ဧရာတီတိုင်းမ်
ဇူလိုင် ၆ ရက်

မြန်မာ – ထိုင်းနယ်စပ်ရှိပြဿနာများအတွက် နှစ်နိုင်ငံနယ်ခြားကော်မတီအစည်းအဝေး ကျင်းပခဲ့ပြီး နောက် ထိုင်းဘုရင့်ကြည်းတပ်စစ်ဦးစီးအရာရှိချုပ်နှင့် အမျိုးသားကာကွယ်ရေး ကျောင်းအုပ်ကြီးတို့ကို စစ်ကောင်စီက တွေ့ဆုံခဲ့ကြောင်း စစ်ကောင်စီအာဘော် သတင်းများတွင် ဖော်ပြထားသည်။

နယ်ခြားကော်မတီအစည်းအဝေးကို ပြီးခဲ့သည့် ဇူလိုင် ၃ နှင့်၄ ရက်နေ့က ထိုင်းနိုင်ငံ၊ ချင်းမိုင်မြို့ရှိ Green Lake Resort တွင် နှစ်ရက်ကြာကျင်းပပြီး ယုံကြည်မှုတည်ဆောက်ရေးဆိုင်ရာကိစ္စများ၊ နယ်စပ်ဒေသ ပူးပေါင်းဆောင်ရွက်ရေး၊ မူးယစ်ဆေးဝါးတားဆီး‌ရေး ကိစ္စများအပါအဝင် အခြားကိစ္စရပ်များကို ဆွေးနွေးခဲ့ကြောင်း စစ်ကောင်စီက ဖော်ပြထားသည်။

ယင်းနောက်စစ်ကောင်စီအဖွဲ့ ကာကွယ်ရေးဦးစီးချုပ်ရုံး( ကြည်း) မှ ဒုတိယဗိုလ်ချုပ်ကြီး ညွှန့်ဝင်းဆွေနှင့် စစ်တပ်အရာရှိများက ထိုင်းဘုရင့်ကြည်းတပ်ဦးစီးချုပ်ရုံး၊ စစ်ဦးစီးအရာရှိချုပ် Gen. Thongchai rodyoi နှင့် အမျိုးသားကာကွယ်မှုလေ့လာရေးတက္ကသိုလ် ကျောင်းအုပ်ကြီး Gen. Pongtep Gaewchaiyo တို့ဖြင့် သီးခြားတွေ့ဆုံခဲ့ကြောင်းသိရသည်။

ထို့ပြင်နှ စ်နိုင်ငံတပ်မတော်ကြားပူးပေါင်းဆောင်ရွက်မှုဆိုင်ရာကိစ္စရပ်များနှင့် ယခုကျင်းပပြီးသည့် နယ်ခြားကော်မတီအစည်းအဝေးမှ ကိစ္စရပ်များဆွေးနွေးကြောင်းသိရသည်။

အဆိုပါနယ်ခြားကော်မတီတွေ့ဆုံပွဲတွင် ၀ တပ်ဖွဲ့နယ်မြေ မြန်မာဘက်ခြမ်းမှ ရွှေနှင့် မြေရှားသတ္တု တူးဖော်မှုများကြောင့် နမ့်ခုတ်မြစ်၊ မယ်ဆိုင်ချောင်းတို့တွင် ရေထုညစ်ညမ်းမှုရင်ဆိုင်နေရကြောင်း၊ အွန်လိုင်းငွေလိမ်ဂိုဏ်းများနှင့် စပ်လျဉ်း၍လည်း ထိုင်းအဖွဲ့က ပြောကြားခဲ့ကြောင်း ထိုင်းမီဒီယာများတွင် ဖော်ပြထားသည်။

ထိုင်းစစ်တပ်အပါအဝင်အုပ်ချုပ်ရေးအဖွဲ့များက မြန်မာနိုင်ငံမှ ထိုင်းနိုင်ငံသို့တရားမဝင် ရွှေ့ပြောင်းနေ ထိုင်သူများကို ဖမ်းဆီးပြီး စစ်ကောင်စီထံပြန်လည်အပ်နှံမှုများပြုလုပ်နေကြောင်းသိရသည်။

ပြီးခဲ့သည့် ၂၀၂၄ ခုနှစ် ဇွန်လတွင် မြိတ်မြို့ ၊ ပုလဲသန္တာဟိုတယ်၌(၃၆) ကြိမ်မြောက် မြန်မာ – ထိုင်း ဒေသဆိုင်ရာနယ်ခြားကော်မတီအစည်းအဝေးကျင်းပကြောင်းသိရသည်။

ဓာတ်ပုံ – စစ်ကောင်စီ

The post ထိုင်းနိုင်ငံတွင် ထိုင်းဘုရင့်ကြည်းတပ်စစ်ဦးစီးအရာရှိချုပ်နှင့် အမျိုးသားကာကွယ်ရေးကျောင်းအုပ်ကြီး တို့ကို စစ်ကောင်စီသွားရောက်တွေ့ဆုံ appeared first on Ayeyarwaddy Times.