ဩဂုတ် ၂၁၊ ၂၀၂၅ ခုနှစ်။ ကေအိုင်စီ

နိုင်ငံတော်စီမံအုပ်ချုပ်ရေးကောင်စီ(နစက) မှ နိုင်ငံတော်လုံခြုံရေးနှင့် ငြိမ်းချမ်းရေးကော်မရှင်(နလငက) အဖြစ် အစားထိုးပြောင်းလဲထားသည့် အာဏာသိမ်းစစ်အုပ်စု၏ စစ်ကော်မရှင်ကို ဒဏ်ခတ်ပိတ်ဆို့ရန် ကနေဒါ၊ အီးယူ၊ ယူကေနှင့် အမေရိကန်နိုင်ငံတို့အား Justice for Myanmar-JFM က တောင်းဆိုသည်။

JFM ၏ ယနေ့ (ဩဂုတ် ၂၁ ရက်) ထုတ်ပြန်ချက်၌ စစ်အုပ်စုသည် စစ်ကော်မရှင်အဖြစ်ပြောင်းလဲခြင်း၊ အမေရိကန်အစိုးရနှင့် ဆက်ဆံရေးတည်ဆောက်ရန် ကြိုးပမ်းခြင်းတို့ဖြင့် နိုင်ငံတကာ ဒဏ်ခတ်ပိတ်ဆို့မှုများမှ ကျော်လွှားနိုင်ရန် လုပ်ဆောင်နေသည်ဟု ပြောဆိုထားသည်။

ပြီးခဲ့သည့် ဇူလိုင် ၃၁ ရက်နေ့က အာဏာသိမ်းပြီးနောက် စစ်အုပ်စုဖွဲ့စည်းခဲ့သည့် နစက ကိုဖျက်သိမ်းကာ ယာယီ သမ္မတ၊ တပ်မတော် ကာကွယ်ရေးဦးစီးချုပ်၊ ကော်မရှင်ဥက္ကဌ တာဝန်များ ရယူထားသော စစ်ခေါင်းဆောင် မင်းအောင်လှိုင်က ထိပ်တန်းစစ်တပ်အရာရှိအများစု ပါဝင်သော စစ်ကော်မရှင်ဖွဲ့စည်းကြောင်း နိုင်ငံပိုင်မီဒီယာမှ ကြေညာခဲ့သည်။

စစ်ကော်မရှင်ပြောင်းလဲပြီးနောက်တွင်လည်း ပြီးခဲ့သည့်ရက်ပိုင်းက လူအစုလိုက်အပြုံလိုက် သေဆုံးမှု ဖြစ်ပွားခဲ့ သည့် ကရင်နီ၊ မော်ချီးဒေသသို့ လေကြောင်းမှ ဗုံးကြဲတိုက်ခိုက်မှုအပါအဝင် နိုင်ငံအတွင်း ပြည်သူများကို ပစ်မှတ် ထား တိုက်ခိုက်မှုများ စစ်အုပ်စုက ပိုမိုလုပ်ဆောင်လာသည်ဟု JFM က ပြောသည်။

တဖက်တွင်လည်း ၂၀၀၂ ခုနှစ်က စစ်အုပ်စုနှင့် စာချုပ်ဆက်ဆံရေးရှိခဲ့သည့် အမေရိကန် ရီပက်ဘလစ်ကန်ပါတီ နှင့် နီးစပ်ရာ DCI Group လော်ဘီအဖွဲ့ကို အမေရိကန်ဒေါ်လာသုံး သန်းဖြင့် ငှားရမ်းခဲ့သည်။ ယခုလို လုပ်ဆောင် ခြင်းသည် စစ်အုပ်စု ကျူးလွန်ထားသည့် ရာဇဝတ်မှုများကို ဖုံးကွယ်ရန်၊ ရွေးကောက်ပွဲ မတိုင်မှီ တရားဝင်မှုရရန်၊ အမေရိကန်အစိုးရနှင့် ဆက်ဆံရေးပြန်လည် တည်ဆောက်ရန် ဖြစ်ကြောင်း JFM က ထောက်ပြသည်။

ထို့ကြောင့် ကနေဒါ၊ အီးယူ၊ ယူကေနှင့် အမေရိကန်တို့ အနေဖြင့် စစ်အုပ်စုအပေါ် ဒဏ်ခတ်ပိတ်ဆို့မှု ပြတ်ပြတ် သားသား ရှိရန်၊ နစက မှ ပြောင်းလဲထားသည့် စစ်ကော်မရှင်ကိုပါ အရေးယူမှုစာရင်းအတွင်း ထည့်သွင်းရန် တောင်းဆိုထားခြင်းဖြစ်သည်ဟု သိရသည်။

“ခေါင်းစီးပြောင်းပြီး မလှိမ့်တပတ်လုပ်နေတဲ့ တရားမဝင်မြန်မာစစ်အုပ်စုကို ခွင့်ပြုမပေးဖို့လိုပါတယ်။ နလငက(စစ်ကော်မရှင်)ကို အမြန်ဆုံးဒဏ်ခတ်ပိတ်ဆို့ပြီး အတုအယောင်ရွေးကောက်ပွဲကို ဆန့်ကျင်တာ၊ ပစ်မှတ်ထား ပိတ်ဆို့မှုတွေ ညှိနှိုင်းချမှတ်ပြီး ကမ္ဘာလုံးဆိုင်ရာ စစ်လက်နက်ရောင်းချမှုကို ပိတ်ပင်တာ၊ စစ်အုပ်စုရဲ့ဘဏ္ဍာငွေ၊ လက်နက်၊ နည်းပညာနဲ့လေယာဥ်ဆီလမ်းကြောင်းတွေကို ပိတ်ဆို့ဖြတ်တောက်ရေး တိုးမြှင့်ဖို့အားထုတ်ရမှာပါ” ဟု JFM ပြောခွင့်ရ မရတနာမောင်က ထုတ်ပြန်ချက်၌ ပြောဆိုထားသည်။

ထို့အပြင် ဩစတေးလျနိုင်ငံအနေဖြင့်လည်း မဟာမိတ်နိုင်ငံများကဲ့သို့ စစ်ကော်မရှင်ကို ပိတ်ဆို့ အရေးယူမှုများ အတွင်း လိုက်ပါဆောင်ရွက်ရန် လိုသည်ဟု JFM က ဖြည့်စွက်ပြောသည်။
စစ်ကော်မရှင် မပြောင်းခင် ၂၀၂၁ ခုနှစ်မှ ၂၀၂၃ ခုနှစ်အတွင်း ကနေဒါ၊ အမေရိကန်၊ အီးယူနှင့် ယူကေနိုင်ငံများမှ နစက အဖွဲ့ကို ဒဏ်ခတ်ပိတ်ဆို့မှုများ ပြုလုပ်ခဲ့သလို လက်ရှိ စစ်ကော်မရှင်ခေါင်းဆောင် မင်းအောင်လှိုင်နှင့် စိုးဝင်းတို့ ကိုလည်း ဩစတေးလျနှင့် ဖော်ပြပါနိုင်ငံများက ဒဏ်ခတ်ပိတ်ဆို့ထားပြီး ဖြစ်သည်။

JFM ၏ သုံးသပ်ချက်အရ ဒဏ်ခတ်ပိတ်ဆို့ခံရမှုများသည် နစက ထိန်းချုပ်မှုအောက်ရှိ အဖွဲ့အစည်းအားလုံးနှင့် အကျုံးဝင်သလို စစ်အုပ်စု တရားမဝင်ထိန်းချုပ်ထားသည့် ဝန်ကြီးဌာနများ၊ နိုင်ငံပိုင်စီးပွားရေးလုပ်ငန်းများလည်း ပါဝင်သည်ဟု ထုတ်ပြန်ချက်၌ ဖော်ပြသည်။

JFM ကို စစ်အုပ်စုနှင့်အကျိုးတူ ပူးပေါင်းလုပ်ဆောင်နေသည့် စီးပွားရေးလုပ်ငန်းများ၊ ပတ်သက်ဆက်နွယ် နေသည့် လူပုဂ္ဂိုလ်၊ အဖွဲ့အစည်းများ အပါအဝင် စစ်ရာဇဝတ်မှုများ နောက်ကွယ် အကျိုးအမြတ်ရရှိနေသည့် အဖွဲ့ အစည်းများအား ဖော်ထုတ်၊ ထောက်ပြ၍ ဆိုင်ရာများက အရေးယူမှုရှိရေး ဖော်ထုတ် အစီရင်ခံနေသည့် လျှို့ဝှက် အဖွဲ့ အဖြစ် သိရသည်။