ဧရာဝတီတိုင်းမ်
(ရိဒ်)၊ ဇူလိုင် ၆ ရက်

ချင်းပြည်နယ်၊ ဖလမ်းမြို့နယ်၊ ရိဒ်ခေါဒါရ်မြို့ တိုက်ပွဲတွင် မီဇိုရမ်ပြည်နယ်၊ ကျန်ဖိုင်ခရိုင်သို့ ကျည်ဆန်များ ကျရောက်ပါက ချင်းစစ်ဘေးရှောင်ကို နှင်ထုတ်သွားမည်ဟု သတိပေးခံရကြောင်း စစ်ဘေးရှောင်များထံမှ သိရသည်။

ယမန်နေ့ ဇူလိုင်လ ၅ ရက်နေ့ မနက် ၈ နာရီခန့်တွင် CDF-Hualngoram နှင့် CNDF တို့ဖြစ်ပွားသည့် တိုက်ပွဲတွင်း ပစ်ခတ်သည့် လက်နက်ငယ်ကျည်ဆန်များသည် ကျန်ဖိုင်ခရိုင်၊ ဇိုခေါထာရ်ကျေးရွာသို့ ကျရောက်မှုရှိကြောင်း သိရသည်။

“မနေက ရိဒ်ခေါဒါရ်မြို့ တီချောင်းဘက်မှာ ဖြစ်တဲ့ တိုက်ပွဲက ကျည်ဆန်တွေ ဇိုခေါထာရ်ဘက် ကျတာရှိတယ်။ ရိဒ်ခေါဒါရ်မြို့နဲ့ ဇိုခေါထာရ်ရွာက တီချောင်းတံတားပဲခြားတယ်။ ဟိုဘက်နဲ့ဒီဘက်ကမ်း ချောင်းပဲခြားတယ်။ တိုက်ပွဲဖြစ်တာက ချောင်းဘက်မှာဖြစ်ကြတာပါ” ဟု ဇိုခေါထာရ်ကျေးရွာရှိ ချင်းစစ်ဘေးရှောင်တစ်ဦးက ဧရာဝတီတိုင်းမ်ကို ပြောသည်။

ထိုကဲ့သို့ ကျည်ဆန်များ ဇိုခေါထာရ်ရွာဘက် ထပ်မံ ကျရောက်ပါက ဇိုခေါထာရ်ကျေးရွာတွင် ခိုလှုံနေထိုင်ကြသည့် စစ်ဘေးရှောင်များကို နှင်ထုတ်သွားမည်ဟု မီဇိုလူငယ်များအသင်းမှ ယမန်နေ့နံနက်ပိုင်းတွင် သတိပေးခဲ့ပြီးနောက် ရိဒ်ခေါဒါရ်မြို့ဘက်က ရာနှင့်ချီသည့် ပြည်သူများ ဇိုခေါထာရ်ဘက်သို့ ထပ်မံစစ်ဘေးရှောင်လာကြောင်း သိရသည်။

“ရိဒ်ခေါဒါရ် တိုက်ပွဲကနေ ဇိုခေါထာရ်ရွာဘက် ကျည်ဆန်တွေ အများကြီး ကျရောက်လာတယ်။ ပြည်သူတွေ သတိရှိရှိနေကြပါ။ CNDF နဲ့ CDF- Hualngoram အနေနဲ့ ဇိုခေါထာရ်ဘက် ဦးတည်ပြီး သေနတ် ကျဥ်ဆန်တွေ မဖောက်ဖို့ ပြည်သူတွေ အထိတ်တလန့် ဖြစ်နေရတယ်။ ကျည်ဆန်တွေ ထပ်မံ ဝင်လာရင် စစ်ဘေးရှောင်တွေ အကုန်နှင်ထုတ်သွားမယ်ဆိုပြီးတော့ YMA အဖွဲ့က လော်စပီကာနဲ့ ပြောတာပါ”ဟု ဇိုခေါထာရ်ကျေးရွာရှိ ချင်းစစ်ဘေးရှောင်တစ်ဦးက ဧရာဝတီတိုင်းမ်ကို ပြောသည်။

ဇိုခေါထာရ်ကျေးရွာသည် ရိဒ်ခေါဒါရ်မြို့နှင့် နယ်စပ်တံတားတစ်ခုသာခြားပြီး ချင်းပြည်နယ်နှင့် စစ်ကိုင်းတိုင်းမှ ချင်းစစ်ဘေးရှောင်များ ထောင်နှင့်ချီ၍ နေထိုင်ကြသည်။

ရိဒ်ခေါဒါရ်မြို့ အခြေနေနှင့်ပတ်သက်၍ မီဇိုရမ်ဝန်ကြီးချုပ်၏ ဦးဆောင်မှုနှင့် ဖွဲ့စည်းထားသည့် ငြိမ်းချမ်းရေးအကျိုးဆောင်အဖွဲ့မှ စေ့စပ်ပေးမှုကြောင့် HPO/CDF-Hualngoram နှင့် CNO/ CNDF တို့ အိုင်ဇောလ်မြို့တွင် ယမန်နေ့က တွေ့ဆုံကြသော်လည်း ညနေပိုင်းအထိ တိုက်ပွဲဆက်လက်ဖြစ်ပွားခဲ့သည်။

ပုံစာ- ရိဒ်ခေါဒါရ်မြို့နှင့် ဇိုခေါထာရ်ကျေးရွာကို ဆက်သွယ်ထားသည့် တီချောင်းတံတားကို တွေ့ရစဥ်(ပုံအဟောင်း)

The post ရိဒ်ခေါဒါရ်မြို့ တိုက်ပွဲတွင် မီဇိုရမ်ဘက်သို့ ကျည်ဆန်များ ကျရောက်ပါက ချင်းစစ်ဘေးရှောင်များကို နှင်ထုတ်မည်ဟု သတိပေးခံရ appeared first on Ayeyarwaddy Times.