ကန္တာရဝတီတိုင်း (မ်)

ရှမ်း-ကရင်နီနယ်စပ်၊ ဖယ်ခုံမြို့နယ်၊ သိကျိတ်ကျေးရွာအနီးရှိ မြင်းမထိတောင် သတ္တုတူးဖော်ရေးကို ကန့်ကွက်နေတဲ့ ဒေသခံ ပရာဒေါင်းဆွေမျိုးစုနဲ့ လုပ်ကွက်ကုမ္ပဏီဖြစ်တဲ့ လေးပွင့်ကြယ်ကုမ္ပဏီ တို့ကြား ညှိနှိုင်းဆောာင်ရွက်ရေးမှာ အပြီးသတ်သဘောတူညီမှု မရမချင်း သတင်းအချက်အလက် မပေါက်ကြားရေးအပါအဝင် ၇ ချက်ဖြင့် နှစ်ဖက်သတောတူညီခဲ့ကြပါတယ်။

ဒီသဘောတူညီချက်က ပရာဒေါင်းဆွေမျိုးစု ခေါင်းဆောင်လေးဦးကို လေးပွင့်ကြယ်ကုမ္ပဏီမှ ဖမ်းဆီးချုပ်နှောင်ထားစဥ်ရရှိလာတဲ့ သဘောတူညီချက်ဖြစ်ပါတယ်။

သတ္တုလုပ်ငန်းဆောင်ရွက်‌ရေး နှစ်ဖက် ညှိနှိုင်းနေစဥ် လူထုကိုဖြစ်စေ၊ မီဒီယာကိုဖြစ်စေ သတင်းအချက်အလက်တွေ စောင့်စည်းကြဖို့ နှစ်ဖက်သဘောတူ လက်မှတ်ရေးထိုးခဲ့တာဖြစ်တယ်ဆိုတဲ့အချက်အပါအဝင် ၇ ချက်ကို ပရာဒေါင်းဆွေမျိုးစုက ဒီကနေ့ မေလ ၂၁ ရက်နေ့မှာ ထုတ်ပြန်လိုက်တာပါ။

ဖမ်းဆီးခံရစဥ်အတွင်း သဘောတူညီချက်ချမှတ်မှုကလည်း ဒေသခံတွေရဲ့ သဘောထားအစစ်အမှန်မဟုတ်နိုင်ကြောင်းကိုလည်း ကရင်နီပြည်တွင်းရှိ အရပ်ဖက်အဖွဲ့အစည်းတွေက မှတ်ချက်ပြုထားကြပါတယ်။

ဆွေမျိုးစုနဲ့ ကုမ္ပဏီကြား နှစ်ဖက်သဘောတူညီချက်နဲ့ ပတ်သက်ပြီး ပရာဒေါင်းဆွေမျိုးစု ဥက္ကဌ ခွန်းအောင်နိုင်စိုးကို ကန္တာရဝတီတိုင်း (မ်) က ဒီကနေ့ မေလ ၂၁ ရက်နေ့မှာ ဆက်သွယ်မေးမြန်းခဲ့ပေမဲ့ တစ်စုံတစ်ရာအကြောင်းပြန်ခြင်း မရှိသေးပါဘူး။

ပရာ‌ဒေါင်းဆွေမျိုးစု ခေါင်းဆောင်လေးဦး ဖမ်းဆီးခံရစဥ်အတွင်း လေးပွင့်ကြယ်ကုမ္ပဏီနဲ့ တရုတ် မစ္စတာဝမ် ကုမ္ပဏီတို့ရဲ့ အကြီးစား သတ္တုတူးဖော်ရေးလုပ်ငန်းကို ပြန်စဖို့ သဘောတူညီချက်ရထားတယ်လို့ ပရာဒေါင်းဆွေမျိုးစု အတွင်းရေးမှူးခွန်းမင်းနိုင်က ပြောခဲ့ပါတယ်။

ဘယ်လုပ်ငန်းမဆို လူထုရဲ့ သဘောဆန္ဒခံယူဖို့သာအဓိကဖြစ်ကြောင်းကိုလည်း သဘောတူညီချက်ရခဲ့တယ်လို့ ပရာဒေါင်းဆွေမျိုးစု အတွင်းရေးမှူး ခွန်းမင်းနိုင်ကို ဖက်ဒရယ် FM က မေလ ၂၀ ရက်နေ့မှာ တွေ့ဆုံမေးမြန်းခဲ့စဥ်မှာ ဖြေကြားသွားပါတယ်။

သတ္တုတူးဖော်ရေးလုပ်ငန်းအကောင်အထည်ဖော်နိုင်ရေး အပြီးသတ်ညှိနှိုင်းဖြေရှင်းနိုင်ရန်အတွက် လေးပွင့်ကြယ် ကုမ္ပဏီ၊ ကယန်းပြည်သစ်ပါတီ ဗဟို ကော်မတီတို့နဲ့ ဒေသခံ ပရာဒေါင်းဆွေမျိုးစုတို့ မေလ ၂၆ ရက်နေ့မှာ ကယန်းပြည်သစ်ပါတီဗဟိုဌာနချုပ်ရုံးမှာ ပြန်လည်တွေ့ဆုံဆွေးနွေးသွားဖို့လည်း သဘောတူညီချက်ရရှိထားတယ်လို့ ထုတ်ပြန်စာမှာပါရှိပါတယ်။

The post မြင်းမထိသတ္တုတူးဖော်မှု အပြီးသတ်သဘောတူညီမှု မရမချင်း သတင်းအချက်အလက် မပေါက်ကြားရေးအပါအဝင် ၇ ချက်ဖြင့် လေးပွင့်ကြယ်ကုမ္ပဏီနဲ့ ဆွေမျိုးစုကြား သတောတူညီခဲ့ first appeared on Kantarawaddy Times.