ်ကျောင်းကို စစ်ကော်မရှင်တပ်မှ လေကြောင်းဖြင့် ပေါင် ၅၀၀ ဗုံးတစ်လုံး တိုက်ခိုက်ခဲ့ခြင်းကြောင့် နောင်ချိုစစ်ဘေးရှောင် (၄၀) ကျော် သေဆုံးဒဏ်ရာရခဲ့သည်။

လက်ရှိတွင် ထိခိုက်ဒဏ်ရာရသူများကို လူမှုကူညီရေးအသင်းများမှ ကယ်ထုတ်ကာ လားရှိုး၊ ကွတ်ခိုင်နှင့် နမ့်လန်မြို့ဘက်သို့ အသီးသီး ပို့ဆောင်လျက်ရှိပြီး ဆေးကုသစရိတ် နှင့် စစ်ရှောင်များအတွက် အရေးပေါ် စားနပ်ရိက္ခာ အကူအညီများ လိုအပ်နေကြောင်း စစ်ရှောင်ကူညီသူများထံမှ သိရသည်။

The post ကျောက်မဲမြို့နယ် နောင်ပိန်ရွာထဲ စစ်ကော်မရှင် ဆက်တိုက်ဗုံးကြဲ၊ နေအိမ်အများစု မီးလောင် appeared first on သျှမ်းသံတော်ဆင့်.