ကန္တာရဝတီတိုင်း(မ်)

ကရင်နီပြည် လွိုင်ကော်မြို့နယ် ၊ လောပိတကျေးရွာမှာ ရှိတဲ့ ဒေသခံ အများပြည်သူ ဖြတ်သန်း သွားလာနေတဲ့ လမ်းကို စစ်ကောင်စီတပ်က အင်အား အများအပြားနဲ့ ထွက်လာပြီး စက်ယန္တယား သုံးကာ ဖျက်ဆီးခဲ့ပါတယ်။

လောပိတ အခြေစိုက် စခန်းတွေမှာ နေထိုင်ကြတဲ့ စစ်ကောင်စီတပ်သားတွေက ပြီးခဲ့တဲ့ မေလ ၁၉ ရက်၊ ည(၈)နာရီ ဝန်းကျင်လောက်မှာ အင်အားအများအပြားနဲ့ လုံခြုံရေးယူကာ ဖျက်စီးခဲ့တာ ဖြစ်တယ်လို့ ပြောင်းစိုက်တောင်သူ တစ်ဦးက ပြောပါတယ်။

“မနေ့ညက(မေလ ၁၉ရက်) (၈)နာရီ ဝန်းကျင်လောက်မှာ သူတို့ကားတစ်စီးနဲ့ ဘတ်ဖိုးကို သယ်လာပြီး မှ လမ်းကို လာဖျက်သွားတယ်လို့ ကြားတယ်။ ဒီညဘက်ပေါ့နော်။ ပြီးတော့ ဒီအောက်ဘက်တွေမှာ ရှိတဲ့ ဂျပန်ဝင်းတို့ဘက်မှာလည်း လမ်းတွေ ဖျက်ထားတယ်လို့တော့ ကြားတယ်။ ဒါပေမယ့် သွားတော့ မကြည့်ရသေးဘူး။”လို့ ပြောင်းစိုက်တောင်သူ တစ်ဦးက ပြောပါတယ်။

အခုလို လမ်းတွေကို ဖျက်လိုက်တဲ့ အဓိက အကြောင်းအရင်းကို တော့ မသိပေမယ့် ဒီရက်ပိုင်းအတွင်းမှာတော့ စစ်ကောင်စီတပ်တွေ ဟာ ကျေးရွာ အနီးအနားတွေမှာ သွားလာလှုပ်ရှားနေတာတွေ ခပ်စိပ်စိပ်တွေ့မြင်ရတယ်လို့ သူက ဆက်ပြောပါတယ်။

အဆိုပါ လမ်းဟာ လောပိတနဲ့ ဒီးမော့ဆို ကို ဆက်သွယ်ထားတဲ့ လမ်းဖြစ်ပြီး ဒေသခံတွေ ယာခင်းထဲတွေ ကို သွားလာဖို့ နေ့စဉ် အသုံးပြုနေကြတဲ့ လမ်းလည်း ဖြစ်ပါတယ်။

The post စစ်ကောင်စီက လောပိတဒေသခံတွေ ယာခင်းထဲသွားဖို့ အသုံးပြုနေတဲ့ လမ်းကို ဖျက်ဆီး first appeared on Kantarawaddy Times.