အောက်တိုဘာ ၂၂ ၊ ၂၀၂၅ ခုနှစ်။ ကေအိုင်စီ

တနင်္သာရီတိုင်း၊ ပုလောမြို့နယ်၊ ပြည်ထောင်စုလမ်းမကြီးပေါ်ကိုစစ်အုပ်စုတပ်က အောက်တိုဘာ ၂၁ ရက်နေ့၊ နေ့လည်ပိုင်းတွင် လေယာဉ်ဖြင့် ဗုံး ၂ လုံး ကြဲချ တိုက်ခိုက်ခဲ့ပြီးနောက် ဒေသခံများ သွားလာမရဖြစ်နေသည်ဟု တော်လှန်ရေးတပ်ဖွဲ့ ဝင်တစ်ဦးက ပြောသည်။

စစ်အုပ်စုတပ်က ပုလောမြို့နယ်၊ သင်္ကန်းတောရွာအနီးရှိ ပြည်ထောင်စု လမ်းမကြီးပေါ်ကို ဂျက်ဖိုက်တာဖြင့် ဗုံးကျဲ တိုက်ခိုက်ခဲ့ခြင်းဖြစ်ကြောင်း ပုလောမြို့နယ်အခြေစိုက်တော်လှန်ရေးတပ်ဖွဲ့ဝင်တစ်ဦးက ယခုလို ပြောသည်။

“မနေ့ကလာပြီးလေကြောင်းနဲ့လာပစ်တာပါ။တိုက်ပွဲဖြစ်ပွါးမှုကမရှိပေမဲ့ လေကြောင်းနဲ့လာပြီးတော့ ဗုံးကြဲနေတာမျိုးတွေတော့ မကြာခဏတွေ့နေရတာမျိုး ရှိတယ်။အခုလမ်းပိုင်းကတော့သွားလို့ မရတော့ ပါဘူး။”ဟု ၎င်းက ကေအိုင်စီ သို့ ပြောဆိုသည်။

အဆိုပါ စစ်အုပ်စုတပ်မှ ဗုံးကြဲ တိုက်ခိုက်ချိန်တွင် လမ်းသွားလမ်းလာ ပြည်သူများ မရှိသောကြောင့် ထိခိုက်ဒဏ်ရာရရှိသူမရှိသော်လည်း ဗုံးထိမှန်မှုကြောင့်လမ်းပိုင်ထိခိုက်ပျက်စီးခဲ့ပြီး အနီးတွင် နေထိုင်သူများ ဘေးလွှတ်ရာသို့ ရှောင်တိမ်းနေထိုင် နေရသည်ဟု ပုလောမြို့နယ်ဒေသခံတစ်ဦးက ပြောသည်။

“အဲ့ဒီအနားတဝိုက်ကသူတွေကတော့ လေကြောင်းထက်လာမှာကို ကြောက်လို့ ရှောင်နေကြတာမျိုးတော့ ရှိတယ်။ တော်တော် ဆိုးဆိုးဘဲ စစ်ဘေးရှောင်ရလိုက် လေကြောင်ရကိုရှောင်ရလိုက်နဲ့ နေရေးထိုင်ရေး အဆင်မပြေဘူး။” ဟု ၎င်းက ပြောသည်။

ပြီးခဲ့သည့် အောက်တိုဘာလ ၁၆ ရက်နေ့တွင်လည်း စစ်အုပ်စုတပ်မှ ပုလောမြို့နယ်၊ တန်းရှင်းရွာသို့ ဂျက်ဖိုက်တာဖြင့် ဗုံး ၂ လုံးကျဲချ တိုက်ခိုက်ပြီး စက်သေနတ်များဖြင့်ပါ ပစ်ခတ် တိုက်ခိုက်သွားကြောင်း တော်လှန်ရေးတပ်ဖွဲ့ဝင်များ ၏ပြောဆိုချက်များအရသိရသည်။

ထို့အပြင် အာဏာသိမ်း စစ်ကောင်စီ အနေဖြင့် ပုလောမြို့နယ်ရှိ ပုလောမြို့နှင့် ကျေးရွာတချို့တွင် ဆန်ရိက္ခာ သယ်ဆောင်ခွင့်များကို ပိတ်ပင်ထားသောကြောင့် ဆန်နှင့်အခြေခံစားသောက်ကုန်ပစ္စည်းများ စတင်ပြတ် လပ်နေကြောင်း ဒေသခံ များကပြောသည်။

စစ်ကောင်စီက စစ်အုပ်ချုပ်ရေး ကြေညာထားသည့် ပုလောမြို့နယ်တွင် အာဏာသိမ်းစစ်ကောင်စီတပ်နှင့် ဒေသခံ ပြည်သူ့ ကာကွယ်ရေးတပ်ဖွဲ့များကြား မကြာခဏဆိုသလို ထိတွေ့တိုက်ပွဲများ ဖြစ်ပေါ်လျက်ရှိနေပြီး အာဏာသိမ်း စစ်ကောင်စီ ဘက်က ဖြတ်လေးဖြတ်ပုံစံ ဖြတ်တောက်မှုများ ဆက်တိုက်လုပ်ဆောင် လာနေ ကြောင်းလည်း ပြည်သူ့ ကာကွယ်ရေးတပ်ဖွဲ့များဘက်ကလည်း အတည်ပြု ပြောဆိုသည်။