ခိုနူမ်းသုန်

အိန္ဒိယနိုင်ငံ၊ နယူးဒေလီမြို့ရှိ မြန်မာစစ်ဘေးရှောင်များအတွက် ဒုက္ခသည်အဆင့်အတန်း (Refugee Status Determination – RSD) သတ်မှတ်နိုင်ရေးဆန်းစစ်ချက် အင်တာဗျူးလုပ်ငန်းစဉ်များကို UNHCR က စတင်ခေါ်ယူနေပြီဟု သိရသည်။

ဩဂုတ်လ ၈ ရက်နေ့က UNHCR အကြီးအကဲနှင့် ချင်းဒုက္ခသည်ကော်မတီ CRC အလုပ်အမှုဆောင်များတွေ့ဆုံကာ မြန်မာစစ်ဘေးရှောင်စာရင်းများ ပေးအပ်ခဲ့ပြီးနောက် ယမန်နေ့ ဩဂုတ်လ ၁၁ ရက်နေ့ကစ၍ RSD အင်တာဗျူးဖြေဆိုရန် စတင်ခေါ်ယူ‌နေခြင်းဖြစ်သည်။

“မနေ့က RSD interview ခေါ်ခံရတဲ့သူတွေ ရှိပြီ။ အဲဒါတစ်ယောက်က ဥက္ကဌဆီကို အင်တာဗျူးအခေါ်ခံရပါပြီဆိုပြီး ကျေးဇူး တင်ကြောင်း ပြောတယ်။ ဘယ်ကော်မြူနတီကလဲဆိုတာတော့ ပြောမသွားဘူးတဲ့။ CRC အနေနဲ့ကျတော့ တစ်ပတ် တစ်ခါ Report ရတဲ့ အချိန်ကျရင်တော့ သိရမှာဖြစ်ပါတယ်” ဟု CRC အဖွဲ့ဝင်တစ်ဦးက ပြောသည်။

သို့သော် အင်တာဗျူးခေါ်ယူသည့် အရေအတွက်ကိုလည်းကောင်း၊ မည်သည့် အချက်အချက်များအပေါ် မည်သို့ ဦးစားပေး ခေါ်ယူနေကြောင်းကိုမူတိတိကျကျမသိရသေးပေ။

ချင်းဒုက္ခသည်ကော်မတီ၊ CRC ဥက္ကဌ၏ပြောပြချက်အရ လက်ရှိ နယူးဒေလီရောက် မြန်မာဒုက္ခသည် အယောက် ၁၂၀၀၀ ဝန်းကျင်ရှိသည့်အနက် ၉၅ ရာခိုင်နှုန်းသည် ဒုက္ခသည်အဆင့်အတန်း သတ်မှတ်ခံရခြင်းမရှိ‌သေးဘဲ ယာယီအထောက် အထားကဒ်ပြား (Asylum Seekers) အဆင့်တွင်သာ ရှိနေသေးကြောင်း သိရသည်။

ဒုက္ခသည်အဆင့်အတန်းသတ်မှတ်ခံရပြီဆိုပါက ဥပဒေအရ အကာအကွယ်ရရှိခြင်း၊ အခြေခံဝန်ဆောင်မှုများ ရရှိခြင်းနှင့် တတိယနိုင်ငံသို့ ပြန်လည်နေရာချထားရေး အခွင့်အလမ်းများ ရရှိနိုင်မည်ဖြစ်သည်။

CRC အနေဖြင့် မြန်မာဒုက္ခသည်များ၏ အခွင့်အရေးများဖြစ်သော ကျန်းမာရေး၊ ပညာရေး၊ လုံခြုံရေးနှင့် တတိယနိုင်ငံသို့ အခြေချရေးကိစ္စများအတွက် UNHCR နှင့် ဆက်လက်ညှိနှိုင်းသွားမည်ဟုသိရသည်။

အပြည့်အစုံ ဖတ်ရန်