စစ်ကောင်စီက နိုင်ငံတစ်ဝန်းယာယီအပစ်အခတ်ရပ်စဲရေးကို မေလ ၅ ရက် ဒီနေ့ကနေ မေလ ၃၁ ရက်နေ့အထိ သက်တမ်းတိုးလိုက်ကြောင်း စစ်ကောင်စီထိန်းချုပ်ထားတဲ့ MRTV ရုပ်သံကနေ ဒီနေ့မနက်က ကြေညာပါတယ်။

ငလျင်ဒဏ်ပြန်လည်ထူထောင်ရေး၊ နိုင်ငံရဲ့အကျိုးစီးပွားနဲ့ ငြိမ်ချမ်းရေးကိုဖော်ဆောင်နိုင်စေဖို့ အခုလို အပစ်ရပ်ကာလကို သက်တမ်းတိုးလိုက်တာလို့ဆိုပါတယ်။

မြန်မာနိုင်ငံအလယ်ပိုင်းမှာ မတ်လ ၂၈ ရက်နေ့ ငလျင်လှုတ်ခတ်ပြီးနောက် စစ်ကောင်စီက ဧပြီလ ၂ ရက်နေ့ကနေ ၂၂ ရက်နေ့အထိ၊ ဧပြီလ ၂၃ ရက်ကနေ ၃၀ နေ့အထိ ယာယီအပစ်အခတ်ရပ်စဲကြောင်း နှစ်ကြိမ်ကြေညာခဲ့ပြီး အခု တတိယအကြိမ် ကြေညာတာလည်းဖြစ်ပါတယ်။

ယာယီအပစ်ရပ်ကြေညာထားတဲ့ကာလအတွင်း လက်နက်ကိုင်အဖွဲ့တွေဘက်က တိုက်ခိုက်လာလို့ရှိရင်တော့ လိုအပ်တဲ့အရေးယူတုံ့ပြန်မှုတွေဆောင်ရွက်သွားမယ်လို့လည်း စစ်ကောင်စီရဲ့ ထုတ်ပြန်ချက်မှာပါရှိပါတယ်။

မြန်မာ့မဟာဗျူဟာနဲ့ မူဝါဒရေးရာ လေ့လာရေးအဖွဲ့ (ISP-Myanmar) အဖွဲ့ဝင် ဦးအောင်သူငြိမ်းက စစ်ကောင်စီရဲ့ အပစ်ရပ်ကြေညာမှုဟာ နိုင်ငံတကာမှာ မျက်နှာပန်းလှဖို့အတွက် ဟန်ပြလုပ်ရပ်သာဖြစ်တယ်လို့ RFA ကို ပြောပါတယ်။

“အပစ်ရပ်စဲရေးတွေက Nomial အမည်ခံရုံမျှ သက်သက် ဖြစ်နေတယ်။ စစ်ကောင်စီအဖို့က အာဆီယံ ဥက္ကဋ္ဌ မလေးရှား၊ အိမ်နီးချင်း စင်္ကာပူ၊ ထိုင်းတို့က အပစ်ရပ်ဆက်ကြေညာဖို့ လိုလားနေတယ်။ နိုင်ငံတကာ ဆက်ဆံရေးမှာ မျက်နှာရတာပေါ့။ မြန်မာက ပြန်လည်တည်ဆောက်ရေး အကူအညီများစွာ လိုနေပါသေးတယ်။ တဖက်က ကြေညာထားလည်း သူက ခုခံကာကွယ်ရေးအကြောင်းပြ လေကြောင်းတိုက်ခိုက်မှုတွေ၊ ထိုးစစ်တွေ လုပ်နေတာပဲ”

တိုင်းရင်းသားလက်နက်ကိုင်တပ်ဖွဲ့တွေဘက်ကလည်း စစ်ကောင်စီဟာ အပစ်အခတ်ရပ်စဲရေးကြေညာပြီး လက်တွေ့မှာ ဘာတိုက်ပွဲမှမရှိဘဲ ဝေဟင်၊ မြေပြင်တိုက်ခိုက်မှုတွေကို ဆက်တိုက်လုပ်ဆောင်နေတယ်လို့ ပြောဆိုကြပါတယ်။

အမျိုးသားညီညွတ်ရေးအစိုးရ (NUG) ကလည်း စစ်ကောင်စီဟာ မတ်လ ၂၈ ရက်နေ့ကနေ မေလ ၄ ရက်နေ့ အထိ နိုင်ငံတစ်ဝန်း လေကြောင်းတိုက်ခိုက်မှု ၂၈၂ ကြိမ်ပြုလုပ်ခဲ့ပြီး ပြည်သူ ၂၇၆ ဦးသေဆုံးခဲ့သလို နောက်ထပ် လူပေါင်း ၄၅၆ ဦး ဒဏ်ရာရှိခဲ့တယ်လို့ မေလ ၅ ရက်နေ့က ထုတ်ပြန်ထားပါတယ်။

ညီနောင်မဟာတ်မိတ်သုံးဖွဲ့ဖြစ်တဲ့ ကိုးကန့်တပ် MNDAA၊ တအာင်းတပ် TNLA နဲ့ အာရက္ခတပတော် (AA) တို့ကလည်း လာမဲ့မေလကုန်အထိ အပစ်အခတ်ရပ်စဲကြောင်း ကြေညာထားပါတယ်။