ပညာရေးဝန်ထမ်းများ လွတ်လပ်စွာ သင်ကြားမှု ပြုလုပ်ရန် မေတ္တာရပ်ခံ

(006SV)

မကွေးတိုင်း၊ ငဖဲမြို့နယ်ထဲက CDF – အရှို ၏ စစ်ဆင်ရေးလှုပ်ရှားနယ်မြေနှင့် ထိစပ်ဒေသများတွင် အခြေခံပညာကျောင်းများ ဖွင့်လှစ်သင်ကြားမှုကို ဝင်ရောက်စွက်ဖက်ဟန့်တားမည်မဟုတ်ကြောင်း ချင်းကာကွယ်ရေးတပ် – အရှိုက ကြေညာသည်။

စစ်ရေးလှုပ်ရှားမှုနယ်မြေများနှင့် ထိစပ်လျက်ရှိသော မကွေးတိုင်း၊ ငဖဲမြို့နယ်၊ တောင်ပေါ်ဒေသနှင့် မြေပြန့်ဒေသ ကျေးရွာများရှိ အခြေခံပညာကျောင်းများတွင် တာဝန်ထမ်းဆောင်လျက်ရှိသော အခြေခံပညာအဆင့် ကျောင်းဆရာ/ ဆရာမများကို ခြိမ်း ခြောက်ခြင်း၊ နှောက်ယှက်ဟန့်တားခြင်း၊ ဖမ်းဆီးထိန်းသိမ်းခြင်း၊ ပညာသင်ကြားမှု ကျောင်းကိစ္စများကို ဝင်ရောက်စွက်ဖက်ခြင်း လုံးဝ ပြုလုပ်မည်မဟုတ်ကြောင်း ထုတ်ပြန်သည်။

CDF – အရှို ပြောရေးဆိုခွင့်ရှိသူ ဆလိုင်းရိုးချင်းက “နိုင်ငံအေးချမ်းတဲ့ ကာလမှာကော၊ လက်ရှိ စစ်ပွဲကာလမှာကော ကျနော်တို့ ဒေသမှာ ရှိတဲ့ ကလေးသူ ငယ်တွေအနေနဲ့ ပညာသင်ကြားမှု အခွင့်အရေးတွေ ဆုံးရှုံးနေတာဖြစ်လို့ အခုလိုပညာသင်ကြားမှုကို မဆုံးရှုံးရလေအောင် ကျနော်တို့ ထုတ်ပြန်ရခြင်းဖြစ်ပါတယ်။ အဓိကက တောင်ပေါ်ဒေသတွေမှာ လာရောက်တာဝန်ထမ်းဆောင်ကြမယ့် ဆရာ၊ ဆရာမတွေအနေနဲ့ CDF – အရှိုကိုရော၊ တပ်က ရဲဘော်တွေကိုရော ကြောက်နေဖို့ မလိုကြောင်း ပြောလိုပါတယ်” ဟု ပြောသည်။

ကျောင်းဆရာ/ ဆရာမများကို ယင်းကဲ့သို့ ပြုလုပ်သူ မည်သူမဆိုကို တားမြစ်အရေးယူသွားမည်ဖြစ်ကြောင်း CDF – အရှိုက မေလ ၁၈ ရက်မှာ ထုတ်ပြန်သည်။

အခုအခါ ၂၀၂၅ – ၂၀၂၆ အခြေခံပညာသင်နှစ်အတွက် အခြေခံကျောင်းများ စတင်ဖွင့်လှစ်တော့မည်ဖြစ်၍ ကျောင်းနေအရွယ် ကလေးသူငယ်များ ပညာသင်ကြားရန် လိုအပ်လျက်ရှိကြောင်း တွေ့ရှိရ၍ ထုတ်ပြန်ခြင်းဖြစ်သည်ဟု သိရသည်။

အခြေခံပညာအဆင့် ပညာရေးဝန်ထမ်းများအနေဖြင့် ကျောင်းနေအရွယ် ကလေးများကို စေတနာ၊ ဝါသနာ၊ အနစ်နာ ၃ ချက်ကို ခံယူအလေးထားလျက် လွတ်လပ်စွာ သင်ကြားမှု ပြုလုပ်ပါရန် CDF – အရှိုက မေတ္တာရပ်ခံထားသည်။

CDF – အရှိုသည် စစ်ရေးနှင့် စစ်ဘက်ဆိုင်ရာ ပစ်မှတ်များကိုသာ အဓိက ဦးတည်တိုက်ခိုက်မည်ဖြစ်ကြောင်း ဆိုသည်။

စစ်ဘက်ဆိုင်ရာယဉ်ကျေးမှုအရ စစ်ဘက်ဆိုင်ရာ တန်ဖိုးထားမှုတွင် ချင်းလူမျိုးနှင့် ပြည်သူလူထုအပေါ် သစ္စာစောင့်သိခြင်း၊ ဂုဏ်သိက္ခာရှိခြင်း၊ ရဲရင့်မှု ရှိခြင်း၊ ရိုးသားမှု ရှိခြင်းအပေါ် အခြေခံလျက် စစ်သည်တော်ကျင့်ဝတ်များနှင့်အတူ နိုင်ငံတကာ စစ်ဘက်ဆိုင်ရာ ဥပဒေများကိုပါ လေးစားလိုက်နာလျက်ရှိသည်ဟု သိရသည်။