(004SS)

ချင်းပြည်နယ်မြို့တော်၊ ဟားခါးမြို့တွင် တာဝန်ကျသော စစ်ကောင်စီတပ်ဖွဲ့ဝင် ၃ ဦးတို့သည် စစ်ကောင်စီကို ဆန့်ကျင်ပြီး ပြည်သူနှင့်အတူ တော်လှန်ရေးတွင် ပူးပေါင်းရန် လက်နက်ခဲယမ်းများနှင့်အတူ အလင်းဝင်လာကြောင်း Chinland Defense Force – Hakha က မေလ ၁၈ ရက်နေ့တွင် ထုတ်ပြန်သည်။

ဟားခါးမြို့ရှိ စစ်သားနှစ်ဦးနှင့် ရဲတစ်ဦးတို့သည် မေလ ၁၅ နှင့် ၁၇ ရက်များတွင် အလင်းဝင်ရောက်လာခြင်းဖြစ်ပြီး သေနတ် ၁ လက် ၊ကျည်ဘောက်စ်နှင့် ကျည်ဆံအချို့၊ လက်ပစ်ဗုံး ၃ လုံးနှင့် အီနာဂါ ၄ လုံးနှင့်အတူ အလင်းဝင်ရောက် လာကြခြင်းဟု ဓါတ်ပုံနှင့်တကွ CDF-Hakha က ထုတ်ပြန်ထားသည်။
‌
ထို့အပြင် မေလ ၁၅ ရက်နေ့တွင် စစ်ကောင်စီ စစ်သားတစ်ဦးကိုလည်း အရှင် ဖမ်းဆီးမိကြောင်း သိရသည်။

CDF-Hakha အနေဖြင့် စစ်အာဏာရှင်ကို ဆန့်ကျင်ပြီး ပြည်သူနှင့်အတူ လာရောက်ပူးပေါင်းသော သူများကို နွေးနွေး ထွေးထွေး ကြိုဆိုသည့်အပြင် လက်နက်ခဲယမ်းဖြင့် အလင်းဝင်လာသူများအား ငွေသားဆုကြေးများ ချီးမြှင့်ပြီး လုံခြုံသည့်နေရာရောက်သည်အထိ တာဝန်ယူဆောင်ရွက်ပေးမည်ဟု ဆိုသည်။