တရုတ် ကြားဝင်စေ့စပ်တဲ့ ငြိမ်းချမ်းရေးဆွေးနွေးပွဲ အောင်မြင်မှုမရခဲ့တဲ့နောက် တအာင်းအမျိုးသား လွတ်မြောက်ရေးတပ်မတော်(TNLA) ထိန်းချုပ်ဒေသတွေ ဆက်တိုက် ဗုံးကြဲခံရတယ်လို့ TNLA က မေလ ၃ ရက်မှာ သတင်းထုတ်ပြန်ပါတယ်။

တရုတ်နိုင်ငံ ကူမင်းမြို့မှာ ဧပြီလ ၂၈ ရက်နဲ့ ၂၉ ရက်က စစ်ကောင်စီနဲ့ တအာင်းအမျိုးသား လွတ်မြောက် ရေးတပ်မတော်(TNLA) တို့တွေ့ဆုံခဲ့ပြီး နောင်ချို၊ ကျောက်မဲ၊ သီပေါ၊ မိုးကုတ် စတဲ့ ဒေသတွေကနေ TNLA တပ်တွေ ပြန်လည်ဆုတ်ခွာပေးဖို့ တောင်းဆိုခဲ့တာကို TNLA ဘက်က ပယ်ချခဲ့တာကြောင့် ရလဒ်မထွက်ဘဲ ပြီးဆုံးခဲ့ပါတယ်။

စစ်ကောင်စီရဲ့ တောင်းဆိုချက်တွေကို TNLA ဘက်က ပယ်ချခဲ့ပြီးနောက် TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့ကို ဧပြီလ ၃၀ ရက်၊ မေလ ၂ ရက်နဲ့ မေလ ၃ ရက်နေ့တွေမှာ ဗုံးကြဲတိုက်ခိုက်မှုတွေ ဆက်တိုက်လုပ်ခဲ့တာပါ။

မေလ ၃ ရက်က မိုးကုတ်မြို့ ကသဲရပ်ကွက်ဗုံးကြဲခံရမှုအတွင်း ဒေသခံတစ်ဦးသေဆုံးပြီး နောက်တစ်ဦးဒဏ်ရာရခဲ့တယ်လို့ TNLA က ထုတ်ပြန်ပါတယ်။

ဒီအပြင် နောင်ချိုမြို့နယ်ကိုလည်း မေလ ၁ရက်မှာ ဗုံးကြဲတိုက်ခိုက်ခဲ့တယ်လို့ ဆိုပါတယ်။

ဒီလိုတိုက်ခိုက်မှုတွေနဲ့ ပတ်သက်လို့ စစ်ကောင်စီပြောခွင့်ရသူ ဗိုလ်ချုပ်ဇော်မင်းထွန်းကို RFA က ဆက်သွယ်ခဲ့ပေမဲ့ အကြောင်း မပြန်ပါဘူး။

စစ်ကောင်စီဟာ TNLA ထိန်းချုပ်ဒေသတွေကို ထိုးစစ်ဆင်တာ၊ အင်အားဖြည့်တင်းတာနဲ့ ဗုံးကြဲတိုက်ခိုက်တာတွေ လုပ်ဆောင်နေတယ်လို့ TNLA က ပြောဆိုထားပါတယ်။

စစ်ကောင်စီနဲ့ TNLA ကြား ပစ်ခတ်တိုက်ခိုက် မှုအားလုံးရပ်တန့်ဖို့၊ တရုတ်-မြန်မာနယ်စပ်ကုန် သွယ်ရေးလမ်းကြောင်း ပြန်ဖွင့်ဖို့ တရုတ်နိုင်ငံအထူးကိုယ်စားလှယ် မစ္စတာတိန့်ရှီကျွင်းက ကြားဝင်စေ့စပ်ပြီး လာမဲ့ ဩဂုတ်လမှာ ထပ်မံဆွေးနွေးဖို့ရှိတယ်လို့ TNLA က ထုတ်ပြန်ထားပါတယ်။