ရန်ကုန်၊ ဇူလိုင် ၆

မန္တလေးတိုင်း၊ မြင်းခြံမြို့နယ်၊ ကျောက်တိုင်ရွာကိုလည်း အကြမ်းဖက် စစ်တပ်က ယနေ့ နံနက်အစောပိုင်းတွင် လေယာဉ်ဖြင့် ဗုံးကျဲ တိုက်ခိုက်ခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။

ယနေ့ နံနက် ၁ နာရီကျော်ခန့်တွင် ကျောက်တိုင်ရွာကို အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ လေ ယာဉ်ဖြင့် ဗုံး ၄ လုံးကျဲချ တိုက်ခိုက်ခဲ့ပြီး ပြည်သူများ ထိခိုက်မှုရှိမရှိ အတည်ပြုနိုင်ခြင်းမရှိသေးပေ။

“ဒီနေ့ နံနက် အစောပိုင်း ၁ နာရီကျော်လောက် ကျောက်တိုင်ရွာကို လေယာဉ်နဲ့ ဗုံး ၄ လုံးကျဲချ တယ်လို့ သိရတယ်။ ပြည်သူတွေ ထိခိုက်မှု ရှိမရှိတော့ အတည်မပြုနိုင်သေးဘူး” ဟု ဒေသ ပြည်သူတစ်ဦးက ပြောဆိုသည်။

အလားတူ စစ်ကိုင်းတိုင်း၊ ကောလင်းခရိုင်၊ ကောလင်းမြို့နယ်အနောက်ခြမ်း၊ ရွာကုန်းကြီး ကျေးရွာ နှင့် ကောလင်းမြို့နယ်နှင့်ကျွန်းလှမြို့နယ်အစပ်တစ်နေရာကို စစ်တပ်က လေယာဉ်ဖြင့် ဗုံးကျဲတိုက် ခိုက်သွားကြောင်း Kawlin Revolution – KR ၏ သတင်းထုတ်ပြန်ချက်အရ သိရှိရသည်။

ယနေ့ ဇူလိုင်လ ၆ ရက် နံနက် ၆ နာရီ ၃၀ မိနစ်က ကောလင်းမြို့နယ်အနောက်ခြမ်း၊ ရွာကုန်းကြီး ကျေးရွာကို စစ်ကောင်စီ၏ တံတားဦးလေတပ်မှ တက်လာသော ဂျက်ဖိုက်တာတစ်စီးဖြင့် တိုက်ပွဲ ဖြစ်ပွားခြင်း၊ မြေပြင်ထိုးစစ်ဆင်တိုက်ခိုက်ခြင်းမရှိဘဲ အကြောင်းမဲ့ ဗုံးကျဲပစ်ခတ် တိုက်ခိုက်ခဲ့ ကြောင်း သိရသည်။

စစ်လေယာဉ်က ဗုံးကျဲသွားပြီးနောက် ကောလင်းမြို့နယ်နှင့် ကျွန်းလှမြို့နယ်အစပ်ဘက်သို့ ဦးတည်ပျံသန်းသွားကာ နံနက် ၆ နာရီ ၃၅ မိနစ်တွင် ထပ်မံဗုံးကျဲပစ်ခတ်တိုက်ခိုက်သွားခဲ့ကြောင်း၊ စစ်ကောင်စီတပ်က လေကြောင်းတိုက်ခိုက်မှုနှင့်ပတ်သက်၍ ပြည်သူထိခိုက်မှု၊ အဆောက်အ အုံများပျက်စီးမှုကို သိရှိနိုင်ရန် ဆက်လက်စုံစမ်းနေဆဲဖြစ်ကြောင်း သိရသည်။

အကြမ်းဖက်စစ်ကောင်စီတပ်က ပြည်သူလူထုကို ပစ်မှတ်ထားကာ လေကြောင်းဖြင့် ဗုံးကျဲတိုက်ခိုက် မှုများ အဆက်မပြတ်လုပ်ဆောင်လျက်ရှိသောကြောင့် မိဘပြည်သူများအနေဖြင့် လေကြောင်းရန် ကာကွယ်ရေးဆိုင်ရာ နည်းလမ်းကို လိုက်နာပေးကြပါရန်နှင့် ဗုံးခိုကျင်းများကိုခိုင်ခိုင်မာမာတူးထား ကြရန် တော်လှန်ရေးအဖွဲ့အစည်းများက တိုက်တွန်းထားသည်။

The post မြင်းခြံမြို့နယ်၊ ကျောက်တိုင်ရွာနှင့် ကောလင်းခရိုင်အတွင်းတွင် တိုက်ပွဲဖြစ်ပွားခြင်းမရှိဘဲ စစ်တပ်က လေယာဉ်များဖြင့် ဗုံးများကျဲချ appeared first on Khit Thit Media.