ရန်ကုန်၊ အောက်တိုဘာ ၂၂

မြန်မာနိုင်ငံတွင် စစ်တပ်က ရွေးကောက်ပွဲ ကျင်းပမှုကြောင့် ပိုမိုကြီးမားသော မတည်ငြိမ်မှုများ ဖြစ်ပေါ်လာနိုင်ကြောင်း ဩစတြေးလျအစိုးရလက် ထောက်ဝန်ကြီးဂျော့ရှ် ဝီလ်ဆင် က အာဆီယံအစည်းအဝေးတွင် သတိပေးလိုက်သည်။

အောက်တိုဘာလ ၁၇ ရက်နေ့ မလေးရှားနိုင်ငံ၊ ကွာလာလမ်ပူမြို့တွင် ကျင်းပသည့် အာဆီယံ အရှေ့အာရှ စွမ်းအင်ဝန်ကြီးများ အစည်းအဝေးတွင် ၎င်းက အထက်ပါအတိုင်း သတိပေးလိုက်ခြင်းဖြစ်ပြီး ဂျော့ရှ် ဝီလ်ဆင်သည် ဩစတြေးလျအစိုးရ၏ ရာသီဥတုပြောင်းလဲမှု၊ စွမ်းအင် နှင့် အရေးပေါ်စီမံခန့်ခွဲမှုဆိုင်ရာ လက်ထောက်ဝန်ကြီးဖြစ်သည်။

မြန်မာနိုင်ငံတွင် အကြမ်းဖက်မှုများ ချက်ချင်းရပ်စဲရေး၊ မတရားဖမ်းဆီးခံထားရသူအားလုံးကို ပြန်လွှတ်ပေးရေး၊ လူသားချင်းစာနာမှုအကူအညီများ ဘေးကင်းလုံခြုံစွာနှင့် အတားအဆီးမရှိ ရရှိစေရေး၊ စစ်မှန်သော အားလုံးပါဝင်သည့် နိုင်ငံရေးဆွေးနွေးပွဲများ ပြုလုပ်ရေး အတွက် ဩစတြေးလျနိုင်ငံက ထပ်လောင်းတောင်းဆိုကြောင်း ၊ ထိုအခြေအနေများ မပြည့်စုံဘဲ ရွေးကောက်ပွဲများ ကျင်းပခြင်းသည် ပိုမိုကြီးမားသော မတည်ငြိမ်မှုကို ဖြစ်ပေါ်စေနိုင်ကြောင်း ဩစတြေးလျအစိုးရလက် ထောက်ဝန်ကြီးဂျော့ရှ် ဝီလ်ဆင် သတိပေးသည်။

အမျိုးသားညီညွတ်ရေးအစိုးရ၏ ဩစတြေးလျနိုင်ငံဆိုင်ရာ ကိုယ်စားလှယ်ရုံးက ဩစတြေးလျအစိုးရ လက် ထောက်ဝန်ကြီးဂျော့ရှ် ဝီလ်ဆင်၏ ပြောကြားချက်မှာ မြန်မာပြည်သူများအတွက် အလွန်အဓိပ္ပာယ်ရှိကြောင်း၊ လက်ရှိဖြစ်ပွားနေသော မြန်မာစစ်တပ်၏ ဖိနှိပ်ချုပ်ချယ်မှုနှင့် အစုလိုက် အပြုံလိုက် ဖမ်းဆီးထိန်းသိမ်းမှုများ၏ အခြေအနေမှန်ကို အသိအမှတ်ပြုခြင်း၊ အသက်ကယ် လူသားချင်းစာနာမှုအကူအညီများ ရရှိရေးကို ထောက်ခံအားပေးခြင်း၊ အာဆီယံ၏ ဘုံသဘောတူညီချက် ငါးချက် (Five-Point Consensus) ကို လက်တွေ့ကျကျ အားဖြည့်ပေးခြင်း နှင့် အာဏာရူး ရွေးကောက်ပွဲလုပ်ငန်းစဉ်ကို နိုင်ငံတကာက တရားဝင်အဖြစ် အသိအမှတ်ပြုခြင်းမှ တားဆီးရာတွင် အကူအညီဖြစ်စေခြင်း တို့ကို ဖော်ပြနေကြောင်း သတင်းထုတ်ပြန်သည်။

The post မြန်မာနိုင်ငံတွင် စစ်တပ်၏ ရွေးကောက်ပွဲကြောင့် ပိုမိုကြီးမားသော မတည်ငြိမ်မှုများ ဖြစ်ပေါ်လာနိုင်ဟု ဩစတြေးလျအစိုးရလက်ထောက်ဝန်ကြီးက အာဆီယံအစည်းအဝေးတွင် သတိပေး appeared first on Khit Thit Media.