ဩဂုတ်၂၁ ၊၂၀၂၅ ခုနှစ်။ ကေအိုင်စီ

မွန်ပြည်နယ်၊ ရေးမြို့နယ်မြောက်ပိုင်း အောင်သပြေကျေးရွာအနီးတွင် မွန်ပြည်တော်လှန်ရေး ပူးပေါင်းတပ်နှင့် စစ်ကြောင်းထိုးလာသည့် အာဏာသိမ်း စစ်တပ်တို့ ဩဂုတ် ၂၀ ရက်နေ့တွင် တိုက်ပွဲ ဖြစ်ပွားခဲ့သည်ဟု မွန်ပြည် တော်လှန်ရေးတပ်(MSRF)က ပြောသည်။

အဆိုပါ ကျေးရွာအနီးသို့ အာဏာသိမ်းစစ်တပ် ခြေမြန်တပ်ရင်း (ခမရ-၅၈၈)၊ ခြေလျင်တပ်ရင်း(ခလရ-၁၀၆)၊ အမြောက်တပ်(အမတ-၃၁၇)တပ်ရင်းများမှ အင်အားအလုံးအရင်းဖြင့် စစ်ကြောင်းထိုးဝင်ရောက်လာပြီး ဩဂုတ် ၂၀ ရက်နေ့တွင် တိုက်ပွဲ နှစ်ကြိမ် ဖြစ်ပွားခဲ့သည်ဟု မွန်ပြည်တော်လှန်ရေးတပ်(MSRF)၊ ပြောရေးဆိုခွင့်ရှိသူ မိတလညဏ်က ယခုလို ပြောသည်။

“မနေ့က နှစ်ဖက်တိုက်ပွဲတွေ ဖြစ်ပွားခဲ့တယ်။ စစ်ကြောင်းထိုးလာတဲ့ ရန်သူ့အင်အားက ခန့်မှန်း ၁၅၀ ဝန်းကျင် ရှိပါတယ်။ တိုက်ပွဲအတွင်းမှာ စကစ ဘက်က သေဆုံးတာကိုတော့ မျက်မြင်အတည်ပြု နိုင်ခဲ့တာ ဖြစ်တယ်။ နောက်ထပ် ထိခိုက်သေဆုံးတာတွေကိုတော့ ဆက်လက်အတည်ပြုနေဆဲ ဖြစ်ပါတယ်” ဟု ကေအိုင်စီသို့ ပြောသည်။

နံနက်ပိုင်း တိုက်ပွဲတွင် စစ်တပ်ဘက်မှ တစ်ဦး သေဆုံးသွားပြီး ညနေပိုင်း ဒုတိယအကြိမ် တိုက်ပွဲတွင် ကရင် အမျိုးသားလွတ်မြောက်ရေးတပ်မတော်-KNLA၊ တပ်ရင်း(၂၇)၊ တပ်ခွဲ(၁)မှ ရဲဘော်တစ် ဦးကျဆုံးခဲ့သည်ဟု တိုက်ပွဲ သတင်း ထုတ်ပြန်ချက်၌ ဖော်ပြထားသည်။

အဆိုပါ တိုက်ပွဲတွင် တော်လှန်ရေးပူးပေါင်းတပ်များ ဖြစ်သည့် မွန်ပြည်တော်လှန်ရေးတပ်(MSRF)၊ ရေးပြည်သူ့ ကာကွယ်ရေးတပ်(YPDF)၊ ရာမညမွန်တပ်တော်(RMA)နှင့် ကရင်အမျိုးသားလွတ်မြောက်ရေးတပ်မတော် KNLA၊ တပ်ရင်း (၂၇)၊ တပ်ခွဲ(၁)တို့မှ ပူးပေါင်းပါဝင်ခဲ့ကြောင်း သိရသည်။

လက်ရှိ စစ်တပ် စစ်ကြောင်းထိုးဝင်ရောက်မှုများကြောင့် ကျေးရွာအတွင်းရှိ ဒေသခံအနည်းစုသည် ဘေးကင်းရာ နေရာများသို့ ထွက်ပြေးတိမ်းရှောင်နေကြရပြီး ကျန်အများစုသည် ကျေးရွာအတွင်း ကျန်ရှိနေသေးသည်ဟု ဒေသခံများနှင့် တော်လှန်ရေးတပ်ဖွဲ့ဝင်များက ပြောဆိုသည်။